iMatai ni Samuela

26 Sa dede era qai lako na lewe i Sifi+ vei Saula e Kipea,+ era kaya: “Vakacava, e vuni tiko o Tevita ena delana o Ekaila donui Jesimoni?”*+ 2 E tucake sara o Saula me lako sobu ina veikau e Sifi kei na 3,000 na tagane digitaki ni Isireli, mera vaqarai Tevita ena veikau e Sifi.+ 3 E keba tiko o Saula ena delana o Ekaila donui Jesimoni ena batinisala. E tiko o Tevita ena veikau qai kila ni muri koya tiko yani o Saula ena veikau. 4 E tala sara eso na yamata o Tevita mera vakadeitaka ni lako dina tiko yani o Saula. 5 Oti e lako o Tevita ina vanua e keba tiko kina o Saula, e raica sara o Tevita na vanua e davo tiko kina o Saula kei Apineri+ na luvei Neri, na iliuliu ni nona mataivalu. E moce tiko ena loma ni keba o Saula kei ira na sotia era keba wavoliti koya tiko. 6 E qai kaya o Tevita vei Eimeleki na Itaiti+ kei na luvei Seruaia+ o Apisai,+ na taci Joapi: “O cei ena lako sobu vata kei au vei Saula ena keba?” E kaya o Apisai: “Au na lako sobu vata kei iko.” 7 E lako sara ena bogi o Tevita kei Apisai vei ira na sotia, erau raica ni moce tu o Saula ena loma ni keba qai coba tu ena qele na nona moto volekata na uluna, e davo wavokiti koya tu o Apineri kei ira na sotia.

8 E kaya sara vei Tevita o Apisai: “Sa solia nikua na Kalou na kemu meca e ligamu.+ Ia qo, yalovinaka meu cokai koya ga vakadua ena moto ina qele, au na sega ni vakaruataka.” 9 E kaya o Tevita vei Apisai: “Kua ni vakamatei koya, o cei me dodoka na ligana vua na lumuti i Jiova+ me qai sega ni cala?”+ 10 E kaya tale o Tevita: “Me vaka ni bula dina tiko o Jiova, ena mokuti koya ga o Jiova,+ se na yaco nona siga+ me mate kina, se na lako sobu ina ivalu me mate kina.+ 11 Ena rai i Jiova, au na sega tu ga ni dodoka na ligaqu vua na lumuti i Jiova!+ Me kau ga na moto e toka volekata na uluna kei na saqa wai me daru lako yani.” 12 E taura sara o Tevita na moto kei na saqa wai e toka volekata na ulu i Saula, rau lako yani. E sega ni dua e kila+ se raici rau, se yadrava nira moce kece tu, ni vakavuna o Jiova me bi na nodra moce. 13 E lako sara yani o Tevita ena yasana adua qai lai duri mai vakayawa ena dela ni ulunivanua, e yawa mai vei ira.

14 E qai kaci yani o Tevita vei ira na sotia nei Saula kei Apineri+ na luvei Neri, e kaya: “O na rogo mai, Apineri?” E sauma o Apineri: “O cei o iko mo kaciva na tui?” 15 E kaya vei Apineri o Tevita: “O iko na tagane? O cei e vakataki iko e Isireli? Na cava o sega ni yadrava tiko kina na nomu turaga na tui? Ni a lako yani e dua na sotia me vakamatea na nomu turaga na tui.+ 16 E sega ni vinaka na ka o cakava. Me vaka ni bula dina tiko o Jiova, e dodonu mo dou mate ni dou sega ni yadrava tiko na nomudou turaga, na lumuti i Jiova.+ Dou veiraiyaki! I vei na nona moto na tui kei na saqa wai+ a tiko volekata na uluna?”

17 E qai kila o Saula na domo i Tevita, e kaya: “Na domomu qori Tevita na luvequ?”+ E kaya o Tevita: “Io na domoqu ga, noqu turaga na tui.” 18 E kaya tale: “Na cava e cemuria tiko kina na nona dauveiqaravi na noqu turaga,+ na cava au cakava, na cava noqu cala?+ 19 Yalovinaka, me rogoca noqu turaga na tui na vosa ni nona dauveiqaravi: Ke uqeti kemuni o Jiova moni vorati au, me vakadonuya* mada o koya na isoro kakana au cabora. Ia ke ra uqeti kemuni na tamata,+ mera cudruvi ena mata i Jiova nira cemuri au nikua meu kua ni duavata kei na ivotavota i Jiova,+ era kaya, ‘Lako, lai qarava na kalou tani!’ 20 Ia qo moni kua ni vakadavea na noqu dra ina qele ena mata i Jiova, ni lako yani na tui Isireli me vaqara e dua na kutu+ me vaka ga ni vakasavi toa ni veikau ena veiulunivanua.”

21 E qai kaya o Saula: “Au sa valavala ca.+ Mo lesu mai na luvequ Tevita, au na sega ni caka ca tale vei iko, ni talei+ e matamu na noqu bula ena siga qo. Io, au sa cakacaka vakalialia, au sa cala vakalevu.” 22 E kaya o Tevita: “Qo na nona moto na tui. Me lako mai e dua na cauravou me mai kauta yani. 23 O Jiova ga ena sauma na noda dui yalododonu+ kei na noda yalodina, ni soli kemuni nikua o Jiova e ligaqu, ia au sega ni via dodoka na ligaqu vua na lumuti i Jiova.+ 24 Raica! Me vaka ga ni talei vei au na nomuni bula ena siga qo, me talei mada ga va qori na noqu bula ena mata i Jiova qai vakabulai au ena ka rarawa+ kece.” 25 E kaya vei Tevita o Saula: “Mo kalougata mada ga na luvequ Tevita. O na cakava sara ga na ka lelevu, o na rawata vinaka sara.”+ E qai lako yani o Tevita, e lesu o Saula ina nona itikotiko.+