Vunau ni Soro

23 E vosa tale vei Mosese o Jiova, e kaya: 2 “Vosa vei ira na Isireli, qai tukuna vei ira, ‘Na soqo+ nei Jiova sa loku oti tu moni kacivaka,+ era soqoni tabu. Qo na noqu soqo sa loku oti tu:

3 “‘E ono na siga me caka kina na cakacaka, ia ena ikavitu ni siga e siga ni vakacecegu,+ e soqoni tabu. Moni kua ni cakava kina e dua na cakacaka. Qo na siga ni vakacecegu vei Jiova ena vanua cava ga oni vakaitikotiko+ kina.

4 “‘Qo na soqo i Jiova sa dau loku oti tu, era soqo tabu, moni kacivaka ena kedra gauna lokuci: 5 Ena imatai ni vula, ena ika14 ni siga ni vula,+ ni sa karobo,* me caka na Lakosivia+ vei Jiova.

6 “‘Ena ika15 ni siga ni vula qo, sa na caka kina na Soqo ni Madrai Sega ni Vakaleveni vei Jiova.+ Moni kania na madrai sega ni vakaleveni me vitu na siga.+ 7 Ena imatai ni siga moni cakava e dua na soqoni tabu.+ Moni kua ni cakava kina e dua na cakacaka kaukaua. 8 Moni cabora vei Jiova na isoro ena bukawaqa me vitu na siga. Ena dua na soqoni tabu ena ikavitu ni siga. Moni kua ni cakava e dua na cakacaka kaukaua.’”

9 E vosa tale vei Mosese o Jiova, e kaya: 10 “Vosa vei ira na Isireli qai tukuna vei ira, ‘Ni oni sa yaco ena vanua au na solia vei kemuni, oni qai tamusuka na kena vuata, moni kauta vua na bete+ e dua na ivesu varile me isevu ni ka oni tamusuka.+ 11 Ena qai yalovaka o koya na ivesu qori ena mata i Jiova, moni vakadonui kina. Me yalovaka na bete ni oti ga na Siga ni Vakacecegu. 12 Ena siga oni yalovaka kina na ivesu varile, moni cabora e dua na luvenisipi tagane vinaka e yabaki dua, me isoro kama vei Jiova. 13 Na kena isoro kakana e rua na ikatini na efa* falawa vinaka sara e vakawaiwaitaki, qo na isoro e cabori ena bukawaqa vei Jiova e talei* na kena iboi. Ena kena isoro livi e dua na ikava na hini* waini. 14 Moni kua ni kania e dua na madrai, na covuata tavu se covuata vou me yacova na siga qo, me yacova na nomuni kauta mai na isoro ni nomuni Kalou. Qo na lawa tudei ena nomuni itabatamata kece, ena vanua cava ga oni tiko kina.

15 “‘Moni wilika e vitu na siga ni vakacecegu mai na siga e oti kina na Siga ni Vakacecegu, mai na siga oni a kauta kina na ivesu varile me isoro yalovaki.+ Me vitu taucoko na macawa. 16 Moni wilika me 50 na siga+ me yacova na siga sa oti kina na ikavitu ni Siga ni Vakacecegu, oti ni qai cabora vei Jiova e dua na isoro kakana vou.+ 17 Ni kauta mai nomuni vale e rua na ibuli madrai me isoro yalovaki. Me caka mai na rua na ikatini na efa* falawa vinaka sara. Me vakaleveni qai vavi,+ me isevu ni covuata vei Jiova.+ 18 Moni cabora vata kei na madrai e vitu na lami tagane vinaka e yabaki dua, e dua na luvenibulumakau tagane kei na rua na tamanisipi.+ Qori ena isoro kama vei Jiova, me cabori vata na isoro kakana kei na isoro livi, me isoro e cabori ena bukawaqa, me talei* vei Jiova na kena iboi. 19 Moni cabora e dua na luvenime me isoro ni ivalavala ca+ kei na rua na lami tagane yabaki dua me isoro ni veiyaloni.+ 20 Ena yalovaka na bete na rua na lami tagane kei na ibuli madrai e cabori me isevu ni covuata, me isoro e yalovaki ena mata i Jiova. Era ka tabu vei Jiova, me kena ivotavota na bete.+ 21 Moni kacivaka ena siga qo+ me dua na nomuni soqoni tabu. Moni kua ni cakava e dua na cakacaka kaukaua. Qo na lawa tudei ena vanua kece oni tiko kina, ena nomuni itabatamata kece.

22 “‘Ni oni tamusuka na vuata ni nomuni vanua, moni kua ni tamusuka kece na tutu ni nomuni were, kua tale ga ni tomika mai na vo ni ka e tamusuki.+ Moni biuta tu vei ira na dravudravua*+ kei koya e tiko vulagi.+ O yau o Jiova na nomuni Kalou.’”

23 E vosa tale vei Mosese o Jiova, e kaya: 24 “Tukuna vei ira na Isireli, ‘Ena ikavitu ni vula, ena imatai ni siga ni vula, moni cegu sara ga, na ivakananumi ena vakatakilakilataki ena uvuci ni biukila,+ qori e soqoni tabu. 25 Moni kua ni cakava e dua na cakacaka kaukaua, oni na cabora na isoro ena bukawaqa vei Jiova.’”

26 E vosa tale vei Mosese o Jiova, e kaya: 27 “Ia ena ikatini ni siga ni ikavitu ni vula e Siga ni Veibuluti.+ Me dua na nomuni soqoni tabu, moni vakararawataki* kemuni+ kina, ni qai cabora na isoro ena bukawaqa vei Jiova. 28 Moni kua ni cakava e dua na cakacaka ena siga qo, ni siga ni veibuluti moni sorovaki+ kina ena mata i Jiova na nomuni Kalou. 29 O koya ena sega ni vakararawataki koya* ena siga qo ena muduki laivi* vei ira na kainona.+ 30 O koya e cakava e dua na cakacaka ena siga qo, au na vakamatei koya laivi vei ira na kainona. 31 Moni kua ni cakava e dua na cakacaka. Qo na lawa tudei ena nomuni itabatamata kece, se mani vanua cava oni tiko kina. 32 E siga ni vakacecegu moni cegu sara ga kina, oni na qai vakararawataki kemuni+ ena ikaciwa ni siga ni vula ena yakavi. Moni vakatabuya na nomuni siga ni vakacecegu mai na dua na yakavi ina dua tale na yakavi.”

33 E vosa tale vei Mosese o Jiova, e kaya: 34 “Tukuna vei ira na Isireli, ‘Ena ika15 ni siga ni ikavitu ni vula qo, ena caka kina na Soqo ni Valetabanikau* vei Jiova,+ me vitu na siga. 35 Me dua na soqoni tabu ena imatai ni siga, moni kua tale ga ni cakava kina e dua na cakacaka kaukaua. 36 E vitu na siga moni cabora vei Jiova na isoro ena bukawaqa. Ena ikawalu ni siga me dua na nomuni soqoni tabu,+ moni qai cabora vei Jiova na isoro ena bukawaqa. Qo na soqo bibi. Moni kua ni cakava e dua na cakacaka kaukaua.

37 “‘Qo era soqo i Jiova sa loku oti tu,+ moni kacivaka nira soqoni tabu,+ me cabori kina na isoro ena bukawaqa vei Jiova: na isoro kama,+ na isoro kakana+ e cabori kei na isoro livi,+ me vaka ga na ituvatuva ni veisiga. 38 Qo mera ikuri ga ni isoro e dau cabori ena siga ni vakacecegu i Jiova,+ na nomuni iloloma,+ na nomuni isoro ni bubului,+ kei na isolisoli sega ni lavaki,+ e dodonu moni solia vei Jiova. 39 Ia ena ika15 ni siga ni ikavitu ni vula, ni oni sa kumuna na vuaniqele, moni cakava e dua na soqo vei Jiova me vitu na siga.+ E siga sara ga ni cegu+ na imatai ni siga kei na ikawalu ni siga. 40 Ena imatai ni siga, moni taura mai na vuata vinaka duadua, na drau ni niuniu,+ na taba ni vunikau e sobi na drauna kei na taba ni popila mai na buca,* oni na qai marau vakalevu+ ena mata i Jiova na nomuni Kalou me vitu na siga.+ 41 Oni na cakava qo me soqo vei Jiova me vitu na siga ena dua na yabaki.+ Qo na lawa tudei ena nomuni itabatamata kece, moni cakava qori ena ikavitu ni vula. 42 Moni tiko ena valetabanikau me vitu na siga.+ Mera tiko ena valetabanikau o ira kece ga na Isireli, 43 mera kila kina na nomuni itabatamata+ era muri mai niu a cakava mera tiko ena valetabanikau na Isireli niu kauti ira tani mai na vanua o Ijipita.+ O yau o Jiova na nomuni Kalou.’”

44 E mani vakamacalataka vei ira na Isireli o Mosese na soqo kece i Jiova sa loku oti tu na kedra gauna.