Vakatakila e Vola o Joni

15 Au raica e dua tale na ivakatakilakila mai lomalagi, e levu qai veivakurabuitaki, e vitu na agilosi+ kei na vitu na ka rarawa. Qo na iotioti ni ka rarawa me vakacavari kina na cudru ni Kalou.+

2 Au raica sara na ka e vaka na wasawasa iloilo+ e veiwaki kei na bukawaqa, au qai raici ira na qaqa+ vua na manumanu kila, na kena ivakatakarakara,+ kei na naba ni yacana,+ nira duri tu ena yasa ni wasawasa iloilo ra qai taura tu na api ni Kalou. 3 Era lagata tiko na sere i Mosese+ na dauveiqaravi ni Kalou kei na sere ni Lami+ ena nodra kaya:

“E cecere qai veivakurabuitaki na nomuni cakacaka,+ Jiova* na Kalou, oni Kaukaua Duadua.+ E dodonu, e dina na nomuni sala,+ na Tui ni veitabagauna.+ 4 O cei me sega ni rerevaki kemuni Jiova,* me vakalagilagia tale ga na yacamuni? Ni o kemuni duadua ga oni yalodina!+ Era na lako mai na veimatanitu mera sokalou e matamuni,+ ni sa vakatakilai na nomuni ivakaro dodonu.”

5 Oti qo au qai raica ni tadola mai lomalagi+ na rumu tabu ena valelaca ni vakadinadina,+ 6 eratou curu mai na rumu tabu na vitu na agilosi kei na vitu na ka rarawa,+ eratou tokara tu na lineni savasava e sekavula, qai oro na seredratou ena ioro koula. 7 E dua vei ratou na va na kabula e qai solia vei ratou na vitu na agilosi e vitu na boulu koula e sinai ena cudru ni Kalou,+ o koya e tawamudu na nona bula. 8 E mani robota na rumu tabu na kubou ena lagilagi ni Kalou+ kei na nona kaukaua, e sega ni dua e curuma rawa na rumu tabu me vakayacori mada na vitu na ka rarawa+ eratou taura tu na vitu na agilosi.