iKarua ni Samuela

21 E tolu na yabaki veitaravi na dausiga+ ena gauna i Tevita, e qai tarogi Jiova o Tevita mani kaya o Jiova: “E cala o Saula kei na nona vuvale nira vakadavedra, ni a vakamatei ira na kai Kipioni.”+ 2 E kacivi ira mai na kai Kipioni+ na tui me vosa vei ira. (Era sega ni Isireli na kai Kipioni, ia era ivovo ni Amoraiti,+ era bubuluitaka na Isireli nira na vakabulai ira,+ ia e via valuti ira o Saula ni sega sara ga ni taleitaka mera veimaliwai kei ira na Isireli kei ira na Juta.) 3 E kaya o Tevita vei ira na kai Kipioni: “Na cava meu cakava vei kemuni, na cava meu sorovaka moni vosa vakalougatataka kina na ivotavota i Jiova?” 4 Era kaya vua na kai Kipioni: “Keimami sega ni vinakata na siliva kei na koula+ ena ka e vauci Saula kei na nona vuvale, keimami sega tale ga ni via vakamatea e dua e Isireli.” E kaya o koya: “Au na vakayacora vei kemuni na ka kece ga oni tukuna.” 5 Era kaya vua na tui: “O koya e vakawabokotaki keimami, e nakita me vakarusai keimami me keimami kua ni tiko ena dua na nodra vanua na Isireli,+ 6 me soli vei keimami e vitu na luvena tagane. Keimami na vakaliliga na yagodratou mate*+ e mata i Jiova mai Kipea+ nei Saula na digitaki i Jiova.”+ E kaya sara na tui: “Au na soli ratou.”

7 Ia na tui e lomani Mefiposeci+ na luvei Jonacani na luvei Saula ena vuku ni bubului erau cakava ena mata i Jiova o Tevita kei Jonacani+ na luvei Saula. 8 E mani kauta na tui e rua na luvena tagane o Risipa+ na luvei Eya, o Eromoni kei Mefiposeci, erau luvena vei Saula, kei na lima na luvena tagane o Maikali*+ na luvei Saula, eratou luvena vei Atirieli+ na luvei Pasilai na kai Meola. 9 E soli ratou sara vei ira na kai Kipioni, eratou qai vakaliliga na yagodratou mate ena ulunivanua ena mata i Jiova.+ Eratou mate vituvitu ena dua ga na gauna, eratou vakamatei ena imatai ni siga ni tatamusuki ni se qai tekivu tamusuki na varile. 10 E kauta sara na isulutaga o Risipa+ na luvei Eya qai tevuka ena delanivatu ena itekitekivu ni tatamusuki me tauca na uca mai lomalagi na yagodratou, e sega ni vinakata mera mai rovi ratou na manumanuvuka ni lomalagi ena siga, se me volekata yani na manumanu kila ni vanua ena bogi.

11 E tukuni vei Tevita na ka e cakava o Risipa na luvei Eya na watina lailai o Saula. 12 E lako sara o Tevita vei ira na iliuliu* e Jepesikiliati+ me kauta mai na sui nei Saula kei Jonacani na luvena era butakoca ena vanua lala e Pecisani, na vanua era vakaliligi rau kina ena siga era mokuti Saula kina e Kilipoa+ na kai Filisitia. 13 E kauta cake mai kea na sui nei Saula kei na sui nei Jonacani na luvena, era kumuna tale ga mai na suidratou na tagane eratou vakaliligi.*+ 14 Era buluta sara na sui nei Saula kei Jonacani na luvena ena nodra vanua na Penijamini e Selea,+ ena ibulubulu i Kisi+ na tamana. Nira vakayacora oti na ka kece e vakarota na tui, e rogoca sara na Kalou na nodra kerekere ena vuku ni vanua.+

15 Era mai vala tale na kai Filisitia kei ira na Isireli.+ E lako sobu sara o Tevita kei ira na nona dauveiqaravi mera valuti ira na kai Filisitia, e oca sara ga kina o Tevita. 16 E mani nanuma o Isipipinopi e dua na kawa ni Refeimi+ me mokuti Tevita, na bibi ni nona moto kopa e 300 na sikeli,*+ e vakaiyaragi ena dua na iseleiwau vou. 17 Sega ni bera ni mai vukei koya+ o Apisai+ na luvei Seruaia me mokuta na kai Filisitia me mate sara. Ena gauna oya era qai cavuta na bubului qo vei Tevita na nona tamata: “Moni kua tale ni lako vata kei keimami ina ivalu!+ Moni kua ni bokoca na cina e Isireli!”+

18 Oti qori e tubu tale na ivalu kei ira na kai Filisitia+ e Kopo. Ena gauna qori e qai mokuti Safi e dua na kawa ni Refeimi+ o Sipikei+ na luvei Usa.

19 E tubu tale na ivalu kei ira na kai Filisitia+ e Kopo, qai mokuti Koliaci na kai Kaca o Elenani na luvei Jereorikimi na kai Peceliema, na dia ni nona moto e vaka na kau ni dautali isulu.+

20 Ia e tubu tale na ivalu mai Kaca, e tiko kina e dua na tagane levu sara e ono na iqaqaloniligana ruarua, e ono na iqaqaloniyavana ruarua, e 24 taucoko, e dua tale ga na kawa ni Refeimi+ o koya. 21 E bolei Isireli+ tiko ga o koya. E qai mokuti koya o Jonacani na luvei Semeai+ na tuakai Tevita.

22 Eratou kawa ni Refeimi mai Kaca na le va qo, eratou qai bale e liga i Tevita kei na ligadra na nona dauveiqaravi.+