Sakaraia
13 “Ena siga oya ena keli e dua na toevu ina vuvale nei Tevita kei ira na lewe i Jerusalemi me vakasavasavataki kina na nodra ivalavala ca kei na nodra duka.+
2 “Ena siga oya,” e kaya o Jiova ni lewe vuqa,* “au na bokoca na yacadra na matakau mai na vanua,+ era na sega ni nanumi tale, au na kauti ira tani na parofita+ kei na kaukaua vakatimoni mai na vanua. 3 Ke dua e parofisai tale, erau na kaya vua o tamana kei tinana erau vakavuna nona sucu, ‘O na sega ni bula ni o tukuna na ka lasu ena yaca i Jiova.’ Erau na suaki koya o tamana kei tinana erau vakavuna nona sucu, ni parofisai tiko.+
4 “Ena siga oya era na maduataka na parofita yadua na nodra raivotu nira parofisai, era na sega ni tokara na isulu vutivutia+ ni parofita mera veivakacalai kina. 5 Ena kaya o koya, ‘Au sega ni parofita. Au dau teitei ga, ni a voli au e dua ena gauna au se gone kina.’ 6 Ke dua e tarogi koya, ‘Na cava e mavoa tu kina na tabamu?’* Ena kaya o koya, ‘Qo na we ni noqu mavoa ena nodra vale na noqu itokani.’”*
7 “Mo yadra, iseleiwau, mo mokuta noqu ivakatawa,+
Mokuta na tamata e noqu itokani,” e kaya o Jiova ni lewe vuqa.
8 “Ena vanua kece,” e kaya o Jiova,
“Ena muduki e rua na kena iwase mera mate,
Ena vo tiko ga na ikatolu ni iwase.
9 Au na kauta na ikatolu ni iwase ena bukawaqa,
Au na vakasavasavataki ira me vaka na vakasavasavataki ni siliva,
Au na vakatovolei ira me vaka na vakatovolei ni koula.+
Era na masuta na yacaqu,
Au na rogoci ira.
Au na kaya, ‘Era noqu tamata,’+
Era na kaya, ‘O Jiova na neimami Kalou.’”