Nodra Cakacaka na Yapositolo

1 I Ceofilo, qo na imatai ni ivola au vola kina na ka kece a tekivuna o Jisu ena nona cakacaka kei na ka e vakavulica+ 2 me yacova na siga e kau cake kina.+ E lako cake ni vakasalataki ratou oti na yapositolo a digitaka. E cavuta na vosa kece qo ena veiuqeti ni yalo tabu.+ 3 E vakaraitaki koya tale ga vakalevu vei ratou ena loma ni 40 na siga ni vakararawataki oti me vakadinadinataka ni bula tiko.+ E tukuna tiko ga vei ratou na veika e baleta na Matanitu ni Kalou.+ 4 Ni ratou soqoni vata tiko e qai vakaroti ratou: “Dou kua ni biuti Jerusalemi,+ dou waraka tiko ga na ka e yalataka o Tamaqu,+ me vaka dou rogoca vei au, 5 ni a veipapitaisotaki ena wai o Joni, ia dou na papitaisotaki ena yalo tabu+ ni oti ga qo e vica na siga.”

6 Ni ratou soqoni vata tale, eratou tarogi koya: “Turaga, oni na vakalesuya tale na matanitu vei Isireli ena gauna qo?”+ 7 E kaya vei ratou: “E sega ni nomudou mo dou kila na gauna kei na siga sa lokuca o Tamaqu ena nona lewa.+ 8 Ia dou na rawata na kaukaua ni sobuti kemudou na yalo tabu,+ dou na qai tukuni+ au e Jerusalemi,+ e Jutia taucoko, e Samaria,+ kei na veivanua yawa sara* kei vuravura.”+ 9 Ni cavuta oti ya, ni ratou se raici koya tiko ga, sa qai kau cake me yacova ni tabonaki koya na o mai matadratou.+ 10 Ni ratou se rai tu ga i macawa ni kau cake tiko, e qai basika vakasauri e yasadratou e rua na tagane erau vakaisulu vulavula+ 11 erau kaya: “Kemudou na kai Kalili, na cava dou wadrava tiko i macawa? O Jisu e kau tani cake vei kemudou qo i macawa ena lako mai ena sala vata ga dou raica ni kau cake kina i macawa.”

12 Eratou sa qai siro mai na Ulunivanua ni Veiolive e toka volekati Jerusalemi,+ me ratou lesu i Jerusalemi e rauta ni dua na kilomita* na kena yawa. 13 Ni ratou yaco yani, eratou lako sara ina rumu ni vale e cake, na vanua eratou tiko kina. E tiko kina o Pita, o Joni, o Jemesa, o Adriu, o Filipi, o Tomasi, o Pacolomiu, o Maciu, o Jemesa na luvei Alifio, o Saimoni na gugumatua, kei Jutasa na luvei Jemesa.+ 14 Eratou masu tiko ga ena lomavata, era tiko tale ga kina eso na yalewa,+ o Meri na tinai Jisu kei ratou na taci Jisu.+

15 E tucake ena gauna ya o Pita ena kedra maliwa na veitacini (na kedra iwiliwili kece e rauta ni 120) qai kaya: 16 “Raveitacini, e dodonu me vakayacori na ka e tukuni ena tikinivolatabu, na ka a tukuna na yalo tabu ena gusu i Tevita me baleti Jutasa,+ a vakatakilai Jisu vei ira na mai vesuki koya.+ 17 Ni a wili vata kei keda,+ a vakaitavi tale ga ena cakacaka vakaitalatala qo. 18 (Na tagane sara ga qo a volia e dua na tikiniqele ena ilavo a saumi kina ena nona cakacaka vakatawadodonu,+ e dokoulu, e kacabote na ketena, qai kasabura kece mai tuba na nona gacagaca.+ 19 Era kila kece na itukutuku qo na lewe i Jerusalemi, era mani vakatoka na tikiniqele ya me o Akelitama, e kena ibalebale, “Vanua ni Dra.”) 20 Ni volai ena ivola na Same, ‘Laiva me laladidi na nona itikotiko, me kua tale ni dua e tawana,’+ kena ikuri, ‘Me dua tale e taura na nona itavi vakaivakatawa.’+ 21 E veiganiti gona me dua e dau soqoni vata kei keda ena gauna kece e cakava tiko kina o Jisu na nona cakacaka ena keda maliwa, 22 me tekivu ena nona papitaisotaki koya o Joni+ me yacova na siga e kau cake kina mai na keda maliwa.+ E dua ga vei ira qo e dodonu me na vakadinadinataka vata kei keda na nona vakaturi.”+

23 Era mani digia e rua, o Josefa e dau vakatokai me o Parisapa, e kilai tale ga ena yaca Jusitu, kei Mataiasi. 24 Era sa qai masu, era kaya: “I Jiova,* oni kila na loma ni tamata kece,+ ni vakaraitaka mada se o cei vei rau qo oni digitaka 25 me taura na cakacaka vakaitalatala qo kei na cakacaka vakayapositolo sa vakanadakuya o Jutasa, me lako ina nona tikina.”+ 26 Era vakawirimadigitaki rau,+ e qai dusi Mataiasi na madigi, sa mani wili vata kei ratou na le 11 na yapositolo.