Lako Yani
32 Ena gauna vata qori era raica na tamata ni sa rui dede o Mosese, me siro mai na ulunivanua.+ Era mani soqoni vata yani na tamata vei Eroni ra qai kaya vua: “Tucake, cakava e dua na neimami kalou me liutaki keimami,+ ni keimami sega ni kila se cava sa manati koya na Mosese qo, na tagane e liutaki keimami tani mai na vanua o Ijipita.” 2 Mani kaya vei ira o Eroni: “Ucuna laivi na sau koula+ mai na daligadra na watimuni, na luvemuni tagane, kei na luvemuni yalewa, qai kauta mai vei au.” 3 Era mani ucuna laivi na tamata kece na sau koula e tu i daligadra ra qai kauta vei Eroni. 4 E taura mai vei ira na koula qai vakayagataka na iyaya ni ceuceu me cakava kina e dua na ivakatakarakara* ni luvenibulumakau.+ Era kaya: “Qo na nomu Kalou, i Isireli, o koya e liutaki iko tani mai na vanua o Ijipita.”+
5 Ni raica qo o Eroni, e tara e dua na icabocabonisoro ena mata ni luvenibulumakau. E qai kacivaka yani o Eroni: “E dua tiko na soqo vei Jiova nimataka.” 6 Era mani yadra vakamataka ena siga e tarava, ra qai tekivu cabora na isoro kama kei na isoro ni veiyaloni. Oti era dabe na tamata mera kana, mera gunu tale ga. Era qai tucake mera veilasamaki.+
7 E qai kaya vei Mosese o Jiova: “Lako sobu, nira sa vakadukadukalitaki ira na nomu tamata o liutaki ira tani mai na vanua o Ijipita.+ 8 E totolo wale ga nodra lako tani mai na sala au vakarota mera muria.+ Era sa cakava e dua na nodra ivakatakarakara* ni luvenibulumakau, era cuva tiko ga kina qai vakacaboisoro tiko kina, era kaya: ‘Qo na nomu Kalou, i Isireli, o koya e liutaki iko tani mai na vanua o Ijipita.’” 9 E kaya sara vei Mosese o Jiova: “Au sa raica ni o ira qo era tamata yalokaukaua.*+ 10 Laivi au mada, meu vakawabokotaki ira ena noqu cudru waqawaqa, au na qai cakava mo dua na matanitu levu.”+
11 E qai kerei* Jiova na nona Kalou o Mosese,+ e kaya: “Isa Jiova, na cava moni vagolea kina na nomuni cudru waqawaqa vei ira na nomuni tamata, ni oti na nomuni kauti ira tani mai na vanua o Ijipita ena kaukaua levu kei na ligamuni qaqa?+ 12 Na cava mera kaya kina na kai Ijipita, ‘E ca na inaki ni nona liutaki ira. E via vakamatei ira ena veiulunivanua qai vakawabokotaki ira mai na dela i vuravura’?+ Gole tani mai na nomuni cudru waqawaqa, qai vakasamataka tale* na nomuni vakatulewa moni kauta mai na leqa levu vei ira na nomuni tamata. 13 Ni nanumi Eparama, Aisake, kei Isireli na nomuni dauveiqaravi, ni oni bubului sara ga vei ratou qai kaya, ‘Au na vakalevutaka na nomudou kawa me vaka na kalokalo ni lomalagi,+ na vanua kece au sa digitaka qo au na solia vei ira na nomudou kawa, mera taura me iyau tudei.’”+
14 E qai vakasamataka tale* o Jiova na leqa levu e tukuna me yacovi ira na nona tamata.+
15 E vuki o Mosese qai siro mai na ulunivanua kei na rua na vatu raraba ni iVakadinadina+ e ligana.+ Na vatu raraba e volai na yasana ruarua, e volai tu na matana kei na dakuna. 16 Na vatu raraba erau we ni cakacaka ni Kalou, na volavola tale ga e volavola ni Kalou e ceuti ena vatu raraba.+ 17 Ni rogoca o Josua na maue ni tamata nira kaikaila voli, e kaya vei Mosese: “E rogo tiko mai na keba na rorogo ni ivalu.” 18 Ia e kaya o Mosese:
“E sega ni rorogo ni sere ni qaqa,
E sega tale ga ni rorogo ni osi ni druka,
Au rogoca na rorogo ni dua tale na mataqali sere.”
19 Ni volekata yani na keba o Mosese qai raica na luvenibulumakau+ kei na dadanisi, e waqa sara ga na nona cudru, e viritaka sobu mai ligana na vatu raraba, qai vorolaka ena ruku ni ulunivanua.+ 20 E taura na luvenibulumakau era cakava qai vakama ena bukawaqa, e qaqiraka me pauta,+ e kaburaka e delaniwai qai cakava mera gunuva na Isireli.+ 21 E kaya sara vei Eroni o Mosese: “Na cava era cakava vei iko na tamata qo, mo kauta mai kina vei ira na ivalavala ca bibi?” 22 E sauma o Eroni: “Kua ni katakata noqu turaga. Oni kila vinaka nira dau galeleta na ca o ira na tamata.+ 23 Era mani kaya vei au, ‘Cakava e dua na neimami kalou me liutaki keimami, ni keimami sega ni kila se cava sa manati koya na Mosese qo, na tagane e liutaki keimami tani mai na vanua o Ijipita.’+ 24 Au qai tukuna vei ira, ‘O koya ga e vakoula me ucuna laivi qai solia vei au.’ Au qai kolotaka ina bukawaqa, qai basika mai na luvenibulumakau qo.”
25 E raica o Mosese nira sa sega ni lewai ira rawa na tamata, ni laivi ira o Eroni mera sega ni lewai ira rawa, mera vakamadualaki kina e matadra na dautusaqati ira. 26 Sa qai duri o Mosese ena matamata ni keba qai kaya: “O cei e to ena yasa i Jiova? Lako mai vei au!”+ Era qai soqoni yani vua na Livai kece. 27 E qai kaya vei ira o koya: “Qo na ka e tukuna o Jiova na Kalou ni Isireli, ‘Moni vauca yadua na nona iseleiwau, qai veicuruyaki e loma ni keba, mai na dua na matamata ina dua tale na matamata, vakamatea na tacina, o koya erau tiko veitikivi, kei na nona itokani dredre.’”+ 28 Era cakava na Livai na ka e tukuna o Mosese. Era mate gona ena siga oya e rauta ni 3,000 na tagane. 29 E qai kaya o Mosese: “Ni vakatabui kemuni* nikua ena veiqaravi vei Jiova, ni oni sa saqata yadua na luvena tagane kei na tacina,+ ni na vakalougatataki kemuni nikua o koya.”+
30 Ena siga e tarava e kaya o Mosese vei ira na tamata: “Oni sa valavala ca bibi, ia qo au sa na lako cake vei Jiova, de dua na ka au rawa ni cakava me vosoti kina na nomuni ivalavala ca.”+ 31 E mani lesu vei Jiova o Mosese qai kaya: “Era sa valavala ca bibi o ira na tamata qo! Era cakava e dua na nodra kalou koula!+ 32 Ia qo ke oni yalorawarawa, ni vosota na nodra ivalavala ca,+ ke sega, yalovinaka, moni bokoci au laivi mai na nomuni ivola oni sa vola.”+ 33 Ia e kaya vei Mosese o Jiova: “O koya ga e valavala ca vei au, au na bokoci koya laivi mai na noqu ivola. 34 Lako, liutaki ira na tamata ina vanua au tukuna vei iko. Raica! Ena liu vei iko na noqu agilosi,+ ia na siga au na cakava kina na veilewai, au na totogitaki ira ena vuku ni nodra ivalavala ca.” 35 E qai kuitataki ira na tamata o Jiova nira cakava na luvenibulumakau, na kena a cakava o Eroni.