iKarua ni Samuela
3 E toso tiko ga na nodrau veivaluvaluti na vuvale nei Saula kei na vuvale nei Tevita, e kaukaua tiko ga o Tevita+ e malumalumu tiko ga na vuvale nei Saula.+
2 E sucu e Epironi eso na luvena tagane o Tevita.+ Na nona ulumatua o Aminoni+ na luvei Einoami+ na yalewa ni Jesirieli. 3 Na kena ikarua o Kiliapi, e luvena vei Apikali+ na yada nei Nepali na turaga ni Kameli, na kena ikatolu o Apisalome+ na luvei Meaka, na luvei Talimei+ na tui Kesuri. 4 Na kena ikava o Atonaija+ na luvei Akici, na kena ikalima o Sefataia na luvei Epitali.5 Na kena ikaono o Iciriami, e luvena vei Ekila na wati Tevita. Qo o ira na luvei Tevita era sucu e Epironi.
6 Ni veivaluvaluti tiko na vuvale i Saula kei na vuvale i Tevita, e vakaukauataka tiko ga o Apineri+ na nona itutu ena vuvale i Saula. 7 E dua na watina lailai o Saula, na yacana o Risipa,+ na luvei Eya. E qai kaya vei Apineri o Isiposeci:+ “Na cava o veiyacovi kina kei na watina lailai na tamaqu?”+ 8 E cudru vakalevu o Apineri ena vosa i Isiposeci, e kaya: “O yau na ulu ni koli ni Juta? Me yacova mai na gauna qo e dei tiko ga noqu lomani ira na vuvale i tamamu o Saula, o ira na tacina kei ira na nona itokani, au sega ni soli iko e liga i Tevita. Ia o qai beitaki au nikua niu cala kei na dua na yalewa. 9 Me vakayacora mada ga na Kalou vei Apineri me kuria tale ga, keu sega ni cakava vei Tevita na ka e bubuluitaka vua o Jiova:+ 10 me tokitaka na matanitu mai na vuvale i Saula qai vakataudeitaka na idabedabe vakaturaga i Tevita me lewai Isireli kei Juta mai Tani me yaco i Pieri-sepa.”+ 11 E sega sara ga ni sauma rawa na vosa i Apineri ni rerevaki koya.+
12 E tala sara eso na italai o Apineri vei Tevita, e kaya: “E nei cei na vanua?” E kaya tale: “Me daru veiyalayalati mada, au na cakava na ka kece* meu vukici ira taucoko na Isireli mera tokoni kemuni.”+ 13 E qai kaya o koya: “Sa vinaka! Au na veiyalayalati kei iko. E dua ga na ka au kerea vei iko, mo kua ni mai raica na mataqu vakavo ga ni o kauti Maikali+ mai na luvei Saula ni o mai raici au.” 14 E talai ira sara na italai o Tevita vei Isiposeci+ na luvei Saula, e kaya: “Mo solia mai na watiqu o Maikali, e musuki tu vei au ena 100 na kuliniyagodra vakatagane na kai Filisitia.”+ 15 E talatala sara o Isiposeci me lai kau mai o Maikali vei watina, o Palitieli+ na luvei Leisi. 16 Ia e taubale tiko ga vata kei koya o Palitieli na watina, e tagi voli ni muri koya tiko me yaco sara i Peurimi.+ E qai tukuna vua o Apineri: “Lako, lesu tale!” E mani lesu tale o koya.
17 E vakauitukutuku o Apineri vei ira na qase ni Isireli, e kaya: “Sa dua na gauna balavu oni vinakata tiko me nomuni tui o Tevita. 18 Qo moni yavala, ni tukuna o Jiova vei Tevita: ‘Ena liga i Tevita+ na noqu dauveiqaravi au na vakabulai ira na noqu tamata na Isireli mai na ligadra na kai Filisitia kei na ligadra na kedra meca kece.’” 19 E vosa vei ira na Penijamini+ o Apineri. E lai vosa duadua tale ga vei Tevita e Epironi me tukuna vua na ka kece era duavata kina na Isireli kei na vuvale taucoko i Penijamini.
20 Ni yaco yani i Epironi vei Tevita o Apineri kei na 20 na tamata, e caka magiti o Tevita vei Apineri kei ira na tamata era lako vata yani. 21 E qai kaya vei Tevita o Apineri: “Meu lako mada meu soqoni ira vata na Isireli vua na noqu turaga na tui, mera veiyalayalati kei kemuni, moni nodra tui o ira kece oni vinakata.” E mani talai Apineri o Tevita, e lako yani ena vakacegu.
22 Ena gauna qori era lesu mai na ivalu na dauveiqaravi nei Tevita kei Joapi, e levu sara na itokinivalu era kauta mai. E sega ni tiko vata kei Tevita e Epironi o Apineri ni talai koya yani ena vakacegu. 23 Ni yaco mai o Joapi+ kei ira kece na nona mataivalu, e tukuni sara vei Joapi: “E lako vua na tui o Apineri+ na luvei Neri+ qai talai koya yani na tui, e lako sara ena vakacegu.” 24 E mani lako vua na tui o Joapi, e kaya: “Na cava oni cakava? E lako mai vei kemuni o Apineri. Na cava oni vakatalai koya kina me lesu ena vakacegu? 25 Oni kilai Apineri vinaka na luvei Neri! E lako mai ke me dabui kemuni, me kila na nomuni veilakoyaki, me kila tale ga na ka kece oni cakava tiko.”
26 E biuti Tevita sara o Joapi, e tala eso na italai mera muri Apineri, era kauti koya lesu mai na mataniwai e Saira, ia e sega ni kila kina e dua na ka o Tevita. 27 Ni lesu mai Epironi+ o Apineri, e kauti koya sara vakatikitiki o Joapi ina loma ni matamata me vosa duadua ga vua. Ia e suaka e kea na ketena o Joapi me sauma na nona vakamatei* Asaeli +na tacina, mani mate o Apineri.+ 28 Ni qai rogoca e muri o Tevita, e kaya: “Au sega sara ga ni cala o yau kei na noqu matanitu ena mata i Jiova ena vakadavei ni dra+ nei Apineri na luvei Neri. 29 Me sauti Joapi+ ga kei na vuvale taucoko nei tamana na nona ivalavala. Me kua ni mudu ena vuvale nei Joapi na tamata e drodro mai na yagona tabu e dua na ka,+ se vukavuka,+ se na tamata e vakayagataka tiko na itokatoka ni waniculacula,* se dua e mate ena iseleiwau, se dua e viakana!”+ 30 E mani vakamatei Apineri+ o Joapi kei Apisai+ na tuakana ni a vakamatei Asaeli na tacidrau ena ivalu+ mai Kipioni.
31 E qai kaya o Tevita vei Joapi kei ira kece na tamata era tiko vata kei koya: “Moni dresulaka na nomuni isulu, ni vakaisulutaga moni yasovaki Apineri.” E muria tiko yani o Tui Tevita na tavata. 32 Era buluti Apineri e Epironi, e tagi ena domolevu na tui ena ibulubulu nei Apineri, era veitagicaki tale ga na tamata kece. 33 E lelevaki Apineri na tui, e kaya:
“Me mate o Apineri me vaka e mate e dua na tamata yalowai?
34 E sega ni vesu na ligamu,
E sega ni qamu na yavamu ena iqamu.*
O bale me vaka e dua e bale e matadra na daubasulawa.”*+
Era tagicaki koya tale na tamata kece.
35 Oti era lako kece mai na tamata mera solia na madrai ni veivakacegui* vei Tevita ni se siga na vanua, ia e bubuluitaka o Tevita: “Me vakayacora mada ga vei au na Kalou me kuria tale ga keu kania na madrai se dua tale na ka ni bera ni dromu na matanisiga!”+ 36 Era raica kece na tamata, era taleitaka. Era taleitaka na ka kece e cakava na tui. 37 Era qai kila kece ena siga oya na tamata kei ira kece e Isireli ni a sega ni vakavuna na tui na mate nei Apineri na luvei Neri.+ 38 E qai kaya na tui vei ira na nona dauveiqaravi: “Vakaevei, oni kila ni bale nikua e dua na turaga, e turaga rogo e Isireli?+ 39 Au sa malumalumu nikua, ia au lumuti meu tui,+ erau sa rui voravora vei au+ o rau na tagane qo, o rau na luvei Seruaia.+ Me sauma mada ga o Jiova na ca e cakava na dau caka ca.”+