iKarua ni Veigauna

20 Oti era lako yani na Moapi,+ na Amoni,+ kei na so na Amonimi* mera valuti Josafati. 2 E mani tukuni vei Josafati: “Era mai valuti kemuni e dua na ilala levu mai na yasayasa ena waitui* mai Itomi,+ era tiko e Asesoni-tamari, oya e Eniketi.”+ 3 E rere sara ga o Josafati e mani nakita* me vaqarai Jiova.+ E qai kacivaka mera lolo e Juta taucoko. 4 Era qai soqoni vata yani na Juta mera tarogi Jiova,+ era lako mai na koro kece e Juta mera taro ivakasala vei Jiova.

5 E tucake sara o Josafati ena ivavakoso e Juta kei Jerusalemi ena vale i Jiova ena mata ni raranivale vou, 6 e kaya:

“Kemuni Jiova na nodra Kalou na tukai keimami, oni sega ni Kalou ni lomalagi,+ oni sega ni lewa na veimatanitu kece ena veivanua?+ E kaukaua e qaqa na ligamuni qai sega ni dua me vorati kemuni rawa.+ 7 Kemuni na neimami Kalou, oni cemuri ira na lewenivanua qo e matadra na nomuni tamata na Isireli, oni qai solia me nodra ivotavota tudei na kawa nei Eparama na nomuni itokani.+ 8 Era tiko kina ra qai tara e kea vei kemuni e dua na tikina tabu ena yacamuni,+ era kaya, 9 ‘Ke yacovi keimami na leqa, na iseleiwau, na itotogi, na matedewa, se dausiga, keimami na mai duri ena mata ni vale qo, e matamuni (ni tiko ena vale qo na yacamuni),+ me keimami kere veivuke vei kemuni ena neimami rarawa, moni rogoca mada ga moni vakabulai keimami.’+ 10 Ia qo o ira na Amoni, na Moapi kei na veiulunivanua o Sia,+ oni a sega ni vakatara mera ravuta na Isireli nira biuta mai na vanua o Ijipita. Era gole tani vei ira, era sega ni vakarusai ira.+ 11 Qo era sauma vei keimami nira lako mai mera cemuri keimami mai na nomuni ivotavota oni solia me keimami taukena.+ 12 Kemuni na neimami Kalou, oni na lewai ira?+ Ni sega na neimami kaukaua e matadra na ilala levu qo era mai valuti keimami, keimami sega ni kila na ka me keimami cakava,+ ia keimami rai ga vei kemuni.”+

13 Era duri kece tu na Juta ena mata i Jiova, kei na nodra lalai, na watidra, kei na luvedra.

14 Ia ena loma ni ivavakoso, na yalo i Jiova e qai sobuti Jeseli na luvei Sakaraia, na luvei Penaia, na luvei Jaeli, na luvei Matanaia na Livai vei ira na luvei Esafa. 15 E kaya o koya: “Moni vakarorogo o kemuni kece na Juta kei kemuni na lewe i Jerusalemi, kei Tui Josafati! Qo na ka e tukuna vei kemuni o Jiova, ‘Moni kua ni rere se domobulataki ira na ilala levu qo, ni sega ni nomuni na ivalu, e nona ga na Kalou.+ 16 Moni lako sobu nimataka moni valuti ira. Era na lako cake mai ena itatakoso e Sisi, oni na raici ira ena iyala ni buca* donuya na vanua talasiga o Jirueli. 17 Ena sega ni vinakati moni vala ena ivalu qo. Moni vakarau, ni tu vakadua,+ moni raica ni vakabulai kemuni o Jiova.+ Moni kua ni rere se domobula o kemuni e Juta kei Jerusalemi.+ Moni lako moni valuti ira nimataka, ena tokoni kemuni o Jiova.’”+

18 E tekicuva sara ina qele o Josafati, era tekicuva tale ga vei Jiova o ira kece e Juta kei ira na lewe i Jerusalemi mera sokaloutaki Jiova. 19 Era qai tucake na Livai era kawa nei Koaca+ kei ira na luvei Kora mera vakacaucautaki Jiova na Kalou ni Isireli ena domolevu sara.+

20 Era yadra totolo ena mataka tarava mera lako ina vanua talasiga e Tikoa.+ Nira lako tiko, e tucake sara o Josafati qai kaya: “Moni rogoci au kemuni na Juta kei kemuni na lewe i Jerusalemi! Moni vakabauti Jiova na nomuni Kalou moni tudei* kina. Moni vakabauti ira na nona parofita+ moni qaqa kina.”

21 Ni veivosaki oti o koya kei ira na lewenivanua, e lesia sara eso mera sere+ vei Jiova mera veivakacaucautaki ena isulu savasava nira liu vei ira na tamata era vakaiyaragi, qai kaya: “Moni vakacaucautaki Jiova, ni sega ni mudu na dei ni nona loloma.”+

22 Nira tekivu lagasere ena marau, e lesia o Jiova eso mera toka vuni mera valuti ira na Amoni, na Moapi, kei ira ena veiulunivanua o Sia era valuti Juta tiko, era qai veimoku vakataki ira.+ 23 Era vuki o ira na Amoni kei ira na Moapi mera valuti ira na lewe ni veiulunivanua o Sia+ mera vakarusai ira, mera vakawabokotaki ira, nira mokuti ira oti na lewe i Sia ra qai veivakamatei ga vakataki ira.+

24 Ia nira lako yani na Juta ena valeniyadra ena vanua talasiga,+ era rai yani vei ira na ilala levu, era raica ni sa davo tu ena qele na yagodra mate,+ e sega ni dua e bula. 25 E mani lako yani o Josafati kei ira na nona tamata mera yauta mai vei ira na itokinivalu, era raica ni levu sara vei ira na iyaya, na isulu, kei na iyau talei, era luvata mai na kena levu era rawata mera kauta me nodra.+ E tolu na siga na nodra yauta tiko na itokinivalu ni sa rui levu. 26 Ena ikava ni siga era soqoni vata ena Buca o Piraka mera vakacaucautaki* Jiova e kea. Oya na vuna era vakatoka kina na vanua qori me Buca o Piraka*+ me yacova nikua.

27 Era mani lesu na lewe i Juta kei Jerusalemi ni liutaki ira o Josafati, era marau nira lesu i Jerusalemi, ni vakamarautaki ira o Jiova ena vukudra na kedra meca.+ 28 Era lako yani i Jerusalemi nira taura na ivakatagi vakawa, na api,+ kei na biukila,+ mera lako ina vale i Jiova.+ 29 Era rerevaka vakalevu na Kalou na matanitu kece ena vanua nira rogoca ni valuti ira na meca ni Isireli o Jiova.+ 30 E sega ni tikoyavavala na matanitu i Josafati, e vakacegui koya tiko ga na nona Kalou ena veiyasana kece.+

31 E lewai ira tiko ga na Juta o Josafati. E tui ni sa yabaki 35, e veiliutaki e Jerusalemi me 25 na yabaki. Na yaca i tinana o Asupa na luvei Sili.+ 32 E muria tiko ga na ivalavala i tamana o Esa.+ E sega ni gole tani mai kina ni vakayacora na ka e donu ena mata i Jiova.+ 33 Ia e sega ni kau tani na vanua cecere,+ era se sega ni vagolea na lomadra na lewenivanua vua na Kalou i tukadra.+

34 Na vo ni itukutuku me baleti Josafati, na kena itekivu kei na kena iotioti, e volai ena vosa i Jeu+ na luvei Ananai+ e vakacurumi ena nodra iVola na Tui Isireli. 35 Oti qo erau veitokani o Tui Josafati e Juta kei Tui Esaia e Isireli, e ca na nona ivalavala.+ 36 Erau veitokani ena ta waqa me soko i Tasisi,+ erau ta waqa e Esioni-keperi.+ 37 Ia e parofisaitaka o Eliesa na luvei Totava e Maresa na ka ca me baleti Josafati, e kaya: “Ni o veitokani kei Esaia, ena vakarusa o Jiova na nomu cakacaka.”+ E qai voca na waqa,+ e sega ni soko rawa i Tasisi.