iKarua ni Samuela

20 E tiko e kea e dua na dauvakacaca na yacana o Sipa,+ na luvei Pikirai na Penijamini. E uvuca na davui,*+ e kaya: “E sega na neimami tikina vei Tevita, e sega na neimami ivotavota vua na luvei Jese.+ Moni lesu kece na Isireli+ vua na nomuni kalou!”* 2 Era qai biuti Tevita kece na lewe i Isireli mera muri Sipa na luvei Pikirai,+ ia era muria tiko ga na lewe i Juta na nodra tui, mai na Joritani me yaco i Jerusalemi.+

3 Ni yaco o Tevita ina nona vale* e Jerusalemi,+ e kauti ratou na tini na watina lalai a biuta tu mai me ratou vakatawa na vale,+ qai biuti ratou ina dua na vale e yadravi tu. E vakarautaka tiko ga na kedratou, ia e sega ni veiyacovi kei ratou.+ Eratou sogo tu ga me yacova na siga eratou mate kina, eratou bula vakayada, ia se bula tiko na watidratou.

4 E kaya na tui vei Amasa:+ “Kacivi ira mai vei au na lewe i Juta ena loma ni tolu na siga, o iko tale ga mo duri tiko eke.” 5 E lako sara o Amasa me kacivi ira vata mai na lewe i Juta, ia e sega ni yaco yani ena gauna e lokuci vua. 6 E kaya sara vei Apisai+ o Tevita: “Ena levu sara na ca e cakava vei keda o Sipa+ na luvei Pikirai ni vakatauvatani kei na ka e cakava o Apisalome.+ Mo kauta eso na nona dauveiqaravi na nomu turaga, moni cicimuri koya me kua ni curuma eso na koro vakabai me drovaki keda kina.” 7 Era cicimuri koya sara na tamata i Joapi,+ o ira na kai Kireci, o ira na kai Pileci+ kei ira kece na tagane qaqa, era biuti Jerusalemi mera cicimuri Sipa na luvei Pikirai. 8 Nira volekata yani na vatu levu e tiko e Kipioni,+ e lako sara yani o Amasa+ me tavaki ira. E vakaisulu ni ivalu o Joapi, e vesu toka e tolona e dua na iseleiwau e tawa tiko ena kena taga. Ni toso yani i liu qai lutu mai tuba na iseleiwau.

9 E kaya sara o Joapi vei Amasa: “O bula vinaka tiko taciqu?” E tara sara na kumi Amasa o Joapi ena ligana imatau me vaka ga ni reguci koya. 10 E sega ni vakarau tu o Amasa me taqomaki koya mai na iseleiwau ena liga i Joapi, e mani suaka na ketena+ o Joapi qai kasabura ina qele na nona wawa. E sega ni suaki koya vakarua, e suaki koya ga vakadua mani mate sara. Erau qai cicimuri Sipa na luvei Pikirai o Joapi kei Apisai na tacina.

11 E lai duri tu ena yasai Amasa e dua na cauravou i Joapi, e kaya tiko: “Me muri Joapi o koya e totaki Joapi, e nei Tevita tale ga!” 12 E davoca tu ga na nona dra o Amasa ena gauna kece qori ena lomadonu ni gaunisala. Ni raica na tagane qori nira mai tu vakadua na tamata, e qai kauti Amasa tani mai gaunisala ina lomanivanua. Oti e ubi koya ena dua na isulu ni raica nira tu vakadua kece na lako cake tiko yani vua. 13 Ni kauti koya tani mai gaunisala, era muri Joapi kece mera cicimuri Sipa+ na luvei Pikirai.

14 E lakosivita sara o Sipa na yavusa kece e Isireli me yaco i Epeli Pecimaka.+ Era kumuni vata kece na luvei Pikirai mera muri koya tale ga.

15 E lako yani o Joapi kei ira na nona tamata mera viribaiti koya e Epeli Pecimaka, era binia tale ga na nuku mera valuta kina na koro. Era qai kelikeli kece na tiko vata kei Joapi mera vakabalea na bai. 16 E kaci sara mai ena koro e dua na marama yalomatua: “Moni vakarorogo mada, ni vakarorogo mada! Au kerea moni tukuna vei Joapi, ‘Mo lako voleka mai meu vosa mada vei iko.’” 17 E mani lako voleka yani vua, e kaya sara na marama: “O iko o Joapi?” E kaya yani: “O yau qo.” E kaya sara vua na marama: “Mo rogoci au mada na nomuni dauveiqaravi.” E kaya o Joapi: “Au sa vakarorogo tiko.” 18 E kaya tale na marama: “Era dau kaya e liu: ‘Mera taro ivakasala ena koro o Epeli, ena qai wali kina na nodra leqa.’ 19 Au matataki ira era dauveiyaloni kei ira na yalodina e Isireli. Ia o iko o via vakarusa na koro e vaka na tina e Isireli. Na cava mo vakawabokotaka* kina na ivotavota i Jiova?”+ 20 E sauma o Joapi: “Au na sega tu ga ni vakawabokotaka se vakarusa. 21 E sega ni va qori. Ia e dua na turaga na yacana o Sipa+ na luvei Pikirai mai na ulunivanua e Ifireimi+ e saqati* Tui Tevita. Ke oni solia mai na tamata qo au na qai biuta na koro.” E kaya sara na marama vei Joapi: “Raica! Ena viritaki yani vei iko na uluna ena bai!”

22 E lako sara na marama yalomatua vei ira kece na lewenivanua, era mani tamusuka na ulu i Sipa na luvei Pikirai ra qai viritaka yani vei Joapi. E uvuca sara o Joapi na davui ra qai tawase mai na koro mera dui lako ina nodra vale,+ e lesu vua na tui i Jerusalemi o Joapi.

23 E liutaka o Joapi na mataivalu kece ni Isireli,+ e liutaki ira na kai Kireci kei ira na kai Pileci+ o Penaia+ na luvei Jioiata.+ 24 E liutaki ira na cakacaka vua na tui o Etorami,+ e dauvola na ka ni matanitu o Josafati+ na luvei Ailute. 25 E vunivola o Seva, erau bete o Setoki+ kei Epaiaca.+ 26 E dauveiqaravi turaga* tale ga i Tevita o Aira na luvei Jairi.