iMatai ni Samuela

31 Era valuti ira tiko na Isireli na kai Filisitia.+ Era qai drovaki ira na kai Filisitia na Isireli, era balemate e levu e Ulu i Kilipoa.+ 2 Era volekati Saula tiko ga yani kei ratou na luvena o ira na kai Filisitia, era qai mokuti Jonacani,+ Epinatapi kei Malikisua, o ratou na luvei Saula.+ 3 E kaukaua sara na nodra valuti Saula, era raici koya na dau vanavana ra qai vakamavoataki koya vakaca na dau vanataka na dakaititi.+ 4 E tukuna sara o Saula vei koya e dau cola na nona iyaragi: “Ucuna mai na nomu iseleiwau mo suaki au de ra lako mai na tamata tawacili qo+ ra qai suaki au mera vakalolomataki au.” E sega ni via cakava qori o koya e dau cola na nona iyaragi ni rere vakalevu. E mani taura o Saula na iseleiwau qai suaki koya ga.+ 5 Ni raica o koya e dau cola na nona iyaragi ni sa mate o Saula,+ e suaki koya tale ga ena nona iseleiwau qai mate vata kei koya. 6 E mate gona o Saula, o ratou na tolu na luvena tagane, o koya e dau cola na nona iyaragi, kei ira kece na nona tamata ena siga oya.+ 7 Nira raica na Isireli era tiko ena buca kei ira era tiko ena yasayasa na Joritani nira sa dro na Isireli, ni sa mate tale ga o Saula kei ratou na luvena, era biuta sara na koro mera dro,+ era qai lako yani na kai Filisitia mera tawana.

8 Ena siga tarava nira lako yani na kai Filisitia mera kauta na ka era taukena na sa mate tu, era raici Saula sara kei ratou na luvena tagane ni ratou sa mate tu e Ulu i Kilipoa.+ 9 Era mani tamusuka na uluna, era kauta na nona iyaragi, ra qai talatala ina nodra vanua taucoko na kai Filisitia mera veitukuniyaka na itukutuku+ ena vale* ni nodra matakau+ kei ira na lewenivanua. 10 Era biuta sara na nona iyaragi ena vale era tu kina na ivakatakarakara nei Asetoreci, era vakaliliga tale ga na yagona ena bai e Pecisani.+ 11 Nira rogoca na lewe i Jepesikiliati+ na ka era cakava na kai Filisitia vei Saula, 12 era cavutu na tagane qaqa kece mera lako ena bogi taucoko oya mera kauta sobu na yago i Saula kei na yagodratou na luvena mai na bai e Pecisani. Era lesu i Jepesi ra qai vakamai ratou e kea. 13 Era kauta sara na suidratou+ mera buluta ena ruku ni vunitamarisi* e Jepesi,+ era qai lolo tiko me vitu na siga.