iKarua ni Samuela

2 Oti qori e tarogi Jiova+ o Tevita, e kaya: “Meu lako cake ena dua na koro e Juta?” E kaya vua o Jiova: “Lako cake.” E qai taroga o Tevita: “Meu lako i vei?” E kaya o koya: “I Epironi.”+ 2 E lako cake sara e kea o Tevita kei rau na watina, o Einoami+ na yalewa ni Jesirieli kei Apikali+ na yada nei Nepali, na turaga ni Kameli. 3 E kauti ira tale ga na tagane era tiko vata kei koya+ o Tevita kei na nodra dui vuvale, era lai vakaitikotiko ena koro era tiko volekati Epironi. 4 Era qai lako mai na Juta mera lumuti Tevita e kea me nodra tui na Juta.+

Era tukuna vei Tevita: “Era buluti Saula na kai Jepesikiliati.” 5 E talatala sara o Tevita vei ira na kai Jepesikiliati, e kaya vei ira: “Me vakalougatataki kemuni mada ga o Jiova, ni dei nomuni lomana na nomuni turaga o Saula moni buluta.+ 6 Me dei mada ga nona lomani kemuni o Jiova, me yalodina vei kemuni. Au na yalovinaka tale ga vei kemuni ni oni cakava qo.+ 7 Me kaukaua mada ga na ligamuni, moni tamata yaloqaqa ni sa mate na nomuni turaga o Saula, era lumuti au na vuvale i Juta meu nodra tui.”

8 Ia o Apineri,+ na luvei Neri na iliuliu ni mataivalu i Saula, e kauti Isiposeci+ na luvei Saula i Meneimi+ 9 qai buli koya me nodra tui na Kiliati,+ o ira na Asari, o ira mai Jesirieli,+ mai Ifireimi,+ o ira na Penijamini, kei ira taucoko na Isireli. 10 E yabaki 40 o Isiposeci na luvei Saula ni buli me tui Isireli, e veiliutaki me rua na yabaki. O ira ga na vuvale ni Juta era tokoni Tevita.+ 11 E yabaki vitu vula ono+ na balavu ni gauna* e tui kina e Epironi o Tevita me lewa ena vuvale i Juta.

12 E qai biubiu mai Meneimi+ o Apineri na luvei Neri kei ira na dauveiqaravi nei Isiposeci na luvei Saula mera lako i Kipioni.+ 13 E lako tale ga yani o Joapi+ na luvei Seruaia+ kei ira na dauveiqaravi nei Tevita ra qai sotavi ira ena tobu e Kipioni. E dabe e dua na iwasewase ena yasa ni tobu qo, e dua tale na iwasewase ena yasa ni tobu oya. 14 E mani kaya o Apineri vei Joapi: “Mera tucake na cauravou mera vala* e matadaru.” E kaya sara o Joapi: “Mera tucake.” 15 Era mani tucake mera lako yani me vaka na kedra iwiliwili, e 12 na Penijamini kei na luvei Saula o Isiposeci, e 12 tale ga na dauveiqaravi nei Tevita. 16 Era veidre ulu ra qai suaka na sarisarina na kedra isa, era bale sobu vata kece. E mani vakatokai na vanua oya me o Elikaciasurimi, e tiko mai Kipioni.

17 E katakata sara na vala ena siga oya, e vakadrukai kina o Apineri kei ira na Isireli e matadra na dauveiqaravi nei Tevita. 18 Eratou tiko e kea e tolu na luvei Seruaia,+ o Joapi,+ o Apisai+ kei Asaeli,+ e yavatotolo o Asaeli me vaka na kaseli ni lomanivanua. 19 E cemuri Apineri o Asaeli, e sega ni gole ina imatau se ina imawi ni cicimuri Apineri tiko. 20 Ni rai muri o Apineri, e taroga, “O iko qori Asaeli?” e kaya yani, “Io, o yau.” 21 E kaya sara vua o Apineri: “Lako ina imatau se ina imawi, vesuka e dua na cauravou, taura na nona iyaragi me nomu.” Ia e sega ni via gole tani mai vua o Asaeli. 22 E kaya tale vei Asaeli o Apineri: “Kua ni cemuri au tiko. Na cava meu mokuti iko kina? Meu na raica vakacava na mata i Joapi na tuakamu?” 23 E bese tiko ga ni gole tani o koya, e qai suaka na ketena o Apineri ena dianimoto+ mani curubasikata na dakuna na moto, e lutu e kea, mani mate. O ira kece era lako yani ena vanua e lutu matemate kina o Asaeli, era dau tu vakadua mera cegu e kea.

24 Erau qai cicimuri Apineri o Joapi kei Apisai. Ni dromu na siga erau yaco ina delana o Ama donui Kia ena sala ina vanua talasiga e Kipioni. 25 Era soqoni vata na Penijamini mera tokoni Apineri, era soqoni mera dua na ilawalawa ra qai duri ena dua na delana. 26 E qai kacivaka vei Joapi o Apineri: “Ena ravuravu tiko na iseleiwau me sega ni mudu? O kila tiko ni na tini ga ena rarawa levu? Ena vakacava na kena dede mo qai tukuna vei ira na tamata mera kua ni cicimuri ira tiko na tacidra?” 27 E kaya sara o Joapi: “Me vaka ni bula tiko na Kalou dina, ke o sega ni vosa, era na tiko ga na tamata me yacova nimataka mera cicimuri ira tiko na tacidra.” 28 E qai uvuca o Joapi na biukila, e cegu na nodra cemuri ira tiko na Isireli na nona tamata mani oti na ivalu.

29 E taubale o Apineri kei ira na nona tamata ina Arapa+ ena bogi taucoko oya, era takosova na Joritani ra qai taubaletaka na vanua bucabuca* taucoko mera yaco sara i Meneimi.+ 30 Ni lesu mai o Joapi ena nona cicimuri Apineri, e soqoni ira vata na tamata. E yali e 19 na dauveiqaravi nei Tevita, vaka kina o Asaeli. 31 Ia o ira na dauveiqaravi nei Tevita era mokuti ira na Penijamini kei ira na tamata nei Apineri, era mate kina e 360 na nodra tamata. 32 Era kauti Asaeli,+ era buluta ena ibulubulu nei tamana e tiko e Peceliema.+ E qai taubale o Joapi kei ira na nona tamata ena bogi taucoko, ra qai yaco i Epironi+ ni sa rarama na vanua.