Ruci
4 E lako cake sara o Poasa ina matamatanikoro+ me dabe kina. Kila na cava! E lako mai o koya a tukuna tiko o Poasa me veivoli lesu.+ E kaya o Poasa: “Gole mai mo mai dabe eke.” E gole yani o koya lai dabe sara. 2 Oti oya e kaciva mai o Poasa e tini na qase ni koro+ qai kaya: “Dou dabe eke.” Eratou dabe sara.
3 E qai kaya o Poasa vua na dauveivoli lesu:+ “Sa lesu mai o Neomai ena vanua o Moapi,+ ena volitaka na tikiniqele e nona na wekadaru o Elimeleki.+ 4 Au mani nanuma ni dodonu meu vakaraitaka vei iko, meu kaya, ‘Mo volia e matadra na lewenivanua kei ratou na qase ni kainoqu.+ Ke o na volia lesu, mo volia lesu ga. Ia ke o na sega ni volia lesu, mo tukuna vei au meu na kila, ni dodonu ga mo volia lesu, o yau au na taravi iko.’” E tukuna o koya: “Au sa tu vakarau meu volia lesu.”+ 5 E qai kaya o Poasa: “Ena siga o na volia kina na vanua mai vei Neomai, mo volia tale ga vei Ruci na yalewa ni Moapi, na watina na tagane sa mate me maroroi tiko ga kina na yaca ni tagane sa mate ena nona ivotavota.”+ 6 E kaya sara na dauveivoli lesu: “Au sa sega ni volia lesu rawa, deu na vakacacana na noqu ivotavota. Mo volia lesu me nomu na ka e dodonu meu volia lesu, niu sa sega ni volia lesu rawa.”
7 Ia qo na ivakarau ni veivoli lesu kei na veisau ena gauna makawa e Isireli, me vakadeitaki kina na ka kece e voli: Ena luvata e dua na nona ivava+ qai solia vua e dua tale, qo na ivakarau me vakadeitaki kina na veidinadinati e Isireli. 8 Ni tukuna gona vei Poasa na dauveivoli lesu, “Mo volia me nomu,” e luvata na nona ivava. 9 E qai kaya o Poasa vei ratou na qase kei ira kece na lewenivanua: “Oni sa vakadinadinataka+ nikua niu sa volia vei Neomai na ka kece e nei Elimeleki, kei na ka kece e nei Kilioni kei Maloni. 10 Au sa voli Ruci tale ga na yalewa ni Moapi na wati Maloni me watiqu, me maroroi kina na yaca ni tagane sa mate ena nona ivotavota,+ me kua ni yali na yaca ni tagane sa mate ena kedra maliwa na wekana, kei na matamatanikoro ena nona vanua. Oni kena ivakadinadina nikua.”+
11 Era mani kaya kece o ira na tu ena matamatanikoro kei ratou na qase: “Keimami sa ivakadinadina! Me lewa mada ga o Jiova na watimu e lako yani ina nomu vale me vakataki Raijeli kei Lia, erau tara na vuvale ni Isireli.+ Mo tubu e Efiraca,+ me rogo vinaka na yacamu e Peceliema.+ 12 Me vaka mada ga na vuvale i Feresi+ na nomu vuvale, o koya e vakasucuma o Tema vei Juta, mai na kawa ena solia vei iko o Jiova me vakasucuma na goneyalewa qo.”+
13 E kauti Ruci sara o Poasa me watina. E veiyacovi kei koya qai vakavuna o Jiova me kunekune, mani vakasucuma e dua na gonetagane. 14 Era qai tukuna na yalewa vei Neomai: “Me vakacaucautaki ga o Jiova ni vakarautaka vei iko nikua e dua me voli iko lesu. Me vakarogoi mada ga na yacana e Isireli! 15 E vakabulabulataki iko o koya,* e vakarautaka na ka ena yaga vei iko ni o sa qase, ni vakasucumi koya o vugomu e dau lomani iko,+ e yaga sara vei iko mai na vitu na luvemu tagane.” 16 E taura na gone o Neomai, e roqota e lomaserena qai susugi koya. 17 Era vakayacani koya na marama era tiko voleka. Era kaya, “Sa sucu e dua na gonetagane vei Neomai,” era vakayacani koya me o Opeti.+ E tamai Jese+ o koya, na tamai Tevita.
18 Ia qo na iyatukawa* nei Feresi:+ e tamai Esironi o Feresi,+ 19 e tamai Rami o Esironi, e tamai Aminatapi o Rami,+ 20 e tamai Nasoni o Aminatapi,+ e tamai Salimoni o Nasoni, 21 e tamai Poasa o Salimoni, e tamai Opeti o Poasa, 22 e tamai Jese o Opeti,+ e tamai Tevita o Jese.+