Jope
22 E qai sauma o Elifasi+ na kai Temani:
2 “Vakacava, ena yaga vua na Kalou e dua na tamata?
Ena rawa ni yaga vua e dua e yalomatua?+
3 Vakacava e kauaitaka o koya e Kaukaua Duadua na nomu yalododonu,
Se na rawata kina o koya e dua na ka ni o yalodina ena nomu ivalavala?+
4 Ena totogitaki iko
Ena veilewaitaki iko tale ga ni o veidokai?
5 Sega ni sa levu tale na nomu caka ca
Qai sega ni oti rawa na nomu cala?+
6 Ni o kovea wale vei ira na wekamu na ivakadei ni dinau,
7 O sega ni solia na wainigunu vei koya e oca,
O bureitaka tale ga na kakana vei koya e via kana.+
8 O koya e kaukaua sa nona na vanua,+
E tiko tale ga kina o koya e vakadonui.
9 Ia o vakatalai ira na yada mera lako ligalala,
Qai musuka na ligadra na gone e sega ni vakatamani.*
10 Qori na vuna e wavoliti iko kina na dai,*+
Qai vakarerei iko na veika vakadomobula e yaco vakasauri,
11 Oya na vuna o sega ni rai rawa kina ni rui butobuto,
Qai luvuci iko na wai ni waluvu.
12 Vakacava, e sega ni tiko mai lomalagi e cake sara na Kalou?
Qai raica ni cecere kece na kalokalo.
13 Ia o tukuna: ‘Na cava sara mada e kila tu na Kalou?
Ena vakatulewa rawa e loma ni butobuto loaloa?
14 E vakaruguti koya na o me kua kina ni rai
Ni lako wavokita na iyalayala kei lomalagi.’
15 Vakacava o na muria na gaunisala makawa
Era dau lakova na daucaka ca,
16 O ira era kaliraki laivi* ni se bera nodra gauna,
17 Era kaya tiko vua na Kalou dina: ‘Ni biuti keimami!’
Na cava tale ga ena cakava rawa vei keimami o koya e Kaukaua Duadua?’
18 Ia o koya sara ga e vakasinaita nodra vale ena veika vinaka.
(Na vakasama ca va qo e yawa sara mai na noqu vakasama.)
19 Era na raica qo na yalododonu ra qai marau vakalevu,
Ena vakalialiai ira tale ga o koya e sega ni cala qai kaya:
20 ‘Era sa rusa na dau saqati keda,
Ena qai yameca na kedra ivovo na bukawaqa.’
21 Mo kilai koya mada, o na qai tiko vakacegu,
Ena qai yacovi iko na ka vinaka.
22 Mo ciqoma na lawa ni gusuna,
Qai tugana i lomamu na nona vosa.+
23 Ke o lesu vei koya e Kaukaua Duadua, o na vakavoutaki,+
Ke o kauta tani mai na nomu valelaca na ka e sega ni dodonu,
24 Ke o viritaka ena kuvuniqele na nomu koula*
Kei na koula ni Ofa+ ena veivatu ni vanua qakilo,*
25 Ena qai nomu koula* o koya e Kaukaua Duadua,
Qai nomu siliva vinaka duadua.
26 O na qai marautaki koya e Kaukaua Duadua,
O na qai tacake vua na Kalou.
27 O na vakamasuti koya, ena qai rogoci iko o koya,
O na cakava tale ga na ka o bubuluitaka.
28 Se mani cava o vakatulewataka mo cakava, ena yaco ga,
Ena cilava tale ga nomu sala na rarama.
29 O na vakamadualaki ni o vosa vakaviavialevu,
Ia ena vakabula o koya na yalomalumalumu.*
30 Ena vakabulai ira na sega ni cala o koya,
Ke savasava gona na ligamu, o na vakabulai sara ga.”