iKarua ni Veigauna
15 E sobuti Asaraia na luvei Oteti na yalo ni Kalou. 2 E lako sara yani me tavaki Esa, e kaya vua: “Moni rogoci au Esa kei kemuni kece na Juta kei na Penijamini! Ena tokoni kemuni o Jiova ke oni tiko vata ga kei koya,+ ke oni vaqarai koya ena vakatakilai koya vei kemuni,+ ke oni biuti koya ena biuti kemuni o koya.+ 3 E sega e Isireli na Kalou dina me dua na gauna balavu, e sega na bete me veivakavulici, e sega tale ga na lawa.+ 4 Ia ena gauna era rarawa kina era lesu vei Jiova na Kalou ni Isireli ra qai vaqarai koya, e vakatakilai koya vei ira.+ 5 Ena gauna oya e sega ni dua e veilakoyaki ena vakacegu* nira tikoyavavala vakalevu na lewe ni veivanua kece. 6 E vakarusa na matanitu e dua tale na matanitu, na koro e dua tale na koro, ni vakavuna na Kalou mera tikoyavavala ena veimataqali rarawa.+ 7 Ia o kemuni, moni yaloqaqa, moni kua ni yalolailai*+ ni na saumi na nomuni cakacaka.”
8 Ni rogoca ga na vosa qori o Esa kei na parofisai nei Oteti na parofita, e yaloqaqa qai kauta tani na matakau vakasisila kece ena vanua o Juta+ kei Penijamini, vaka kina ena koro e ravuta mai na veiulunivanua e Ifireimi, e vakavinakataka tale na icabocabonisoro i Jiova e tiko ena mata ni varada i Jiova.+ 9 E soqoni ira kece na Juta, na Penijamini, kei ira na vulagi era tiko vata kei ira mai Ifireimi, Manasa kei Simioni,+ nira mai tovata vei koya e lewe levu e Isireli nira raica ni tiko vata kei koya o Jiova na nona Kalou. 10 Era mani soqoni vata e Jerusalemi ena ikatolu ni vula ena ika15 ni yabaki ni veiliutaki i Esa. 11 Era qai cabora vei Jiova ena siga oya na itokinivalu era kauta mai, e 700 na bulumakau kei na 7,000 na sipi. 12 Era veiyalayalati tale ga mera vaqarai Jiova na Kalou i tukadra ena lomadra taucoko kei na nodra vinaka* taucoko.+ 13 Ena vakamatei o koya e sega ni vaqarai Jiova na Kalou ni Isireli, e gone se qase, e tagane se yalewa.+ 14 Era mani bubului vei Jiova ena domolevu, ena kaila ni marau, ena biukila kei na davui.* 15 Era marau kece na Juta ena vuku ni bubului qo nira bubului mai vu ni lomadra, ra qai gumatua ni vaqarai koya mani vakatakilai koya vei ira,+ e solia tiko ga vei ira o Jiova na vakacegu ena veiyasana kece.+
16 E vakasivoi Meaka+ mada ga na buna o Esa na tui mai na nona itutu vakamarama, ni cakava e dua na matakau velavela me qaravi kina na duru ni sokalou.*+ E musuka o Esa na nona matakau velavela, e vurumemeataka qai vakama ena Buca o Kitironi.+ 17 E sega ga ni kau tani+ mai Isireli na vanua cecere.+ Ia e taucoko* na loma i Esa ena nona bula kece.+ 18 E kauta sara ina vale ni Kalou dina na ka e vakatabuya o koya kei na ka e vakatabuya o tamana, na siliva, na koula kei na veimataqali iyaya.+ 19 E sega na ivalu me yacova na ika35 ni yabaki ni veiliutaki i Esa.+