Isikeli

37 E tiko vei au na liga i Jiova, e kauti au sara na yalo i Jiova me vakatikori au ena loma ni buca+ e sinai tu kina na sui. 2 E kauti au wavokita, au mani raica ni levu sara na sui e tu ena buca, era mamaca sara.+ 3 E tarogi au o koya: “O iko na luve ni tamata, ena rawa ni bula tale na sui qo?” Au mani kaya: “Kemuni na Turaga Cecere Duadua Jiova, o kemuni ga oni kila.”+ 4 E kaya vei au: “Mo parofisai vei ira na sui qo, mo kaya vei ira, ‘Kemuni na sui mamaca, moni rogoca na vosa i Jiova:

5 “‘Qo na ka e kaya na Turaga Cecere Duadua o Jiova ina sui qo: “Au na solia vei kemuni na icegu, oni na bula kina.+ 6 Au na solia vei kemuni na ua kei na viciko, au na ubi kemuni ena kuli, au na solia vei kemuni na icegu oni na bula kina. Oni na qai kila ni o yau o Jiova.”’”

7 Au mani parofisai me vaka ga e tukuni vei au. Niu parofisai oti ga, au rogoca sara e dua na rorogo, na tataqiriqiri, era veitorovi na sui, na sui ina sui. 8 Au raica sara ni tubu mai kina na ua kei na viciko qai ubi ira na kuli. Ia era se sega ga ni cegu.

9 E kaya tale vei au: “Mo parofisai ina cagi. Mo parofisai o iko na luve ni tamata, mo kaya ina cagi, ‘Qo na ka e kaya na Turaga Cecere Duadua o Jiova: “O iko cagi,* mo lako mai ena matanicagi vava, mo liwavi ira era vakamatei qo mera bula.”’”

10 Au mani parofisai me vaka e tukuna vei au o koya, e curumi ira na icegu, era bula, era mani tucake e yavadra,+ e dua na mataivalu levu.

11 E qai kaya vei au o koya: “O iko na luve ni tamata, na sui qo na vuvale taucoko ni Isireli.+ Era kaya tiko, ‘Sa mamaca na suida, sa yali na noda inuinui.+ Eda sa muduki vakadua.’ 12 Mo parofisai gona, mo kaya vei ira, ‘Qo na ka e kaya na Turaga Cecere Duadua o Jiova: “Kemuni na noqu tamata, au na dolava na nomuni ibulubulu+ meu kauti kemuni cake mai na nomuni ibulubulu, meu kauti kemuni ina vanua o Isireli.+ 13 Oni na kila ni o yau o Jiova, niu dolava na nomuni ibulubulu meu kauti kemuni cake mai na nomuni ibulubulu, kemuni na noqu tamata.”’+ 14 ‘Au na solia vei kemuni na yaloqu, oni na bula kina,+ au na vakatikori kemuni ena nomuni vanua, oni na qai kila ni o yau o Jiova au tukuna, au cakava,’ e kaya o Jiova.”

15 E vosa tale vei au o Jiova, e kaya: 16 “Mo taura e dua na kau o iko na luve ni tamata, mo vola kina, ‘Na nei Juta kei ira na Isireli era tokoni koya.’*+ Mo taura e dua tale na kau, mo vola kina, ‘Na nei Josefa, na kau nei Ifireimi, kei ira kece na vuvale ni Isireli era tokoni koya.’*+ 17 Mo tauri rau vata me rau veivolekati, me rau dua ga na kau e ligamu.+ 18 Nira kaya vei iko na kainomu,* ‘O na tukuna vei keimami na ibalebale ni ka qo?’ 19 mo kaya vei ira, ‘Qo na ka e tukuna na Turaga Cecere Duadua o Jiova: “Au na taura na kau nei Josefa e tiko ena liga i Ifireimi, kei na yavusa ni Isireli era tokoni koya, au na semata kei na kau nei Juta, au na cakava me dua ga na kau,+ erau na dua ga e ligaqu.”’ 20 Me tiko e ligamu na rua na kau o volavola kina mera raica.

21 “Mo qai tukuna vei ira, ‘Qo na ka e kaya na Turaga Cecere Duadua o Jiova: “Au na kauti ira mai na Isireli mai na veimatanitu era lako kina, au na kumuni ira mai na veiyasana meu kauti ira ina nodra vanua.+ 22 Au na cakava mera dua ga na matanitu ena vanua,+ oya ena veiulunivanua e Isireli, ena liutaki ira kece e dua na tui,+ era na sega tale ni rua na matanitu, era na sega tale ga ni tawase me rua na matanitu.+ 23 Era na sega tale ni vakadukadukalitaki ira ena nodra matakau vakasisila,* na nodra itovo sevaki, kei na nodra cala kece.+ Au na vakabulai ira mai na nodra tawayalodina kece era valavala ca kina, au na vakasavasavataki ira. Era na noqu tamata, au na nodra Kalou.+

24 “‘“Na noqu tamata o Tevita ena nodra tui,+ ena dua ga na nodra ivakatawa.+ Era na muria na noqu lewa ra qai vakayacora vinaka na noqu lawa.+ 25 Era na tiko ena vanua au solia vua na noqu tamata, vei Jekope, na vanua era tiko kina na tukamuni,+ era na tiko kina me tawamudu,+ o ira, na luvedra, kei na makubudra,+ ena nodra turaga me tawamudu o Tevita na noqu tamata.+

26 “‘“Au na veiyalayalati vata kei ira ena veiyalayalati ni vakacegu,+ ena tawamudu na veiyalayalati qori. Au na vakataudeitaki ira, au na vakalevutaki ira,+ au na vakatikora tale ga ena kedra maliwa na noqu tikina tabu me tawamudu. 27 Ena tiko* vei ira na noqu valelaca,* au na nodra Kalou, era na noqu tamata.+ 28 Era na qai kila na veimatanitu ni o yau o Jiova au vakatabui Isireli, ni tiko ena kedra maliwa na noqu tikina tabu me tawamudu.”’”+