iKarua ni Samuela

10 Oti e qai mate na nodra tui na Amoni,+ e tui sara o Anuni na luvena tagane me sosomitaki koya.+ 2 E mani kaya o Tevita: “Au na vakaraitaka na dei ni noqu lomani Anuni na luvei Neasi me vaka ga na dei ni nona lomani au o tamana.” E talai ira sara na nona dauveiqaravi o Tevita mera lai vakacegui koya ni sa mate o tamana. Ia nira yaco yani na dauveiqaravi nei Tevita ina nodra vanua na Amoni, 3 era kaya sara na nodra iliuliu na Amoni vei Anuni na nodra turaga: “O nanuma ni rokovi tamamu dina o Tevita me tala mai vei iko eso na dauveivakacegui? Vakaevei, era lako mai vei iko na dauveiqaravi nei Tevita mera vakaraica vinaka na koro, mera vakaraica lo, mera vukica?” 4 E mani kauti ira na dauveiqaravi nei Tevita o Anuni, e toroya veimama na kumidra,+ e kotiva veimama na nodra isulu e butadra qai vakatalai ira.5 Ni tukuni vei Tevita, e tala sara eso mera tavaki ratou ni ratou madua vakalevu. E qai kaya vei ratou na tui: “Dou tiko e Jeriko+ me tubu tale na kumimudou, dou qai lesu mai.”

6 Era qai raica na Amoni ni cati ira o Tevita, era mani talatala na Amoni mera saumi ira na kai Siria mai Peciriopi+ kei ira na kai Siria mai Sopa+ era le 20,000 na sotia era taubale, kei tui Meaka+ e 1,000 na tagane, mai Isitopi* e 12,000 na tagane.+ 7 Ni rogoca ga o Tevita e talai Joapi sara kei na mataivalu kece, wili kina o ira na nona tagane qaqa sara.+ 8 Era lako yani na Amoni mera tuva vakaivalu ena icurucuru ni matamatanikoro, ia era tiko ga vakataki ira ena veico o ira na kai Siria mai Sopa kei Riopi, o ira mai Isitopi kei Meaka.

9 Ni raica o Joapi nira sa toso mai na mataivalu e matana vaka kina e dakuna, e digitaka sara eso na sotia momoqaqa e Isireli qai tuvai ira vakaivalu mera vakasota kei ira na kai Siria.+ 10 E lesia na kena vo me lewa o* Apisai+ na tacina, me tuvai ira vakaivalu mera vakasota kei ira na Amoni.+ 11 E qai kaya: “Ke ra kaukaua sara vei au na kai Siria, mo mai vukei au, ia ke ra kaukaua sara vei iko na Amoni au na lako yani meu vukei iko. 12 Me daru kaukaua, me daru yaloqaqa+ ena vukudra na noda tamata kei na koro ni noda Kalou, ena qai vakayacora o Jiova na ka e vinaka e matana.”+

13 E lako yani o Joapi kei ira na nona ito mera valuti ira na kai Siria, era qai dro mai matana.+ 14 Nira raica ga na Amoni nira dro na kai Siria, era drovaki Apisai mera lako ina koro. Oti qori e lesu mai o Joapi vei ira na Amoni, e lako sara i Jerusalemi.

15 Nira raica na kai Siria nira sa druka vei ira na Isireli, era soqoni vata tale.+ 16 E qai talatala o Etateseri+ mera lako mai na kai Siria era tiko ena yasayasa ni Uciwai,*+ era qai lako i Elami, e liutaki ira yani o Sopaki na iliuliu ni mataivalu nei Etateseri.

17 Ni tukuni qori vei Tevita, e vakasoqoni ira sara na Isireli taucoko, era takosova na Joritani mera lako i Elami. Era tuva vakaivalu sara na kai Siria mera vakasota kei Tevita ra qai valuti koya.+ 18 Era qai drovaki ira na Isireli na kai Siria. E vakamatea o Tevita e 700 na dauvodo qiqinivalu, e 40,000 na kai Siria dauvodo ose, e mokuti Sopaki tale ga na iliuliu ni mataivalu mani mate e kea.+ 19 Nira raica na tui kece, o ira na dauveiqaravi nei Etateseri nira druka vei ira na Isireli, e totolo ga nodra soro vei ira na Isireli ra qai tekivu qaravi ira.+ Era rere na kai Siria mera vukei ira tale na Amoni.