iKarua ni Veigauna

31 Nira vakacavara ga na ka kece qo, era lako yani na Isireli taucoko ena koro e Juta, era vorovorolaka na vatu ni sokalou,+ era musuka na duru ni sokalou,*+ ra qai basuka na vanua cecere+ kei na icabocabonisoro+ e Juta kei Penijamini taucoko, vaka kina e Ifireimi kei Manasa+ mera vakarusa vakadua, oti era lesu kece na Isireli ina nodra koro, ina nodra dui ivotavota.

2 O Esekaia e qai lesi ira na bete ena nodra iwasewase+ kei na Livai ena nodra iwasewase,+ me vaka na nodra itavi yadua na bete kei na Livai,+ mera cabora na isoro kama kei na isoro ni veiyaloni, mera veiqaravi, mera vakavinavinaka, mera veivakacaucautaki tale ga ena matamata ni raranivale i Jiova.+ 3 E dua na iwase ni nona iyau na tui e soli me isoro kama,+ wili kina na isoro kama ena mataka kei na yakavi,+ na isoro kama tale ga ni Siga ni Vakacecegu,+ na vula vou,+ kei na soqo kece+ me vaka e volai ena Lawa i Jiova.

4 E vakaroti ira tale ga na tamata era tiko e Jerusalemi mera solia na nodra ivotavota na bete kei na Livai,+ mera muria vinaka kina na lawa i Jiova. 5 Ni tukuni oti ga na ivakaro, era solia mai na Isireli e levu sara na isevu ni covuata, na waini vou, na waiwai,+ na denioni, kei na vuaniqele kece,+ era kauta yani vakalevu na ikatini ni ka kece.+ 6 Era kauta tale ga yani na Isireli kei ira na Juta era tiko ena koro e Juta na ikatini ni bulumakau, na sipi, kei na ikatini ni ka e tabu+ e vakatabui me nei Jiova na nodra Kalou. Era kauta yani ra qai binia me levu na ibinibini. 7 Ena ikatolu ni vula+ era binia sara na nodra cau ra qai vakaotia ena ikavitu ni vula.+ 8 Ni lako yani o Esekaia kei ira na nona turaga vakaitutu mera raica na ibinibini, era vakacaucautaki Jiova ra qai vakavinavinakataki ira na nona tamata na Isireli.

9 Ni tarogi ira na bete kei na Livai o Esekaia me baleta na ibinibini, 10 e kaya vua o Asaraia na iliuliu ni bete ena vuvale i Setoki: “Ena gauna era tekivu kauta kina na cau ina vale i Jiova,+ era kana na tamata era mamau qai levu tale na ka e vo ni vakalougatataki ira na nona tamata o Jiova, mani levu tu qo na ka e vo.”+

11 E kaya sara o Esekaia me vakarautaki na rumuniyau*+ ena vale i Jiova, era mani vakarautaka. 12 Era kauta tiko ga yani ena yalodina na cau, na ikatini+ kei na ka e vakatabui, e lewa na cau o Kononaia na Livai me kena iliuliu, e taravi koya o Semeai na tacina. 13 Eratou lesi na italai o Jieli, o Asasaia, o Neaca, o Asaeli, o Jirimoci, o Josapati, o Ilieli, o Isimakaia, o Meaci, kei Penaia me ratou vukei Kononaia kei Semeai na tacina, me vaka na ivakaro nei Tui Esekaia kei Asaraia e lewa tiko na vale ni Kalou dina. 14 O Kore na luvei Imina na Livai e yadrava tiko na matamata ena tokalau,+ e lewa na isolisoli e sega ni lavaki me cabori+ vua na Kalou dina, me vota na cau e soli vei Jiova+ kei na isolisoli tabu sara.+ 15 Eratou vakarorogo vua o Iteni, o Miniamini, o Jesua, o Semaia, o Amaraia, kei Sekanaia ena nodra koro na bete,+ e nodratou itavi me ratou vota vakatautauvata vei ira na tacidratou ena nodra iwasewase,+ vei ira na qase kei ira na gone. 16 Qo na ikuri ni ka e votai vei ira na tagane mai na yabaki tolu lako cake era volai ena nodra iyatukawa, era lako ina vale i Jiova ena veisiga mera qarava na itavi ni nodra iwasewase.

17 Era volai na bete ena nodra iyatukawa na mataqali nei tamadra,+ kei ira na Livai era yabaki 20 lako cake+ me vaka na itavi ni nodra iwasewase.+ 18 E volai ena iyatukawa na luvedra kece, na watidra, na luvedra tagane, kei na luvedra yalewa, na nodra ivavakoso taucoko, nira vakasavasavataki ira ena ka e tabu ena vuku ni nodra itavi, 19 vaka kina na kawa nei Eroni, o ira na bete era tiko ena vanua veico volekata na nodra veikoro.+ Ena koro kece e cavuti na yacadra na tamata mera solia na ivotavota vei ira kece na tagane era bete kei ira kece na volai ena nodra iyatukawa na Livai.

20 E cakava qori o Esekaia e Juta taucoko, e vakayacora tiko ga na ka e vinaka, e donu, e yalodina tale ga ena mata i Jiova na nona Kalou. 21 Na sasaga kece e vakayacora me qara na nona Kalou, se na cakacaka ni vale ni Kalou dina+ se na Lawa kei na ivakaro, e qarava mai vu ni lomana qai rawa vinaka na nona sasaga.