Jeremaia
25 Na vosa e tukuni vei Jeremaia me baleti ira kece na lewe i Juta ena ikava ni yabaki i Jioiakimi+ na luvei Josaia na tui Juta, ena imatai ni yabaki i Tui Nepukanesa* e Papiloni. 2 Qo na ka e tukuna o Jeremaia na parofita me baleti* ira kece na lewe i Juta kei ira kece na lewe i Jerusalemi:
3 “Ena ika13 ni yabaki i Josaia+ na luvei Amoni na tui Juta me yacova mai na siga qo, ena loma ni 23 na yabaki qori, e vosa vei au o Jiova au qai vosa tiko ga vakawasoma* vei kemuni ia oni sega ni vakarorogo.+ 4 E talai ira kece na nona dauveiqaravi na parofita o Jiova vei kemuni, e talai ira wasoma,* ia oni sega ni vakarorogo se vakatudaliga moni rogoca.+ 5 Era dau kaya, ‘Yalovinaka, moni dui biuta na nomuni itovo ca kei na nomuni ivakarau ca,+ oni na qai tiko ga me sega ni mudu ena vanua e solia makawa vei kemuni kei ira na tukamuni o Jiova. 6 Moni kua ni muria na kalou tani moni qarava moni cuva vei ira, moni vakacudrui au ena cakacaka ni ligamuni, au na qai sega ni kauta yani vei kemuni na ca.’
7 “‘Ia oni sega ni vakarorogo vei au,’ e kaya o Jiova. ‘Oni nakita ga moni vakacudrui au ena cakacaka ni ligamuni moni ca kina.’+
8 “O koya gona qo na ka e kaya o Jiova ni lewe vuqa,* ‘“Ni oni sega ni rogoca na noqu vosa, 9 au sa talatala mera lako mai na veimataqali kece mai na vualiku,”+ e kaya o Jiova, “au talatala me lako mai o Tui Nepukanesa* e Papiloni na noqu italai,+ au na kauti ira mai mera valuta na vanua qo,+ mera valuta na lewena, mera valuta tale ga na veimatanitu volekata.+ Au na vakarusai ira, au na cakava me domobulataki, me kaluvi, me rusa vakadua. 10 Au na vakaotia na domo ni reki kei na domo ni marau ena veivanua qori,+ na domo ni taganevou kei na domo ni yalewavou,+ na domo ni iqaqi kei na rarama ni cina. 11 Na vanua kece qo ena rusa, ena domobulataki, era na qarava na tui Papiloni na veivanua qori me 70 na yabaki.”’+
12 “‘Ni cava na 70 na yabaki+ au na taroga* na tui Papiloni kei na matanitu oya ena nodra cala,’+ e kaya o Jiova, ‘au na vakalala tale ga na nodra vanua na Kalitia me tawamudu.+ 13 Au na vakayacora ena vanua oya na vosa kece au cavuta me yaco kina, na ka kece e volai ena ivola qo e parofisaitaka o Jeremaia me yacova na veimatanitu kece. 14 Ni levu na matanitu kei na tui rogo+ era na vakabobulataki ira,+ au na sauma vei ira me vaka na nodra ivalavala kei na cakacaka ni ligadra.’”+
15 Qo na ka e tukuna vei au o Jiova na Kalou ni Isireli: “Mo taura mai ligaqu na bilo waini ni cudru qo, mo vagunuvi ira kina na veimatanitu kece au talai iko kina. 16 Era na gunuva era na tataivatia ra qai vaka na lialia ena vuku ni iseleiwau au tala vei ira.”+
17 Au taura sara na bilo mai na liga i Jiova, au vagunuvi ira kina na veimatanitu kece e talai au kina o Jiova:+ 18 me tekivu vei Jerusalemi kei na koro kece e Juta,+ na nona tui kei ira na nona turaga, mera rusa, me domobulataki, me kaluvi, me cudruvi+ me vaka ena siga qo, 19 oti oya o Fero na tui Ijipita kei ira na nona dauveiqaravi, o ira na nona turaga vakaitutu kei ira kece na nona tamata,+ 20 kei ira kece na duikaikai, o ira kece na tui ni vanua o Usi, o ira kece na tui ni vanua o Filisitia,+ o Asikiloni,+ o Kesa, o Ekironi, kei ira na vo tiko e Asoto, 21 o Itomi,+ o Moapi,+ kei ira na Amoni,+ 22 o ira kece na tui Taia, o ira kece na tui Saitoni,+ o ira na tui ni veiyanuyanu e wasawasa, 23 o Titana,+ o Tima, o Pusa, kei ira kece e tasi na nodra kanavalavala,+ 24 na nodra tui kece na kai Arapea,+ kei na nodra tui kece na duikaikai era tiko ena vanua talasiga, 25 o ira kece na tui mai Simirai, o ira kece na tui Ilama,+ o ira kece na tui Mitia,+ 26 o ira kece na tui ni vualiku era tiko voleka kei ira na tiko vakayawa, mera veitaravi, o ira na vo ni veimatanitu e vuravura era tiko e delaniqele, ena qai gunu sara e muri o tui Sesaki.*+
27 “Mo kaya vei ira, ‘Qo na ka e tukuna o Jiova ni lewe vuqa, na Kalou ni Isireli: “Moni gunu moni mateni, moni lua, moni bale, moni kua ni tucake tale+ ena vuku ni iseleiwau au tala vei kemuni.”’ 28 Ia ke ra bese ni taura na bilo mai ligamu mera gunu, mo kaya vei ira, ‘Qo na ka e tukuna o Jiova ni lewe vuqa: “Moni gunuva! 29 Raica! Keu tekivu kauta yani na ca ena koro au vakayacani kina,+ moni qai sega ni totogitaki?”’+
“‘Oni na sega ni drovaka na itotogi, niu kaciva e dua na iseleiwau me tau vei ira kece na lewe i vuravura,’ e kaya o Jiova ni lewe vuqa.
30 “Ia mo parofisaitaka vei ira na vosa kece qo, mo kaya vei ira,
‘Ena tagi mai cake o Jiova me vaka na laione,
Ena rogo na domona mai na nona itikotiko tabu.
Ena tagi vakadomoilevu o koya me vaka na laione ena nona itikotiko.
Ena kaikaila me vakataki ira na butu ikeliniwaini,
Ena lagasere ena qaqa o koya vei ira kece na lewe i vuravura.’
31 ‘Ena rogo yani e dua na rorogo ena iyalayala kei vuravura,
Ni veileti o Jiova kei ira na veimatanitu.
Ena lewai ira kece na tamata o koya.+
Ena soli ira na tamata ca ina iseleiwau,’ e kaya o Jiova.
32 Qo na ka e kaya o Jiova ni lewe vuqa:
‘Raica! Ena tete na ka ca mai na dua na matanitu ina dua na matanitu,+
Ena tubu na draki ca levu mai na vanua yawa sara kei vuravura.+
33 “‘O ira e vakamatea o Jiova ena siga oya era na tu mai na dua na iyalayala kei vuravura ina dua tale na iyalayala kei vuravura, era na sega ni tagicaki, era na sega ni kumuni se bulu. Era na vaka na maniwa ena delaniqele.’
34 Moni qoqolou na ivakatawa, moni tagi!
Moni veiqiqiyaki na liutaka na qelenisipi,
Ni sa yaco mai na gauna moni vakamatei moni veiseyaki kina,
Oni na bale me vaka na iyaya talei!
35 Sa sega na vanua mera dro kina na ivakatawa,
Kei na vanua mera dro kina na liutaka na qelenisipi.
36 Rogoca! Na domo ni nodra tagi na ivakatawa
Kei na nodra qoqolou na liutaka na qelenisipi,
Ni sa vakacacana o Jiova na nodra vanua veico.
37 Na itikotiko ni vakacegu sa vagalui
Ena vuku ni cudru waqawaqa i Jiova.