iMatai ni iVola Vei Ira mai Korinia

16 Ena vuku ni cau me baleti ira na yalosavasava,+ moni cakava tale ga na ka au a vakaroti ira kina na ivavakoso e Kalatia. 2 Ena imatai ni siga kece e veimacawa, moni biuta vakatikitiki eso na ka me salavata kei na ka oni taukena, baleta niu yaco yani me kua tale na kumuni iyau. 3 Niu yaco yani, au na talai ira oni a vakatura na yacadra ena ivola,+ mera kauta i Jerusalemi na veika oni solia vakailoloma. 4 Ia ke veiganiti meu lako tale ga, keimami na qai veitomani.

5 Au na qai lako yani vei kemuni niu yaco i Masitonia, niu na muri yani va qori i Masitonia,+ 6 au na lai tiko e keri, de dua me oti sara na vulaililiwa, moni tomani au kina vakalekaleka ena noqu ilakolako. 7 Niu se sega ni via raici kemuni mada ena noqu ilakolako qo, niu vinakata meu dede vakalailai vei kemuni,+ ke vakatara o Jiova.* 8 Ia au na tiko mada e Efeso+ meu donuya na Soqo ni Penitiko, 9 baleta ni sa dola tu qo e mataqu e dua na katuba levu ni cakacaka,+ ia e levu na dauveitusaqati.

10 Ke yaco yani o Timoci,+ ni saga me douvaki kemuni, ni cakava tiko o koya na cakacaka i Jiova*+ me vakataki au ga. 11 O koya gona, me kua ni dua e beci koya. Ni talaci koya vakavinaka me rawa ni yaco mai vei au, ni keimami waraki koya tiko kei ira na mataveitacini.

12 Au a cikevi Apolosa+ na tacida me tomani ira na mataveitacini era na lako yani vei kemuni. Se sega ni lomana me lako yani qo, ena qai lako yani ena gauna sa na rawa kina.

13 Ni yadra tiko,+ ni tudei ena vakabauta,+ ni yaloqaqa,+ ni yatedei.+ 14 Na ka kece oni cakava me caka ena loloma.+

15 Qo na noqu vakamamasu vei kemuni raveitacini: Oni kila ni ratou isevu mai Akaia na vuvale i Sitifana, eratou dau qaravi ira tale ga na yalosavasava. 16 Moni vakamalumalumu tiko ga vei ira va qori, vei ira kece tale ga era dau veitokoni, kei ira na dau cakacaka vagumatua.+ 17 Ia au marau ni ratou tiko o Sitifana,+ o Forituneto, kei Akaiko, ni ratou kemuni isosomi ni oni yali. 18 Eratou vakabulabulataki au kei kemuni tale ga. O koya gona, ni dokai ira na tagane va ya.

19 Era loloma tu yani vei kemuni na ivavakoso kece e Esia.* E loloma tale tu ga yani vakabibi ena yaca ni Turaga o Akuila kei Pirisila, kei ira na lewe ni ivavakoso era dau soqoni ena nodrau vale.+ 20 Era sa loloma kece tu yani na mataveitacini. Ni veikidavaki ena iregu ni veitacini.

21 O yau o Paula, na iloloma kece qo e volai sara ga ena ligaqu.

22 Me cudruvi o koya yadua e sega ni lomana na Turaga. Neimami Turaga, ni lako mai! 23 Me nomuni mada ga na loloma soli wale ni Turaga o Jisu. 24 Au loloma tale ga yani vei kemuni kece na tisaipeli i Karisito Jisu.