Nodra Cakacaka na Yapositolo

19 Ni tiko voli e Korinica o Apolosa,+ a lako o Paula ina lomanivanua, lai siro sobu i Efeso.+ E kunea e kea eso na tisaipeli 2 mani tarogi ira: “A sobuti kemuni na yalo tabu ena gauna oni vakabauta kina?”+ Era kaya vua: “Keimami sega ni bau rogoca ni tiko na yalo tabu.” 3 E kaya: “Na papitaiso ga vakacava oni papitaiso kina?” Era kaya: “Na papitaiso i Joni.”+ 4 E kaya o Paula: “E veipapitaisotaki o Joni me ivakaraitaki ni veivutuni,+ e tukuna vei ira mera vakabauti koya ena muri koya yani,+ ya o Jisu.” 5 Nira rogoca qo, era papitaiso sara ena yaca ni Turaga o Jisu. 6 Ni tabaki ira o Paula e ligana, e sobuti ira na yalo tabu+ ra mani vosataka na vosa tale eso, ra parofisai tale ga.+ 7 E tiko e kea e rauta ni 12 taucoko na tagane.

8 E vula tolu nona dau vunau voli ena valenilotu.+ E vunautaka ena doudou na Matanitu ni Kalou qai veiuqeti na nona vosa.+ 9 Ia nira domoqa eso ra qai sega ni vakabauta, era vosavakacacataka Na Sala+ vei ira na ilala levu, e mani lako tani mai na kedra maliwa+ qai kauti ira na tisaipeli. E lai vunau tiko e veisiga ena valenisoqo ni koronivuli o Tirano. 10 E va tiko ya me rua na yabaki, ra mani rogoca kece kina na vosa ni Turaga na Jiu kei ira na kai Kirisi era tiko ena yasana kece o Esia.

11 E vakayacora tiko ga na Kalou na cakacaka veivakurabuitaki ena liga i Paula.+ 12 Era kauta sara mada ga na iqusinibuno kei na epereni i Paula ra qai lai solia vei ira na bikai tu ena veimataqali mate.+ E yali vakasauri na kedra mate, era dro tale ga na yalo velavela.+ 13 Ia eso na Jiu era dau veilakoyaki voli mera vakasavi timoni era bau via cavuta tale ga na yaca ni Turaga o Jisu vei ira na curumi yalo velavela nira kaya: “Au vakaroti kemuni ena yaca i Jisu o koya e dau vunautaka o Paula moni lako tani.”+ 14 Eratou dau cakava tiko na cakacaka ya e le vitu na luvei Siva, e dua na nodra iliuliu ni bete na Jiu. 15 Ia e qai sauma vei ratou na yalo velavela: “Au kilai Jisu,+ au kilai Paula tale ga,+ ia o cei o kemudou?” 16 E qai rikavi ratou yani na tagane e curumi koya tiko na yalo velavela, e vakamalumalumutaki ratou kece, ratou qai dui gutuwa luvawale* i tautuba, eratou mamavoavoa. 17 Era kila kece na Jiu kei ira na kai Kirisi era tiko e Efeso na ka e yaco ya. Era rere kece sara ga. Sa qai dokai tiko ga vakalevu na yaca ni Turaga o Jisu. 18 Era lako yani e levu era sa vakabauta mera lai vakatusa ra vakaraitaka tale ga e matanalevu na ka era dau cakava. 19 E levu sara ga na daucakaisausau era kauta yani na nodra ivola ra qai lai vakama e matadra kece.+ Era cakacakataka na kena isau kece e 50,000 na tikinisiliva. 20 Na ka qo e gumatua qai tete sara kina vakalevu na vosa i Jiova.*+

21 Ni oti kece ya sa qai nakita e lomana o Paula me lako i Masitonia,+ Akaia, me lako tale ga i Jerusalemi,+ e kaya: “Niu yaco i kea, au na lai rai tale ga i Roma.”+ 22 E mani talai Timoci+ kei Erasito,+ erau dau qaravi koya, me rau lako i Masitonia. Ia e tiko tale mada o koya ena yasana o Esia.

23 Dua na ka na nodra vakacacani+ na muria Na Sala ena gauna ya.+ 24 E dau buli ivakatakarakara siliva ni burekalou i Atemisi* e dua na matai ni siliva, na yacana o Timitirio. E ivurevure ni ilavo na cakacaka qo vei ira na vo ni matai.+ 25 E kumuni ira mai kei ira eso tale era dau cakacaka vata qai kaya: “Oni kila ni bisinisi qo eda sa rawati keda vinaka tiko kina. 26 Oni sa raica, oni rogoca tale ga nona uqeta qai veisautaka nodra rai e dua na ilala levu sara e Efeso+ kei na yasana kece o Esia na tamata qo o Paula, ni kaya ni sega ni wili me kalou na ka e caka ena liga.+ 27 E leqataki ni sa na beci na noda cakacaka, sa na vakawaletaki tale ga na valenisoro ni kalou yalewa lagilagi o Atemisi, sa na butuki sobu sara ga kina na kena irogorogo nira dau vakabekabea ena yasana kece o Esia vaka kina e vuravura taucoko.” 28 Nira rogoca qo, dua na ka na nodra cudru, era qai kailavaka: “E lagilagi ga o Atemisi na kalou ni Efeso!”

29 E yaco na tiko yavavala ena koro, ra tabili yani ina valenisarasara qai tuiraki Keio kei Arisitako,+ e rua na kai Masitonia erau dau salavata kei Paula. 30 A via curu i loma vei ira na lewenivanua o Paula, ia era tarovi koya na tisaipeli. 31 Eso mada ga vei ira na dau cicivaka na soqo kei na qito e kea era veikilai vinaka kei Paula, era vakauitukutuku vua ena nodra kerea me kua ni curu ina loma ni valenisarasara de leqa kina. 32 Sa dua na ka nodra veilecayaki na tiko ena loma ni valenisarasara, eso era kailavaka qo so era kailavaka e dua tale na ka, levu mada ga era sega ni kila se cava era lai cakava tu i kea. 33 Eso na Jiu era dreti Alekisada laivi vei ira na ilala levu, ra qai biligi koya yani i liu. E dodoka vei ira na ligana o Alekisada ena nona via vosa vei ira na lewenivanua. 34 Ia nira kila ni Jiu, era qai qolouvaka me rauta ni rua na aua na vosa qo: “E lagilagi o Atemisi na kalou ni Efeso!”

35 Ni sa vagalui ira rawa na ilala levu ya na turaganikoro, e kaya: “Kemuni na lewe i Efeso, o cei mada e lecava ni koro o Efeso e dau karona na valenisoro lagilagi i Atemisi kei na ivakatakarakara e lutu mai lagi? 36 E sega ni dua e vakalasuya rawa na tikina qo. Ni tauri kemuni ga vakamalua, ni kua ni yalototolo. 37 Oni sa kauti rau mai na tagane qo, erau sega mada ga ni butako ena valenisoro se me rau vosabeca na noda kalou yalewa. 38 Ke nanuma gona o Timitirio+ kei ira na vo ni matai, ni caka vei ira na ka e sega ni dodonu, sa tiko na siga ni veilewai kei na mata ni yasana me mai rogoci kina nodra kudru. 39 Ia ke tiko eso tale na ka oni beitaki rau kina, e dodonu me qai vakatulewataki ena dua na bose me vaka e vakarota na lawa. 40 E ca ga nida qai beitaki ena ka e yaco nikua nida via saqata na matanitu! E sega sara ga ni dua na yavu vakalawa e vakadonui kina na noda maue qo.” 41 Ni tukuna oti ya, sa qai kaya mera dui lako.