Isikeli
11 E laveti au e dua na yalo me kauti au ina matamata ni vale i Jiova ena tokalau e qara ina tokalau.+ Au raica e 25 na tagane ena matamata e kea, e maliwai ira tiko o Jesanaia na luvei Asura kei Pilataia na luvei Penaia, o rau na nodra turaga na lewenivanua.+ 2 E qai kaya vei au o koya:* “O iko na luve ni tamata, era nakita tiko na ka ca na tagane qo qai ca na nodra ivakasala vei ira na lewenikoro qo. 3 Era kaya tiko, ‘Qo na gauna ni tara vale.+ E kuro ni vakasaqa* na koro* qo,+ o keda na lewena.’
4 “O koya gona mo parofisaitaka vei ira na ka ca. Mo parofisai o iko na luve ni tamata.”+
5 E qai sobuti au na yalo i Jiova,+ e kaya vei au: “Mo kaya, ‘Qo na ka e kaya o Jiova: “E dina na ka oni tukuna na vuvale ni Isireli, au kila na ka oni nanuma tiko.* 6 Oni vakavuna mera mate e levu ena koro qo, oni vakasinaita na mate ena kena gaunisala.”’”+ 7 “Qo na ka e kaya na Turaga Cecere Duadua o Jiova: ‘Na yago mate oni veibiuyaka ena koro, oya na lewena, na koro na kuro ni vakasaqa.+ Ia oni na kau tani sara ga mai kina.’”
8 “‘Au na kauta yani vei kemuni na iseleiwau oni rerevaka+ kei na dua na iseleiwau,’ e kaya na Turaga Cecere Duadua o Jiova. 9 ‘Au na kauti kemuni tani mai kea meu soli kemuni vei ira na vulagi mera totogitaki kemuni.+ 10 Oni na bale ena iseleiwau.+ Au na lewai kemuni ena iyalayala kei Isireli,+ oni na qai kila ni o yau o Jiova.+ 11 Na koro qo ena sega ni kuro ni vakasaqa vei kemuni, ia o kemuni oni na sega ni lewenikuro, au na lewai kemuni ena iyalayala kei Isireli, 12 oni na qai kila ni o yau o Jiova. Ni oni sega ni muria na noqu ivakaro, oni sega ni vakayacora na noqu lewa,+ ia oni vakayacora ga na nodra lewa na veimatanitu era wavokiti kemuni.’”+
13 Ena gauna ga au parofisai oti kina, e mate o Pilataia na luvei Penaia, au mani davo vakatoboicu meu tagi ena domolevu: “Oilei kemuni na Turaga Cecere Duadua Jiova! Oni na vakawabokotaki ira na vo tiko e Isireli?”+
14 E vosa tale vei au o Jiova: 15 “O iko na luve ni tamata, era kaya na lewe i Jerusalemi vei ira na wekamu, io o ira na wekamu e tiko na nodra dodonu mera volia lesu na qele, kei ira taucoko na vuvale ni Isireli, ‘Moni yawaki Jiova. Sa neimami na vanua, e soli me neimami.’ 16 Ia mo kaya, ‘Qo na ka e kaya na Turaga Cecere Dua dua o Jiova: “Au biuti ira vakayawa ina veimatanitu, au vakasavi ira tale ga ina veivanua,+ ena dua ga na gauna lekaleka qo au na nodra ivunivuni ena veivanua era lako kina.”’+
17 “Mo tukuna, ‘Qo na ka e kaya na Turaga Cecere Duadua o Jiova: “Au na kumuni kemuni mai vei ira na lewe ni veivanua, au na soqoni kemuni tale ga mai na veivanua oni vakasavi kina, au na solia vei kemuni na vanua o Isireli.+ 18 Era na lesu kina, era na kauta tani mai kea na nodra ka vakasisila kece kei na nodra itovo vakasevaki.+ 19 Au na vakalomavatataki ira,+ au na tugana e lomadra e dua na yalo vou,+ au na kauta tani e yagodra na yalovatu,+ au na solia vei ira na yalo malumu,*+ 20 mera muria na noqu ivakaro, mera kila tale ga na noqu lewa mera muria sara. Era na qai noqu tamata, au na nodra Kalou.”’
21 “‘“Ia o ira e guta na lomadra mera muria tiko ga na nodra ka vakasisila kei na nodra itovo vakasevaki, au na sauma vei ira* na nodra ivalavala,” e kaya na Turaga Cecere Duadua o Jiova.’”
22 Eratou laveta na jerupi na tabadratou, e toka volekati ratou ga na yavaniqiqi,+ e vakaruguti ratou na lagilagi ni Kalou ni Isireli.+ 23 E mani toso cake na lagilagi i Jiova+ mai na koro, e lai tu vakadua ena ulunivanua ena yasa ni koro ena tokalau.+ 24 E qai laveti au e dua na kabula vakayalo me kauti au vei ira na vesu tu mai Kalitia, ena raivotu e vakaraitaki vei au ena kaukaua ni Kalou. E mani oti e kea na noqu raivotu. 25 Au tukuna sara vei ira na vesu tu na ka kece e vakaraitaka vei au o Jiova.