iKarua ni Tui
3 E tui Isireli o Jorami+ na luvei Eapi mai Samaria ena ika18 ni yabaki i Tui Josafati e Juta, e veiliutaki me 12 na yabaki. 2 E caka ca tiko ga ena mata i Jiova, ia e sega ga ni vakataki tamana se tinana, ni kauta tani na vatu ni sokalou i Peali e cakava o tamana.+ 3 E kabita tiko ga na ivalavala ca i Jerepoami na luvei Nipati, e vakavuna mera valavala ca kina na Isireli.+ E sega ni biuta na ka qori.
4 Ia o Mesa na tui Moapi e daususu sipi, e dau solia vei tui Isireli e 100,000 na lami kei na 100,000 na tamanisipi era sega ni koti.5 Ni mate ga o Eapi,+ e vorati tui Isireli na tui Moapi.+ 6 E biuti Samaria sara o Tui Jorami ena siga oya me soqoni ira na Isireli kece. 7 E talatala tale ga vei Tui Josafati e Juta, e kaya: “Sa vorati au o tui Moapi. O na tomani au me daru lai valuti Moapi?” E kaya o koya: “Au na lako.+ Edaru duavata o kedaru. Era duavata na noqu tamata kei na nomu tamata. E duavata na nomu ose kei na noqu ose.”+ 8 E taroga o koya: “Na sala cava meda muria cake?” E kaya mai: “Na sala ina vanua talasiga o Itomi.”
9 E qai lako na tui Isireli, na tui Juta, kei na tui Itomi.+ Ni oti e vitu na siga nodratou wavoki tiko, sa sega na medra wai na sotia kei na medra wai na manumanu era muri ira tiko. 10 E kaya na tui Isireli: “Sa ca dina! Sa kacivi kedatou na tolu na tui o Jiova me soli kedatou ina ligadra na Moapi!” 11 E kaya sara o Josafati: “E sega ni tiko eke e dua na parofita i Jiova me datou tarogi Jiova vua?”+ E mani sauma e dua na dauveiqaravi nei tui Isireli: “E tiko qo o Ilaisa+ na luvei Safati, e dau sova na wai ena liga i Ilaija.”*+ 12 E qai kaya o Josafati: “E tiko vua na vosa i Jiova.” E lako sobu sara vua o tui Isireli, o Josafati, kei na tui Itomi.
13 E kaya o Ilaisa vua na tui Isireli: “Me icavai vei au na nomu lako mai?+ Mo lako vei ira na parofita i tamamu kei ira na parofita i tinamu.”+ Ia e kaya vua na tui Isireli: “Sega, o Jiova e kacivi ratou na tolu na tui qo me soli ratou ina ligadra na Moapi.” 14 E kaya sara o Ilaisa: “Me vaka ni bula dina tiko o Jiova ni lewe vuqa* au qarava,* keu a sega ni dokai Tui Josafati+ e Juta, au na sega ni via raici iko se kilai iko.+ 15 Ia me kau mada mai vei au e dua na dauqiri api.”*+ Ena gauna ga e qiriqiri kina na dauqiri api, e yaco vua na liga i Jiova.+ 16 E kaya o koya, “Qo na ka e tukuna o Jiova: ‘Me keli e levu na ikeli ena buca* qo, 17 ni qo na ka e tukuna o Jiova: “Oni na sega ni raica na cagi, oni na sega tale ga ni raica na uca, ia ena sinai tu ga ena buca* qori na wai,+ oni na gunu kina, o kemuni, na nomuni manumanu laukana kei na vo ni nomuni manumanu.”’ 18 E sega ni dredre qori ena mata i Jiova,+ ena soli Moapi tale ga i ligamuni.+ 19 Moni vakavua na koro vakabai kece,+ na koro vinaka kece, moni taya na vunikau vinaka kece, moni bonota na waivure kece, moni vakacacana tale ga na tikiniqele vinaka kece ena vatu.”+
20 Ena gauna me cabori kina na isoro kakana ena mataka,+ sa drodro mai na wai ena yasana e gole i Itomi, e sinai na buca ena wai.
21 Era rogoca kece na kai Moapi ni ratou sa lako cake mai na tui me ratou valuti ira, era kacivi ira vata mai na tagane era rawa ni tauri iyaragi,* era lai duri sara ena iyala ni vanua. 22 Nira yadra ena matakalailai, e cilava na wai na matanisiga, era mani raica na kai Moapi mai tai kadua ni damudamu tu na wai me vaka na dra. 23 Era tukuna: “Qo na dra! Eratou sa veivakamatei ga vakataki ratou na tui ena iseleiwau. Ia qo Moapi, meda lai kauta mai na itokinivalu!”+ 24 Nira lako yani ena nodra keba na Isireli, era tucake na Isireli mera ravuti ira na kai Moapi ra mani drovaki ira.+ Era lako yani i Moapi ra qai ravuti ira na kai Moapi nira toso tiko. 25 Era basuka na koro kece, era dui kolotaka na vatu ena tikiniqele vinaka kece ra qai vakatawana ena vatu, era bonota na waivure kece,+ era taya na vunikau vinaka+ kece. E duri tu ga na bai kei Kiriereseci,+ era wavokita sara na daurabo mera rabota.
26 Ni raica na tui Moapi ni sa druka tiko ena ivalu, e kauta sara e 700 na tagane era vakaiseleiwau mera curu vakaukaua yani vei tui Itomi,+ ia era sega ni rawata. 27 E mani kauta o koya na luvena tagane ulumatua me sosomitaki koya ena veiliutaki qai cabora me isoro kama+ ena bai. Era cudruvi Isireli vakalevu, era mani biuti koya mera lesu ina nodra vanua.