Lako Yani

20 E qai tukuna na vosa kece qo na Kalou:+

2 “O yau o Jiova na nomu Kalou, au kauti iko tani mai na vanua o Ijipita, mai na vale ni veivakabobulataki.+ 3 Me kua ni dua tale na nomu kalou, o yau duadua ga.*+

4 “Mo kua ni cakava e dua na nomu ivakatakarakara ceuti se na ivakatakarakara ni dua na ka e tu ena lomalagi e cake se na vuravura e ra, se na wai e ruku i vuravura.+ 5 Mo kua ni cuva vei ira se bacani mo qaravi ira,+ ni o yau o Jiova na nomu Kalou, na Kalou e vinakata me qaravi duadua ga,+ au na tauca na kedra itotogi na tama vei ira na luvedra, ena ikatolu ni itabatamata kei na ikava ni itabatamata vei ira era cati au, 6 ia e dei tu ga na loloma au vakaraitaka vei ira na vica vata na udolu na itabatamata era lomani au, ra qai muria na noqu ivakaro.+

7 “Mo kua ni vakayagataka vakaveitalia+ na yaca i Jiova na nomu Kalou, ni o Jiova ena totogitaki koya e vakayagataka vakaveitalia+ na yacana.

8 “Dau nanuma na Siga ni Vakacecegu me vakatabui tiko ga.+ 9 Mo cakacaka qai cakava na ka kece o vinakata ena ono na siga,+ 10 ia na ikavitu ni siga e siga ni vakacecegu vei Jiova na nomu Kalou. Mo kua ni cakava kina e dua na cakacaka, o iko, se na luvemu tagane se luvemu yalewa, se na nomu tagane bobula se yalewa bobula, se na nomu manumanu, se na vulagi ena loma ni nomu itikotiko.*+ 11 Ni ono na siga nona bulia o Jiova na lomalagi kei na vuravura, na wasawasa kei na ka kece e tu kina, sa qai tekivu vakacegu o koya ena ikavitu ni siga.+ Qori na vuna e vakalougatataka kina o Jiova na Siga ni Vakacecegu qai vakatabuya.

12 “Rokova na tamamu kei na tinamu,+ me dede kina na nomu bula ena vanua e solia vei iko o Jiova na nomu Kalou.+

13 “Mo kua ni laba.+

14 “Mo kua ni veibutakoci.+

15 “Mo kua ni butako.+

16 “Mo kua ni lasutaka na kena itukutuku na kainomu ni o lai vakadinadina.+

17 “Mo kua ni vinakata na nona vale na kainomu. Mo kua ni domona na watina na kainomu,+ se vinakata na nona tagane bobula se nona yalewa bobula, se na nona bulumakau tagane se na nona asa, se dua tale na ka e taukena na kainomu.”+

18 Era sa qai vakadinata kece na tamata na kurukuru kei na tibi ni liva, na rorogo ni davui* kei na kubou ni ulunivanua, nira raica qo era sautaninini ra qai lai duri vakayawa.+ 19 Era mani kaya vei Mosese: “O iko ga mo vosa vei keimami, keimami na qai vakarorogo, ia me kua ni vosa vei keimami na Kalou, de keimami mate.”+ 20 E qai kaya vei ira na tamata o Mosese: “Kua ni rere, ni sa lako mai na Kalou dina me vakatovolei kemuni,+ moni dokai koya tiko ga moni kua kina ni valavala ca.”+ 21 Era qai duri tu ga mai vakayawa na tamata, ia e toro voleka yani o Mosese ina o loaloa e tiko kina na Kalou dina.+

22 E qai tukuna vei Mosese o Jiova: “Qo na ka mo tukuna vei ira na Isireli, ‘Oni a raica sara ga niu vosa vei kemuni mai lomalagi.+ 23 Moni kua ni cakava na kalou siliva me kequ ikuri, moni kua tale ga ni cakava eso na nomuni kalou koula.+ 24 Mo cakava vei au e dua na icabocabonisoro qele, o na qai cabora kina na nomu isoro kama kei na nomu isoro ni veiyaloni, na nomu sipi, kei na nomu bulumakau. Ena vanua kece ga au sa cakava me nanumi kina na yacaqu,+ au na lako yani kina vei iko, au na vakalougatataki iko tale ga. 25 Ke o cakava vei au e dua na icabocabonisoro vatu, mo kua ni tara ena vatu e ta.*+ Ke o vakayagataka kina na nomu jisili, o sa na vakadukadukalitaka. 26 Mo kua tale ga ni cabe ena ikabakaba ina noqu icabocabonisoro, me kua ni laurai kina na yagomu tabu.’*