iKarua ni Veigauna

11 Ni yaco i Jerusalemi o Riopoami, e soqoni ira sara na vuvale i Juta kei ira na Penijamini,+ era le 180,000 na tamataivalu vakavulici* mera valuti Isireli, mera vakalesuya na matanitu vei Riopoami.+ 2 E qai vosa o Jiova vei Semaia+ na tamata ni Kalou dina, e kaya: 3 “Mo tukuna vei Riopoami na luvei Solomoni na tui Juta, kei ira kece na Isireli mai Juta kei Penijamini, 4 ‘Qo na ka e tukuna o Jiova: “Moni kua ni lako cake moni valuti ira na tacimuni. Moni lesu yadua ina nomuni vale niu vakavuna na ka qo.”’”+ Era mani muria na vosa i Jiova, era suka mera kua ni valuti Jerepoami.

5 E tiko e Jerusalemi o Riopoami, e tara eso na koro vakabai e Juta. 6 E tarai* Peceliema,+ o Etami, o Tikoa,+ 7 o Pecisuri, o Soko,+ o Etulama,+ 8 o Kaca,+ o Maresa, o Sifi,+ 9 o Etoraimi, o Lakisi,+ o Aseka,+ 10 o Sora, o Eijaloni,+ o Epironi,+ na koro vakabai e tiko e Juta kei Penijamini. 11 E vakaukauataka tale ga na vanua vakabai, e biuti ira kina na komada, e vakarautaka na kakana, na waiwai, kei na waini, 12 qai biuta ena koro yadua na isasabai lelevu kei na moto, e vakaukauataka sara ga. E tokoni koya tiko ga o Juta kei Penijamini.

13 O ira na bete kei ira na Livai era tiko e Isireli era biuta mai na nodra vanua kece mera lako vua. 14 Era biuta na Livai na nodra vanua veico kei na ka era taukena,+ mera lako i Juta kei Jerusalemi ni sa vakacegui ira o Jerepoami kei ratou na luvena tagane mera kua ni veiqaravi vakabete vei Jiova.+ 15 E qai lesia o Jerepoami eso na nona bete ni vanua cecere+ mera qarava na timoni* e vaka na ibulibuli ni me+ kei na luvenibulumakau e bulia o koya.+ 16 O ira mai na yavusa kece e Isireli era vagolea na lomadra mera qarai Jiova na Kalou ni Isireli era muri ira i Jerusalemi mera vakacaboisoro vei Jiova na Kalou i tukadra.+ 17 E tolu na yabaki era vakaukauataka na veiliutaki vakatui nei Juta ra qai tokoni Riopoami na luvei Solomoni, nira muria na ivalavala i Tevita kei Solomoni me tolu na yabaki.

18 Ia o Riopoami e vakawatitaki Melaci na luvena yalewa o Jirimoci na luvei Tevita, kei Epaieli na luvena yalewa o Iliapi+ na luvei Jese. 19 Lakolako e vakasucuma o koya eso na luvena tagane: o Jiusi, o Semaraia, kei Seami. 20 Oti e vakawatitaki Meaka na makubui Apisalome.+ E qai vakasucumi Apaija,+ o Atai, o Sisa, kei Silomeci. 21 E domoni Meaka vakalevu na makubui Apisalomi o Riopoami, sega so o ira na vo ni watina kei na watina lalai,+ ni taura o koya e 18 na watina kei na 60 na watina lalai, e 28 kina na luvena tagane, e 60 na luvena yalewa. 22 E qai lesi Apaija na luvei Meaka o Riopoami me iliuliu me liutaki ira na tacina, ni vinakata me buli koya me tui. 23 E vuku ena ka e cakava, e tala* eso na luvena tagane ena vanua taucoko o Juta kei Penijamini, ena koro vakabai kece,+ e solia vakalevu vei ira na kakana qai vakarautaka e levu na watidra.