Emosi
3 “Moni rogoca na vosa qo e tukuna o Jiova me baleti kemuni na Isireli, me baleta na vuvale taucoko au kauta cake mai na vanua o Ijipita:
2 ‘O kemuni ga au kila vei ira na vuvale kece e vuravura.+
Oya na vuna au na tarogi kemuni kina ena nomuni cala kece.+
3 Erau na lako vata e rua ke rau sega ni veinaki?
4 Ena tagi na laione ena loma ni veikau ni sega na kena?
Ena tabalaka na domona na luvenilaione* ena nona qara ni sega ni toboka rawa e dua na ka?
5 Ena coko ina dai e delaniqele e dua na manumanuvuka ni sega na kena dai?*
Ena riba na dai mai na qele ni sega na ka e coko kina?
6 Ke uvuci na davui* ena koro, era na sautaninini na tamata?
Ke yaco na leqa ena koro, e vakavuna o Jiova?
7 Ni na sega ni vakayacora e dua na ka na Turaga Cecere Duadua o Jiova
Ena vakatakila mada na nona ka vuni vei ira na nona dauveiqaravi na parofita.+
8 Sa tagi na laione!+ O cei ena sega ni rere?
Sa vosa na Turaga Cecere Duadua o Jiova! O cei ena sega ni parofisai?’+
9 ‘Moni kacivaka ena valececere vakabai e Asoto
Kei na valececere vakabai ena vanua o Ijipita.
Moni kaya: “Ni soqoni vata ena ulunivanua o Samaria,+
Moni raica kina na tikoyavavala
Kei na veidabui e caka tiko kina.+
10 Nira sega ni kila mera cakava na ka dodonu,” e kaya o Jiova,
“Era binia na ivalavala kaukaua kei na veivakarusai ena nodra valececere vakabai.”’
11 Ia qo na ka e tukuna na Turaga Cecere Duadua o Jiova,
‘Ena volita na vanua e dua na meca,+
Ena kauta tani vei iko na nomu kaukaua,
Ena kovei na nomu valececere vakabai.’+
12 Qo na ka e tukuna o Jiova,
‘Me vaka na ivakatawa e kaliraka e rua na yavanisipi se na tikinidaligana mai na gusu ni laione,
Era na kaliraki va qori na Isireli,
O ira na dabe tiko qo mai Samaria ena idavodavo totoka kei na idabedabe balavu vivinaka.’*+
13 ‘Moni rogoca moni vakarota na vuvale i Jekope,’ e kaya na Turaga Cecere Duadua o Jiova, na Kalou ni lewe vuqa.*
14 ‘Ena siga au totogitaki Isireli kina ena nona talaidredre*+ kece,
Au na vakarusa tale ga na icabocabonisoro e Peceli,+
Ena tamusuki na ileu ni icabocabonisoro me lutu ina qele.+
15 Au na basuka na vale ni vulaililiwa kei na vale ni vulaikatakata.’