iMatai ni Tui

7 E 13 na yabaki e tara tiko kina o Solomoni na nona vale,*+ e vakaotia taucoko sara na nona vale.+

2 E qai tara na Vale ni Veikau ni Lepanoni,+ e 100 na kiupiti* na kena balavu, e 50 na kiupiti na kena raba, e 30 na kiupiti na kena cere ena duru sitari e yatu va, qai toka e dela ni duru na icoka sitari.+ 3 E vakalalaga sitari e cake ena dela ni icoka e toka ena dela ni duru, na kedra iwiliwili e 45, e 15 ena dua na iyatu. 4 E tolu na iyatu na katubaleka vakaferemi, e dua na katubaleka e veibasai kei na katubaleka ena tolu na iyatu katubaleka. 5 Na katuba lelevu kece kei na duru ni katuba e tautauvata na balavu ni tutuna vava, vaka kina na mata ni katubaleka veibasai kei na katubaleka ena tolu na iyatu katubaleka.

6 E cakava o koya na Olo* ni Duru me 50 na kiupiti na kena balavu, e 30 na kiupiti na kena raba, e dua na varada e toka e liu, e vakaduru qai tiko na dokana.

7 E cakava o koya e dua na Olo* ni iDabedabe Vakatui+ me dau vakataulewa kina, na Olo ni Veilewai,+ era qai vakalalagataka ena sitari mai na fuloa ina kena isa.

8 Na vale* me tiko kina o koya ena raranivale+ kadua e tiko tani mai na Olo, e tautauvata na kena itaratara. E tara tale ga e dua na vale e vaka na Olo qo me nei luvei Fero a taura o Solomoni me watina.+

9 E caka kece qori ena vatu saulevu+ me vaka na kena ivakarau, e ta, e varo ena ivaro ni vatu, e loma e tuba, mai na kena yavu ina dela ni lalaga, vaka kina e tuba me yacova na rara levu ni vale.+ 10 E vakadavori me kena yavu na vatu lelevu qai vatu saulevu, eso na vatu e tini na kiupiti, eso tale na vatu e walu na kiupiti. 11 E toka e cake na vatu saulevu e ta me vaka na kena ivakarau, vaka kina na sitari. 12 E wavokita na rara levu ni vale e tolu na iyatu vatu sa ta oti kei na dua na iyatu na icoka sitari, me vaka na raranivale+ e loma ni vale i Jiova kei na varada ni vale.+

13 E qai talatala o Tui Solomoni me lai kau mai Taia o Airami.+ 14 E luvena e dua na yada ena yavusa o Nafitalai, e turaga ni Taia na tamana, e matai ni kopa,+ e kenadau o koya, e tu vua na kila,+ e buta vinaka ena cakacaka kece ni kopa.* E mani lako vei Tui Solomoni me cakava na nona cakacaka kece.

15 E cakava e rua na duru kopa,+ e 18 na kiupiti na kedrau cere, e rawa ni vivi wavoki e dua vei rau na duru ena wa e 12 na kiupiti na kena balavu.+ 16 E cakava e rua na iukuuku ena kopa e vakawaicalataki me biu ena ulu ni duru. E lima na kiupiti na cere ni dua na iukuuku, e lima na kiupiti na cere ni dua tale na iukuuku. 17 E tiko ena iukuuku ena ulu ni duru ruarua e cake na lawalawa kei na iukuuku muloci vaka na sinucodo,+ e vitu ena dua na iukuuku, e vitu tale ena ikarua ni iukuuku. 18 E qai cakava wavoki e rua na iyatu pomekaraneti* ena dela ni lawalawa me robota na iukuuku ena ulu ni duru ruarua, e cakava tale ga qori ena ikarua ni iukuuku. 19 E vaka na ibulibuli ni lili na iukuuku e toka ena ulu ni duru ruarua ena varada, e va na kiupiti na kena cere. 20 E toka na iukuuku ena ulu ni duru ruarua, volekata na tolona levu e sema kei na lawalawa qai tuva kina vakaiyatu e 200 na pomekaraneti me wavokita e dua na iukuuku.+

21 E vakaduria o koya na duru ni varada ni valenisoro.*+ E vakaduria o koya na duru ena yasana imatau,* e vakatoka me o Jakini,* e vakaduria tale ga na duru ena yasana imawi,* e vakatoka me o Poasa.*+ 22 E caka na ulu ni duru me vaka na ibulibuli ni lili. Sa qai oti na cakacaka ni duru ruarua.

23 E qai cakava o koya na Wasawasa* ena kaukamea vakawaicalataki.+ E mokimokiti, e 10 na kiupiti mai na dua na batina ina dua tale, e 5 na kiupiti na kena cere, e rawa ni wavokita na wa ni vakarau e 30 na kiupiti na kena balavu.+ 24 E wavokita na ruku ni batina na iukuuku vago,+ e tini ena dua na kiupiti, e wavokita na Wasawasa taucoko, e rua na iyatu vago, e vakawaicalataki vata ga. 25 E dabe toka ena dakudratou na 12 na bulumakau tagane,+ e 3 e qara ina vualiku, e 3 e qara ina ra, e 3 e qara ina ceva, e 3 e qara ina tokalau, e toka e dakudratou na Wasawasa qai qara i loma na dibidratou. 26 Na kena vavaku e vaka na rabaniliga,* e caka na batina me vaka na bati ni bilo, e vaka na ibulibuli ni senilili. E rawa ni tawa kina e 2,000 na ivakarau paca* na wai.

27 E qai cakava o koya e tini na qiqi*+ kopa. E va na kiupiti na balavu ni dua na qiqi, e va na kiupiti na kena raba, e tolu na kiupiti na kena cere. 28 E caka va qo na qiqi: E vakalalaga qai tiko na lalaga ena maliwa ni kau vakababa. 29 E toka na laione,+ na bulumakau, kei na jerupi+ ena tutu ni lalaga e tiko ena maliwa ni kau vakababa, e va tale ga qori ena delanikau vakababa. E toka e cake na senikau veicodocodoi vaka kina ena ruku ni laione kei na bulumakau. 30 E tauyava na yava kopa ni dua na qiqi, e kopa na kau e cowiri kina, e vakaduru na tutuna vava me ivaqaco ni yavana. E tiko na duru ena ruku ni beseni, e caka na senikau ena yasana yadua. 31 E tiko e loma na gusuna, e dua na kiupiti na kena cere, e mokimokiti na gusuna, e dua veimama na kiupiti na kena itutu, e ceuti na gusuna. Na kena lalaga e tautauvata na yasana vava, e sega ni mokimokiti. 32 E tiko e ruku ni lalaga ni qiqi e va na yavana, e tiko na kena pini me taura na yavaniqiqi, e dua veimama na kiupiti na cere ni dua na yavaniqiqi. 33 Na icakacaka ni yavana e vaka ga na icakacaka ni yava ni kareti. E kaukamea na kena pini, na batiniqiqi, na kaukamea lalai e semati ena tikiniqiqi e loma, kei na tikina e loma. 34 E tiko e va na duru ena va na tutu ni qiqi yadua, e caka vata ga me dua na tikina na duru kei na qiqi. 35 E tiko ena delaniqiqi e dua na itutu mokimokiti e veimama na kiupiti na kena cere, ia na delaniqiqi, na tutuna kei na kena lalaga eratou caka vata ga me dua na tikina. 36 E ceuta o koya ena dela ni tutuna kei na kena lalaga na jerupi, na laione, kei na vuniniuniu me vaka na levu ni vanua e lala, kei na senikau me wavokita.+ 37 E va qori na nona cakava na tini na qiqi,+ e dua ga na kedratou icakacaka,+ na kedratou ivakarau, na kedratou ibulibuli.

38 E cakava o koya e tini na beseni kopa,+ e 40 na ivakarau paca e rawa ni tawa ena dua na beseni. E va na kiupiti e dua na beseni.* Era yadua na beseni na tini na qiqi. 39 E qai biuta o koya e lima na qiqi ena yasa imatau ni vale, e lima tale ena yasa imawi ni vale, e biuta na Wasawasa ena yasa imatau ni vale me qara ina tokalau donuya na ceva.+

40 E cakava tale ga o Airami+ na beseni, na isivi,+ kei na boulu.+ E qai vakaotia o Airami na cakacaka kece e cakava vei Tui Solomoni ena vale i Jiova:+ 41 na rua na duru+ kei na iukuuku vaka na boulu e toka ena ulu ni duru, na rua na lawalawa+ me robota na iukuuku mokimokiti e vaka na boulu ena ulu ni duru, 42 na 400 na pomekaraneti+ ena rua na lawalawa, e rua na iyatu pomekaraneti ena dua na lawalawa me robota na rua na iukuuku e vaka na boulu ena duru ruarua, 43 e tini na qiqi+ kei na tini na beseni+ ena delaniqiqi, 44 na Wasawasa+ kei na 12 na bulumakau e ruku ni Wasawasa, 45 eso na sedre, na isivi, na boulu, kei na iyaya kece e cakava o Airami ena kopa caliva vei Tui Solomoni me baleta na vale i Jiova. 46 E cakava qori na tui ena loma ni ivakabuli qele ena yasayasa na Joritani ena tadrua ni vanua o Sukoci kei Saricani.

47 E sega ni vakarautaka o Solomoni na bi ni iyaya ni sa rui levu. E sega ni kilai na bi ni kopa.+ 48 E cakava o Solomoni na iyaya kece me baleta na vale i Jiova: na icabocabonisoro+ koula, na teveli koula+ ni madrai dauraici, 49 na itutu ni cina+ koula dina, e lima ena imatau e lima ena imawi ena mata ni rumu sara e loma, na senikau,+ na cina kei na iqamu ni vauvau ni cina e koula,+ 50 na beseni, na ikotinivauvau ni cina,+ na boulu, na bilo,+ na itawatawa ni bukawaqa+ e koula dina, na icobacoba ni katuba ena vale e loma,+ oya na Loqi Tabu Sara kei na isogo ni katuba ni vale ni valenisoro+ e koula.

51 E mani vakaotia o Tui Solomoni na cakacaka kece me caka ena vale i Jiova. E qai kauta i loma o Solomoni na ka e vakatabuya o Tevita na tamana,+ e biuta na siliva, na koula, kei na iyaya ena valeniyau ni vale i Jiova.+