iMatai ni Samuela

23 E tukuni vei Tevita: “Era valuti Kila na kai Filisitia+ ra qai butakoca na rara ni butu covuata.” 2 E tarogi Jiova sara o Tevita:+ “Meu lako meu mokuti ira na kai Filisitia qo?” E kaya o Jiova vei Tevita: “Mo lai mokuti ira na kai Filisitia mo vakabulai Kila.” 3 Ia era kaya vei Tevita na nona tamata: “Raica! Keimami rere ni keimami tiko qo e Juta,+ qai wacava me keimami lako i Kila me keimami valuta na nodra mataivalu na kai Filisitia!”+ 4 E tarogi Jiova tale o Tevita.+ E kaya vua o Jiova: “Tucake mo lako sobu i Kila niu na soli ira na kai Filisitia e ligamu.”+ 5 E lako sara o Tevita kei ira na nona tamata i Kila ra qai valuti ira na kai Filisitia, e kauta na nodra manumanu o koya mani vakamatei ira ena veivakamatei levu, ia e vakabulai ira na lewe i Kila o Tevita.+

6 Ena gauna e dro kina o Epaiaca+ na luvei Eimeleki vei Tevita i Kila, e kauta tiko e dua na efoti. 7 E tukuni vei Saula: “E lako mai Kila o Tevita.” E kaya sara o Saula: “Sa soli* koya vei au na Kalou,+ e coriti koya ni lako ina koro e vakamatamata kei na ivakadei.” 8 E kacivi ira kece na tamata o Saula mera lako ina ivalu, mera lako sobu i Kila mera viribaiti Tevita kei ira na nona tamata. 9 Ni kila o Tevita ni veretaki koya tiko o Saula, e kaya sara vei Epaiaca na bete: “Kauta mai ke na efoti.”+ 10 E qai kaya o Tevita: “Kemuni Jiova na Kalou ni Isireli, e rogoca sara ga na nomuni tamata ni vinakata tiko o Saula me lako mai Kila me vakarusa na koro ena vukuqu.+ 11 Era na soli au i ligana o ira na iliuliu* e Kila? Ena lako sobu mai o Saula me vaka e rogoca na nomuni tamata? Kemuni Jiova na Kalou ni Isireli, yalovinaka, moni tukuna vua na nomuni tamata.” E kaya sara o Jiova: “Ena lako sobu yani.” 12 E taroga o Tevita: “Era na soli au kei ira na noqu tamata ina liga i Saula o ira na iliuliu e Kila?” E kaya o Jiova: “Era na soli kemuni.”

13 E tucake sara o Tevita kei ira na nona tamata, e rauta ni 600 na kedra iwiliwili,+ era biuti Kila ra qai lako ena veivanua era lako rawa kina. Ni tukuni vei Saula ni sa dro mai Kila o Tevita, e sega ni muri koya. 14 E tiko ga o Tevita ena veikau, ena vanua lakovi dredre, ena veiulunivanua ena veikau e Sifi.+ E vaqarai koya tiko ga o Saula,+ ia e sega ni soli koya e ligana o Jiova. 15 E kila* o Tevita ni vaqarai koya tiko o Saula me vakamatei koya ena gauna e tiko kina o Tevita ena veikau e Sifi mai Oresi.

16 E lako sara o Jonacani na luvei Saula vei Tevita e Oresi qai uqeti koya me nuitaka na kaukaua* i Jiova.+ 17 E kaya vua: “Kua ni rere ena sega ni kunei iko o Saula na tamaqu, ia o na nodra tui na Isireli+ au na qai taravi iko, e kila tale ga qori o Saula na tamaqu.”+ 18 Erau qai veiyalayalati+ ena mata i Jiova, e tiko ga e Oresi o Tevita, ia e lesu ina nona vale o Jonacani.

19 Oti era lako cake vei Saula i Kipea+ na lewe i Sifi, era kaya: “E vuni tiko o Tevita volekati keimami+ ena vanua lakovi dredre e Oresi+ ena delana o Ekaila,+ ena ceva* kei Jesimoni.*+ 20 Kemuni na tui, moni lako mai ena gauna e donu vei kemuni moni lako sobu mai, keimami na soli koya e ligamuni na tui.”+ 21 E kaya sara o Saula: “Me vakalougatataki kemuni mada ga o Jiova, ni oni nanumi au. 22 Yalovinaka ni lako, moni saga moni kila na vanua e tiko kina, se o cei e raici koya e kea, ni tukuni vei au ni qaseqase sara o koya. 23 Moni raica vinaka na vanua kece e dau vuni kina o koya, moni kauta lesu mai vei au na kena ivakadinadina. Au na qai lako vata kei kemuni, ke tiko ena vanua au na vaqarai koya ena kedra maliwa kece na vica vata na udolu* e Juta.”

24 Era mani biubiu mera lako i Sifi,+ era liu vei Saula ni se tiko o Tevita kei ira na nona tamata ena veikau e Maone+ ena Arapa,+ ena ceva kei Jesimoni. 25 Oti e lako o Saula kei ira na nona tamata mera vaqarai koya.+ Ni tukuni vei Tevita, e sega ni bera ni lako sobu ena vatu+ me lai tiko ena veikau e Maone. Ni rogoca qori o Saula e cicimuri Tevita yani ena veikau e Maone. 26 E tu o Saula ena yasa ni dua na ulunivanua, e tiko ena yasa ni ulunivanua adua o Tevita kei ira na nona tamata. E vakatotolo sara o Tevita me dro tani+ mai vei Saula, ia e volekati Tevita tiko ga yani kei ira na nona tamata o Saula kei ira na nona tamata mera vesuki ira.+ 27 Ia e lako mai vei Saula e dua na italai e kaya: “Ni vakatotolo mai nira sa ravuta tiko na vanua na kai Filisitia!” 28 E sega tale ni cicimuri Tevita+ o Saula, e lesu me lai ravuti ira na kai Filisitia. Qori na vuna e vakatokai kina na vanua oya me Vatu ni Veitalatala.

29 E qai lako cake mai kea o Tevita me tiko ena veivanua lakovi dredre e Eniketi.+