Dauveilewai

11 E turaga qaqa ni Kiliati o Jefica,+ na luve ni saqamua, na tamana o Kiliati. 2 E vakasucuma tale ga na wati Kiliati eso na luvena tagane. Nira sa levu mai na luvei wati Kiliati era qai cemuri Jefica, era kaya vua: “Ena sega ni dua na nomu ivotavota ena vuvale i tamadatou ni duatani na tinamu.” 3 E drovaki ira sara na tacina o Jefica, e lai vakaitikotiko ena vanua o Topi. Era tokoni Jefica na tagane era sega ni cakacaka mera muri koya.

4 Sa dede toka era qai valuti ira na Isireli na Amoni.+ 5 Nira valuti ira na Isireli na Amoni, era lako sara na qase ni Kiliati mera lai kauti Jefica mai na vanua o Topi. 6 Era kaya vei Jefica: “Lako mai, mo mai neimami komada meda valuti ira na Amoni.” 7 Ia e kaya o Jefica vei ira na qase ni Kiliati: “Sega ni o kemuni ga qo oni cati au vakalevu oni qai cemuri au mai na vale i tamaqu?+ Na cava oni lakovi au mai kina qo ni oni sa leqa?” 8 Era kaya sara vei Jefica na qase ni Kiliati: “Qori sara ga na vuna keimami lakovi iko mai kina. Ke o lako vata kei keimami meda valuti ira na Amoni, o na liutaki keimami na lewe i Kiliati taucoko.”+ 9 E mani kaya o Jefica vei ira na qase ni Kiliati: “Ke oni kauti au lesu meu valuti ira na Amoni qai vakamalumalumutaki ira vei au o Jiova, au na nomuni iliuliu sara ga!” 10 Era kaya vei Jefica na qase ni Kiliati: “Me noda ivakadinadina* mada ga o Jiova ke keimami sega ni cakava na ka o tukuna.” 11 E tomani ira sara na qase ni Kiliati o Jefica, era lesi koya na lewenivanua me nodra turaga me nodra komada. E qai tokaruataka o Jefica na ka e tukuna ena mata i Jiova e Misipa.+

12 E tala eso na italai o Jefica vua na nodra tui na Amoni,+ e kaya: “Na cava na noqu cala mo mai valuta kina na noqu vanua?” 13 E kaya sara na nodra tui na Amoni vei ira na italai nei Jefica: “Era taura na Isireli na noqu vanua ena gauna era biuti Ijipita mai kina,+ mai Arinoni+ i Japoki me yaco sara ina Joritani.+ Ia qo moni vakasuka mai vakavinaka.” 14 Ia e tala tale eso na italai o Jefica vua na nodra tui na Amoni, 15 mera kaya vua:

“Qo na ka e tukuna o Jefica: ‘Era sega ni taura na Isireli na nodra vanua na Moapi+ kei na nodra vanua na Amoni,+ 16 nira biuti Ijipita na Isireli era lako voli ena vanua talasiga me yaco sara ina Wasa Damudamu+ mera yaco i Ketesa.+ 17 Era qai tala eso na italai na Isireli vua na tui Itomi,+ era kaya: “Yalovinaka, me keimami takosova mada na nomu vanua,” ia e sega ni vakarorogo na tui Itomi. Era talatala tale ga vua na tui Moapi,+ e sega ni vakadonuya. Era mani tiko ga na Isireli e Ketesa.+ 18 Nira lako voli ena vanua talasiga, era sega ni muria na vanua o Itomi+ kei na vanua o Moapi. Era lakova na tokalau ni vanua o Moapi+ ra qai keba toka ena yasayasa o Arinoni, era sega ni lakova na nodra iyalayala ni vanua na Moapi+ ni o Arinoni ga na iyalayala ni vanua o Moapi.

19 “‘Oti oya era tala eso na italai na Isireli vei Sioni na nodra tui na Amoraiti na tui Esiponi, era kaya vua na Isireli: “Yalovinaka, me keimami takosova mada na nomu vanua me keimami yaco ina neimami tikina.+ 20 Ia e sega ni vakabauti ira na Isireli o Sioni mera takosova na nona vanua, e mani soqoni ira kece na nona tamata o Sioni mera keba e Jeasa mera valuti ira na Isireli.+ 21 E qai soli Sioni kei ira kece na nona tamata o Jiova na nodra Kalou na Isireli e ligadra na Isireli, era vakadrukai ira ra qai taukena na nodra vanua kece na Amoraiti, o ira na lewenivanua oya.+ 22 Era taukena gona na nodra vanua kece na Amoraiti mai Arinoni me yaco sara i Japoki, mai na vanua talasiga me yaco sara ina Joritani.+

23 “‘O Jiova ga na Kalou ni Isireli e cemuri ira na Amoraiti e matadra na nona tamata na Isireli,+ ia qo o na via cemuri ira? 24 Vakacava o na sega ni taura na vanua e solia vei iko o Kimosi+ na nomu kalou mo taukena? O ira kece ga e cemuria o Jiova na neimami Kalou e mata i keimami, keimami na cemuria.+ 25 Vakacava, o uasivi Pelaki+ na luvei Sipori na tui Moapi? Sa bau saqati Isireli mada se valuti ira? 26 Nira tiko na Isireli e Esiponi kei na kena tauni lalai,*+ e Aroeri kei na kena tauni lalai, kei na koro kece era tiko ena bati ni Arinoni me 300 na yabaki, na cava oni sega ni taura lesu kina ena gauna oya?+ 27 Au sega ni cala vei iko, ia e cala ni o valuti au. Me lewai ira mada ga nikua na Isireli kei ira na Amoni o Jiova na Turaganilewa.’”+

28 Ia e sega ni rogoca na tui Amoni na itukutuku nei Jefica a lai tukuni vua.

29 E sobuti Jefica na yalo i Jiova+ qai takosova na vanua o Kiliati kei Manasa me lako yani i Misipe e Kiliati,+ mai Misipe e Kiliati e lako sara vei ira na Amoni.

30 E qai bubului vei Jiova o Jefica,+ e kaya: “Ke oni soli ira na Amoni e ligaqu, 31 ena nei Jiova+ o koya ga ena lako mai ena katuba ni noqu vale me tavaki au niu lesu mai ena vakacegu vei ira na Amoni, au na cabori koya qori me isoro kama.”+

32 E mani lako yani o Jefica me valuti ira na Amoni, e qai soli ira o Jiova e ligana. 33 E ravuti ira ena dua na veivakamatei levu mai Aroeri me yaco sara i Minici, e 20 na koro, me yaco sara i Epeli-kiramemi. Era vakadrukai gona na Amoni e matadra na Isireli.

34 Oti e lako o Jefica i Misipa+ ina nona vale, kila na cava! e curu mai tuba na luvena yalewa me tavaki koya, e qiria tiko na tibereli qai meke tiko! Ia e dua ga na luvena, na luvena duabau. E sega tale ni dua na luvena tagane se luvena yalewa. 35 Ni raici koya ga, e dresulaka na nona isulu, e kaya: “Oilei na luvequ! O sa vakamosia dina na lomaqu,* o iko sara ga au na tala. Au sa yalayala oti vei Jiova, au na sega ni vakasuka.”+

36 Ia e kaya vua na luvena yalewa: “I tamaqu, ke o sa yalayala oti vei Jiova, mo vakayacora vei au na ka o yalataka,+ ni o Jiova ga e totogitaki ira na kemu meca na Amoni ena vukumu.” 37 E kaya tale vei tamana: “Me vakayacori vei au qo: Mo vakadonuya mada meu lako me rua na vula, meu lako ina veiulunivanua meu tagicaka na noqu bula vagoneyalewa kei ira na noqu itokani goneyalewa.”*

38 E kaya sara o Jefica: “Mo lako!” E mani tukuna me lako me rua na vula, e biubiu sara me lako ina veiulunivanua kei ira na nona itokani mera tagicaka na nona bula vagoneyalewa. 39 E lesu vei tamana ni oti e rua na vula, e qai vakayacora o tamana na ka e bubuluitaka me baleti koya.+ E sega ni veiyacovi kei na dua na tagane. E kena ivalavala gona e Isireli: 40 Mera lako e veiyabaki na goneyalewa ni Isireli mera vakacaucautaka na luvena yalewa o Jefica na turaga ni Kiliati, oya me va na siga ena dua na yabaki.