iKarua ni Veigauna

32 Oti na ka kece qo kei na ka e cakava ena yalodina+ o Esekaia, e lako yani o Tui Senakaripi e Asiria me valuti Juta. E viribaita na koro vakabai qai nakita me sikabotea me ravuta.+

2 Ni raica o Esekaia ni nakita tiko o Senakaripi me valuti Jerusalemi, 3 e vakatulewataka sara ni bose oti kei ira na nona turaga vakaitutu kei ira na nona tamata qaqa mera bonota na wai ena waivure ena taudaku ni koro,+ era mani tokoni koya. 4 Era soqoni yani e levu na lewenivanua, era bonota na waivure kece kei na uciwai e drodro tiko ena loma ni vanua, era kaya: “Na cava mera lako mai kina na tui Asiria ra qai raica ni levu tu na wai?”

5 E mani nakita o koya me tara tale na bai kece sa rusa tu, me vakaduria na kena valececere, me tara e dua tale na bai e tuba. E vakavinakataka tale ga na Buke*+ ena Koro i Tevita, e cakava e levu na iyaragi kei na isasabai. 6 E qai lesi ira na turaganivalu o koya mera lewai ira na lewenivanua, mera soqoni ira ena rara ni matamatanikoro mani vakauqeti ira, e kaya: 7 “Moni yaloqaqa moni kaukaua. Moni kua ni rere se domobulataka na tui Asiria+ kei ira na ilala levu era tomani koya, nira lewe levu era tovata kei keda, era lewe lailai era tovata kei koya.+ 8 E tokoni koya na liga ni tamata,* ia o keda e tokoni keda o Jiova na noda Kalou me vukei keda me vala ena vukuda.”+ Era yaloqaqa sara ga na lewenivanua ena vosa nei Tui Esekaia e Juta.+

9 Oti qo, ni se tiko mai Lakisi+ o Tui Senakaripi e Asiria kei ira kece na nona tamata qaqa,* e talai ira na nona italai i Jerusalemi+ vei Tui Esekaia e Juta kei ira kece na Juta era tiko e Jerusalemi, e kaya:

10 “Qo na ka e tukuna o Tui Senakaripi e Asiria, ‘Oni vakararavi tiko ena cava moni tiko ga kina e Jerusalemi ni sa viribaiti tu?+ 11 E sega ni vakacalai kemuni tiko o Esekaia me soli kemuni moni mate ena dausiga kei na karamaca, ni kaya: “O Jiova na noda Kalou ena vakabulai keda mai na liga i tui Asiria”?+ 12 E sega ni o Esekaia ga qo e kauta tani na vanua cecere+ ni nomuni Kalou kei na nona icabocabonisoro,+ qai kaya vei ira e Juta kei Jerusalemi: “Moni cuva ena dua ga na mata ni icabocabonisoro moni vakama kina na nomuni isoro”?+ 13 Oni sega ni kila na ka au cakava kei ira na tukaqu vei ira kece na lewe ni veivanua?+ E taqomaka na kalou ni veimatanitu ena veivanua qori na nodra vanua mai na ligaqu?+ 14 O cei vei ira kece na kalou ni veivanua qori e vakarusa na tukaqu me vakabulai ira rawa na nona tamata mai na ligaqu, me vakabulai kemuni kina na nomuni Kalou mai na ligaqu?+ 15 Ia qo me kua ni vakaisini kemuni se vakacalai kemuni va qo o Esekaia!+ Moni kua ni vakabauti koya, ni sega ni dua na kalou ni vanua se matanitu me vakabulai ira rawa na nona tamata mai ligaqu kei na ligadra na tukaqu. Sa na qai sega sara ni vakabulai kemuni rawa mai ligaqu na nomuni Kalou!’”+

16 E levu sara na nodra vosavakacaca na nona dauveiqaravi vei Jiova na Kalou dina kei Esekaia na nona dauveiqaravi. 17 E vola tale ga o koya eso na ivola+ me vakasewasewani Jiova na Kalou ni Isireli,+ me vosavakacacataki koya, e kaya: “Nira sega ni vakabula rawa na nodra tamata mai ligaqu na kalou ni veimatanitu ena veivanua,+ ena sega ni vakabulai ira rawa na nona tamata na Kalou nei Esekaia mai ligaqu.” 18 Era kaci tiko ga vakadomoilevu ena vosa vakaJiu vei ira na lewe i Jerusalemi era tiko ena bai me vakarerei ira qai vakataqayataki ira, mera ravuta kina na koro.+ 19 Era vosavakacacataka na Kalou ni Jerusalemi me vaka era dau cakava ina nodra kalou na lewe i vuravura, na cakacaka ni liga ni tamata. 20 Ia erau masulaka tiko ga na ka qo o Tui Esekaia kei Aisea+ na parofita na luvei Emosi, erau tagi i lomalagi me rau kere veivuke.+

21 E qai tala o Jiova e dua na agilosi qai vakarusai ira kece na tamataivalu qaqa,+ o ira na iliuliu, kei ira na turaga ena keba nei tui Asiria, e mani lesu ina nona vanua ena madua. E curu sara ina vale* ni nona kalou, era qai vakamatei koya e kea eso na luvena ena iseleiwau.+ 22 E mani vakabulai Esekaia o Jiova kei ira na lewe i Jerusalemi mai na liga i Tui Senakaripi e Asiria kei na ligadra kece na kena vo qai vakacegui ira ena veiyasana kece. 23 Levu era kau iloloma yani vei Jiova i Jerusalemi kei na ka vivinaka vei Tui Esekaia e Juta,+ era qai dokai koya vakalevu na veimatanitu kece ni oti oya.

24 Ena gauna oya e tauvimate o Esekaia, e voleka sara ni mate, e masu vei Jiova,+ e rogoci koya qai solia vua e dua na ivakatakilakila.+ 25 Ia e sega ni vakavinavinakataka o Esekaia na ka vinaka e caka vua ni qaciqacia na lomana, e cudruvi kina, e cudruvi tale ga o Juta kei Jerusalemi. 26 E qai vakamalumalumutaki koya o Esekaia ena qaciqacia ni lomana,+ o koya kei ira na lewe i Jerusalemi, e sega ni tau vei ira na cudru i Jiova ena gauna i Esekaia.+

27 E levu sara na iyau nei Esekaia qai rogo vakalevu,+ e tara eso na nona valeniyau+ me biu kina na siliva, na koula, na vatutalei, na waiwai vakaisaluaki, na isasabai, kei na iyau talei kece. 28 E cakava tale ga eso na nona lololo me maroroi kina na covuata, na waini vou, kei na waiwai, vaka kina eso na vale ni veimataqali manumanu kei na vale ni sipi. 29 E tara tale ga eso na nona koro, e levu sara na nona manumanu, na qelenisipi kei na qelenibulumakau, ni solia vua na Kalou e levu sara na iyau. 30 O Esekaia ga e bonota na ivurevure ni wai e cake+ mai Kioni,+ e vakadrodroya vakadodonu sobu ena ra me yaco ina Koro i Tevita,+ e rawa vinaka na ka kece e cakava o Esekaia. 31 Ia nira talai na nodra mata na turaga ni Papiloni mera taroga vua na ivakatakilakila+ e yaco ena vanua,+ e biuti koya ga na Kalou dina me vakatovolei koya+ me kila na ka kece e tu e lomana.+

32 Na vo ni itukutuku me baleti Esekaia kei na nona vakaraitaka na dei ni loloma,+ e volai ena raivotu i Aisea+ na parofita na luvei Emosi, ena nodra iVola na Tui Juta kei Isireli.+ 33 E qai davo kei ira na tukana o Esekaia, era buluti koya ena icabecabe ina nodra ibulubulu na luvei Tevita,+ era rokovi koya kece na Juta kei ira na lewe i Jerusalemi ena gauna e mate kina. E tui sara o Manasa na luvena tagane me sosomitaki koya.