Isikeli

14 Era lako mai eso na qase ni Isireli mera dabe e mataqu.+ 2 E qai vosa vei au o Jiova: 3 “O iko na luve ni tamata, era nakita na tamata qo mera muria na nodra matakau vakasisila,* era biuta tale ga na ka mera tarabe kina na lewenivanua mera valavala ca. Vakacava, meu vakadonuya mera mai tarogi au?+ 4 Ia qo mo vosa vei ira, mo kaya, ‘Qo na ka e tukuna na Turaga Cecere Duadua o Jiova: “Ke nakita e dua na Isireli me muria na nona matakau vakasisila, e biuta tale ga na ka mera tarabe kina na lewenivanua mera valavala ca, qai lai taroga e dua na parofita, o yau o Jiova au na sauma vua me vaka na levu ni nona matakau vakasisila. 5 Au na vakarerea na lomadra na vuvale ni Isireli,* nira biuti au kece mera muria na nodra matakau vakasisila.”’+

6 “Mo kaya gona ina vuvale ni Isireli, ‘Qo na ka e tukuna na Turaga Cecere Duadua o Jiova: “Moni lesu mai, moni vakanadakuya na nomuni matakau vakasisila, moni golea tani na matamuni mai na nomuni itovo sevaki kece.+ 7 Ke wasei koya tani vei au e dua na Isireli se vulagi e tiko e Isireli, e nakita me muria na nona matakau vakasisila, e biuta tale ga na ka mera tarabe kina na lewenivanua mera valavala ca qai lako yani me taroga na noqu parofita,+ o yau ga o Jiova au na sauma vua. 8 Au na matacataki koya qori, au na cakava me ivakaraitaki, ena vosabeci, au na vakamatei koya tale ga ena kedra maliwa na noqu tamata,+ oni na qai kila ni o yau o Jiova.”’

9 “‘Ia ke vakacalai na parofita me tukuna e dua na ka, o yau o Jiova au vakacala na parofita qori.+ Au na qai dodoka vua na ligaqu, au na vakamatei koya ena kedra maliwa na noqu tamata na Isireli. 10 Ena sauti ira ga na nodra cala. Ena tautauvata ga na nona cala o koya e taro kei na cala ni parofita, 11 mera kua kina ni biuti au na vuvale ni Isireli, mera kua tale ga ni vakadukadukalitaki ira tiko ena nodra cala kece. Era na noqu tamata, au na nodra Kalou,’+ e kaya na Turaga Cecere Duadua o Jiova.”

12 E vosa tale vei au o Jiova, e kaya: 13 “O iko na luve ni tamata, ke valavala ca vei au e dua na vanua ni tawayalodina, au na dodoka na ligaqu meu vakarusa na kedra kakana,*+ au na tala kina na leqa ni kakana,+ au na vakamatea na tamata kei na manumanu era tiko kina.”+ 14 “‘Ke ratou tiko mada ga kina na le tolu na tagane qo, o Noa,+ o Taniela,+ kei Jope,+ eratou na vakabulai ratou ga ena dodonu ni nodratou ivalavala,’+ e kaya na Turaga Cecere Duadua o Jiova.”

15 “‘Seu tala na manumanu kila daukata mera lakova na vanua mera vakalala, me lala me kua ni dua e lakova ena vuku ni manumanu kila.+ 16 Niu bula dina tiko,’ e kaya na Turaga Cecere Duadua o Jiova, ‘ke ratou tiko kina na le tolu na tagane qo, eratou na sega ni vakabula na luvedratou tagane se na luvedratou yalewa, eratou na vakabulai ratou ga, ena lala na vanua.’”

17 “‘Seu kauta yani na iseleiwau ena vanua oya,+ au kaya: “Me lako yani ena vanua na iseleiwau,” me vakamatea na tamata kei na manumanu,+ 18 ke ratou tiko mada ga kina na le tolu na tagane qo, niu bula tiko,’ e kaya na Turaga Cecere Duadua o Jiova, ‘eratou na sega ni vakabula na luvedratou tagane se na luvedratou yalewa, eratou na vakabulai ratou ga.’”

19 “‘Seu tala yani na matedewa ena vanua,+ meu sova na noqu cudru levu ena vakadavedra mera mate kina na tamata kei na manumanu, 20 ke ratou tiko mada ga kina o Noa,+ o Taniela,+ kei Jope,+ niu bula tiko,’ e kaya na Turaga Cecere Duadua o Jiova, ‘eratou na sega ni vakabula na luvedratou tagane se na luvedratou yalewa. Eratou na vakabulai ratou ga ni dodonu na nodratou ivalavala.’”+

21 “Qo na ka e tukuna na Turaga Cecere Duadua o Jiova: ‘Ena va tale ga qori niu vakatauca e va na noqu itotogi,+ na iseleiwau, na leqa ni kakana, na manumanu kila daukata, kei na matedewa+ e Jerusalemi meu vakarusa kina na tamata kei na manumanu.+ 22 Ia era na dro eso era vo tiko kina, era na kau tani+ na gonetagane kei na goneyalewa. Era na lako yani vei kemuni, ni oni raica na nodra itovo kei na nodra ivalavala oni na vakacegui ena ka ca au vakayacora e Jerusalemi, io na ka kece au vakayacora kina.’”

23 “‘Era na vakacegui kemuni ni oni raica na nodra itovo kei na nodra ivalavala, oni na qai kila na vuna au vakayacora kina na ka kece au vakayacora kina,’+ e kaya na Turaga Cecere Duadua o Jiova.”