iKarua ni Veigauna
16 Ena ika36 ni yabaki ni veiliutaki i Esa e lako cake o Tui Pasa+ e Isireli me valuti Juta, e tarai* Rama+ sara me kua ni dua e lako yani se lesu mai vei* Tui Esa e Juta.+ 2 E qai kauta mai o Esa na siliva kei na koula mai na valeniyau i Jiova+ kei na valenitui, e vakauta sara vei Tui Penietati e Siria+ e tiko mai Tamasiko, e kaya: 3 “E dua tiko na nodaru veiyalayalati, vaka kina o tamaqu kei tamamu. Au vakauta yani qo vei iko na siliva kei na koula. Mo lako mai, mo tinia na nomu veiyalayalati kei Tui Pasa e Isireli, ena lako tani kina vei au o koya.”
4 E mani vakarorogo o Penietati vei Tui Esa, e talai ira sara na nona iliuliu ni mataivalu mera valuta na koro era tiko e Isireli, era qai mokuti Aijoni,+ Tani,+ Epeli-meimi, kei na vanua kece e maroroi tu kina na iyau ena koro e Nafitalai.+ 5 Ni rogoca ga qori o Pasa, e cegu sara na nona tarai* Rama tiko, e mudu tale ga na nona cakacaka. 6 E qai kauti ira kece na Juta o Tui Esa, era colata tani na vatu kei na kau ni Rama+ e vakayagataka tiko o Pasa,+ e tarai* Kipa+ kina kei Misipa+ o koya.
7 Ena gauna oya e lako yani o Ananai+ na dauraivotu vei Tui Esa e Juta, e kaya vua: “Ni oni vakararavi* vua na tui Siria oni sega ni vakararavi* vei Jiova na nomuni Kalou, e dro bula kina mai ligamuni na mataivalu nei tui Siria.+ 8 Vakaevei, era lewe levu sara na mataivalu ni kai Iciopea kei na kai Lipea, e levu na nodra qiqinivalu kei na nodra dauvodo ose? Ia ni oni vakararavi vei Jiova, e soli ira e ligamuni.+ 9 Ni veiraiyaki na mata i Jiova e vuravura taucoko+ me vakaraitaka na nona kaukaua vei* ira e taucoko* vua na lomadra.+ Oni valavala vakalialia ena ka qo, ia me tekivu qo oni na valuti tiko ga.”+
10 E qai cudruva na dauraivotu o Esa, e biuti koya ena valeniveivesu* ni katakatataki koya ena ka qo. E vakasaurarataka sara o Esa eso vei ira na tamata ena gauna vata oya. 11 Na itukutuku me baleti Esa, na kena itekivu kei na kena iotioti, e volai ena nodra iVola na Tui Juta kei Isireli.+
12 Ena ika39 ni yabaki ni veiliutaki i Esa, e tauva na yavana e dua na mate, e tauvimate kina vakalevu, ia e sega ni kere veivuke vei Jiova ni sa tauvimate, vei ira ga na vuniwai. 13 E qai davo vata kei ira na tukana o Esa,+ e mate ena ika41 ni yabaki ni nona veiliutaki. 14 Era mani buluti koya ena ibulubulu vakaturaga e kelia ga o koya me nona ena Koro i Tevita,+ era vakadavori koya ena tavata e sinai ena waiwai vakaisaluaki kei na veimataqali ilumu e waki kina na veimataqali isaluaki e duatani sara.+ Era vakamakama tale ga ena veibulu levu me baleti koya.*