Vunau ni Soro

22 E vosa tale vei Mosese o Jiova, e kaya: 2 “Tukuna vei Eroni kei ira na luvena mera qarauna sara* na kena qaravi na veika tabu vei ira na Isireli, mera qai kua ni beca na yacaqu tabu+ ena vuku ni veika era vakatabuya me noqu.+ O yau o Jiova. 3 Tukuna vei ira, ‘Ke dua na nomuni kawa ena nomuni itabatamata kece, e lako volekata mai na veika tabu era vakatabuya vei Jiova na Isireli ni se dukadukali voli, me muduki laivi* mai mataqu+ na tamata oya. O yau o Jiova. 4 Me kua ni dua na kawa i Eroni e vukavuka+ se drodro mai yagona e dua na ka,+ me kania na ka tabu me yacova ni sa savasava+ tale, se o koya e tara e dua e dukadukali ni tara na tamata sa mate,+ se dua na tagane e bura nona wai,+ 5 se dua na tagane e tara na manumanu lalai+ dukadukali, se o koya e tara e dua na tagane e dukadukali ena cava ga, qai rawa ni vakavuna me dukadukali.+ 6 O koya e tara e dua na ka qori ena dukadukali tiko me yacova na yakavi, ena sega tale ga ni kania e dua na ka tabu, me qai sili o koya ena wai.+ 7 Ena savasava o koya ni sa dromu na siga, oti me qai kania eso na ka tabu, ni kena kakana qori.+ 8 Me kua tale ga ni kania na manumanu sa mate rawa tu, se dua na ka e basuraka na manumanu kila me dukadukali kina.+ O yau o Jiova.

9 “‘Mera yalodina ena nodra itavi vei au, mera kua kina ni valavala ca ena vuku ni ka tabu ra qai mate nira beca na veika tabu. O yau o Jiova, au sa vakatabui ira.

10 “‘Me kua ni dua na tamata e sega ni vakadonui* me kania na ka tabu.+ Me kua ni kania na ka tabu na kaitani e nona vulagi na bete, se na tamata cakacaka saumi. 11 Ke volia e dua na tamata na bete ena nona ilavo ga, e rawa ni kana kina na tamata qori. E rawa tale ga nira kania na kena kakana na bobula era sucu ena nona vale.+ 12 Ke vakawatitaka e dua e sega ni bete* na luvena yalewa na bete, me kua ni kania o yalewa qori na ka tabu era cautaki. 13 Ia ke sa yada se sere e dua na yalewa e luve ni bete, qai sega na luvena mani lesu ina vale i tamana me vaka ga na gauna se goneyalewa kina, e rawa ni kania eso na kakana kei tamana,+ ia me kua ni kania o koya e sega ni vakadonui.*

14 “‘Ke dua e kania vakacalaka na ka tabu, me vakuria e dua na ikalima ena kena isau qai solia vua na bete na ka tabu.+ 15 Mera kua gona ni beca na veika tabu e nodra na Isireli era cautaka vei Jiova+ 16 ra qai vakavuna mera totogitaki ena nodra cala, nira kania na ka tabu era cautaka, ni o yau o Jiova au vakatabui ira.’”

17 E vosa tale vei Mosese o Jiova, e kaya: 18 “Vosa vei Eroni, vei ira na luvena tagane, kei ira kece na Isireli, qai tukuna vei ira, ‘Ni dua na tagane ni Isireli se dua e tiko vulagi e Isireli, e cabora na isoro kama+ vei Jiova me vakayacora kina na nona bubului, se cakava e dua na isolisoli sega ni lavaki,+ 19 me cabora e dua na bulumakau tagane+ vinaka mai na qelenibulumakau, na me se luvenisipi tagane, me vakadonui kina. 20 Moni kua ni cabora e dua na manumanu e leqa tu e dua na tikina,+ ni oni na sega ni vakadonui kina.

21 “‘Ke dua na tamata e cabora na isoro ni veiyaloni+ vei Jiova me isau ni bubului se me isolisoli sega ni lavaki, me manumanu vinaka mai na qelenibulumakau se qelenisipi, me vakadonui kina. Me kua ni leqa e dua na tikina. 22 Me kua ni dua na isoro e mataboko, se ramusu, se mavoa, se tauvi somuna, se karokaro, se kara, moni kua ni cabora vei Jiova e dua na ka va qori, se cakava na isoro va qori vei Jiova ena icabocabonisoro. 23 E rawa ni oni cabora me nomuni isolisoli sega ni lavaki na bulumakau tagane se sipi e balavu sivia tu se lekaleka e dua na yavana, ia ena sega ni ciqomi me isoro ni bubului. 24 Moni kua ni cabora vei Jiova na manumanu e vakaleqai na nona soresore, se lauqaqi, se laudre laivi, se sele tani, ni kua tale ga ni vakacabora na manumanu va qori ena nomuni vanua. 25 Moni kua ni cabora e dua na ka va qori mai na ligadra na kaitani me cabori me kakana vua na nomuni Kalou, nira sa ca tu. Era na sega ni ciqomi.’”

26 E vosa tale vei Mosese o Jiova, e kaya: 27 “Ni sucu e dua na luvenibulumakau se luvenisipi tagane kei na dua na luvenime, ena tiko ga kei tinana me vitu na siga,+ ia mai na ikawalu ni siga lako yani ena ciqomi me isoro, na isoro e cabori ena bukawaqa vei Jiova. 28 Moni kua ni vakamatea vata ena dua ga na siga na bulumakau kei na luvena, se na sipi kei na luvena.+

29 “Ke oni cabora vei Jiova na isoro ni vakavinavinaka,+ moni cabora moni vakadonui kina. 30 Me laukana ena siga vata ga oya. Moni kua ni vakavoca e dua na tikina me yacova na mataka.+ O yau o Jiova.

31 “Moni dei ena noqu ivakaro, ni qai cakava sara.+ O yau o Jiova. 32 Moni kua ni beca na yacaqu tabu,+ meu qai vakarokorokotaki ena kedra maliwa na Isireli.+ O yau o Jiova, o koya e vakatabui kemuni,+ 33 o koya e kauti kemuni tani mai na vanua o Ijipita, meu vakadinadinataka kina vei kemuni niu Kalou.+ O yau o Jiova.”