Jeremaia

52 E tui o Setekaia+ ni sa yabaki 21, e veiliutaki e Jerusalemi me 11 na yabaki. Na yaca i tinana o Emutali+ na luvei Jeremaia mai Lipina. 2 E vakayacora tiko ga na ka ca ena mata i Jiova me vaka ga na ka kece e cakava o Jioiakimi.+ 3 Qori na vuna e cudruvi Jerusalemi kina kei Juta o Jiova, me biuti ira tani mai matana.+ E talaidredre o Setekaia vei tui Papiloni.+ 4 Ena ikaciwa ni yabaki ni lewa i Setekaia, ena ikatini ni vula ena ikatini ni siga ni vula, e lako mai o Tui Nepukanesa* e Papiloni kei na nona mataivalu kece me valuti Jerusalemi. Era lai keba volekata ra qai tara wavokita e dua na bainivalu.+ 5 E viribaiti na koro me yacova na ika11 ni yabaki nei Tui Setekaia.

6 Ena ikava ni vula ena ikaciwa ni siga ni vula,+ e tatara vakaca na viakana ena koro, e sega na kedra kakana na lewenivanua.+ 7 E qai botei na bai ni koro, era mani biuta na koro na sotia kece mera dro nira muria na matamata ena maliwa ni bai ruarua volekata na nona basenikau na tui, nira wavokita tu na koro na Kalitia, era muria na sala e gole ina Arapa.+ 8 Era cicimuria na tui na mataivalu ni Kalitia ra qai toboki Setekaia+ ena buca dravuisiga e Jeriko, era veiseyaki kece mai yasana na nona mataivalu. 9 Era vesuka sara na tui ra qai kauta cake vei tui Papiloni e Ripila ena vanua o Emaci me lewai koya. 10 E vakamatei ratou na luvei Setekaia o tui Papiloni ni rai tu o koya, e vakamatei ira tale ga na turaga kece ni Juta e Ripila. 11 E qai leuta tani na mata i Setekaia o tui Papiloni,+ e vesuki koya ena ivesu kopa me kauta i Papiloni, e biuti koya e valeniveivesu me yacova na siga e mate kina.

12 Ena ikalima ni vula ena ikatini ni siga ni vula, oya ena ika19 ni yabaki i Tui Nepukanesa* e Papiloni, e lako yani i Jerusalemi+ o Nipusaretani na iliuliu ni yadra, na dauveiqaravi nei tui Papiloni. 13 E vakama na vale i Jiova,+ na nona vale na tui kei na vale kece e Jerusalemi, e vakama tale ga na vale lelevu kece. 14 Era basuka na bai taucoko e voliti Jerusalemi na mataivalu taucoko ni Kalitia era salavata yani kei na iliuliu ni yadra.+

15 E kauta vakavesu o Nipusaretani na iliuliu ni yadra eso vei ira na vakaloloma tu kei ira na vo ena koro. E kauti ira tale ga na vuki mera to vei tui Papiloni kei ira na vo ni matai ena cakacaka.+ 16 Ia e biuta tu mai o Nipusaretani na iliuliu ni yadra eso na lewenivanua dravudravua mera samaki vaini, mera cakacaka vakaukaua.+

17 Era vorolaka vakamatailalai na Kalitia na duru kopa+ e tu ena vale i Jiova, na qiqi+ kei na Wasawasa kopa+ e tu ena vale i Jiova, ra qai kauta na kopa kece i Papiloni.+ 18 Era kauta tale ga na sedre, na isivi, na ikotinivauvau ni cina, na boulu,+ na bilo,+ kei na iyaya kopa kece e dau vakayagataki ena valenisoro. 19 E kauta na iliuliu ni yadra na beseni,+ na itawatawa ni qilaiso waqa, na boulu, na sedre, na itutu ni cina,+ na bilo, kei na boulu koula dina kei na kena e siliva dina.+ 20 Na duru ruarua, na Wasawasa, na 12 na bulumakau tagane kopa+ e toka e ruku ni Wasawasa kei na qiqi e cakava o Tui Solomoni me baleta na vale i Jiova, e sega ni kilai na bibi ni kopa ni iyaya kece qori.

21 Ia na duru, e 18 na kiupiti* na cere ni dua na duru, e rawa ni wavokita na tolona na wa e 12 na kiupiti,+ na kena vavaku e va na iqaqalo,* e vakalomana. 22 E kopa na iukuuku e toka e muana, na cere ni dua na iukuuku e lima na kiupiti,+ e kopa taucoko na lawalawa kei na pomekaraneti e wavokita na iukuuku. E va tale ga qori na ikarua ni duru, kei na pomekaraneti. 23 E 96 na pomekaraneti e tuva e yasana, e 100 taucoko na pomekaraneti e wavokita na lawalawa.+

24 Na iliuliu ni yadra e kauti Siraia+ tale ga na iliuliu ni bete, o Sefanaia+ na ikarua ni bete, kei na tolu na ivakatawa ni katuba.+ 25 E kauta mai na koro e dua na vakailesilesi e lewai ira na sotia, e vitu na tamata nuitaki ni tui eratou tiko ena koro, kei na vunivola ni turaganivalu, o koya e dau soqoni ira vakaivalu na lewenivanua, kei na 60 na tamata vei ira na lewenivanua e laurai ena koro. 26 E tauri ira o Nipusaretani na iliuliu ni yadra, e kauti ira yani vei tui Papiloni e Ripila. 27 E mokuti ira o tui Papiloni qai vakamatei ira e Ripila+ ena vanua o Emaci. E mani kau vakavesu o Juta mai na nona vanua.+

28 Qo o ira e kauta vakavesu o Nepukanesa:* ena ikavitu ni yabaki era le 3,023 na Jiu.+

29 Ena ika18 ni yabaki nei Nepukanesa,*+ era le 832 na tamata era kau mai Jerusalemi.

30 Ena ika23 ni yabaki nei Nepukanesa* e kauti ira vakavesu na Jiu o Nipusaretani na iliuliu ni yadra, era le 745 na tamata.+

Era le 4,600 taucoko era kau vakavesu.

31 Ena ika37 ni yabaki ni nona kau vakavesu o Tui Jioakini+ e Juta, ena ika12 ni vula ena ika25 ni siga ni vula, e qai sereki Tui Jioakini e Juta mai valeniveivesu o Tui Ivili-mirotaki e Papiloni ena yabaki e tui kina.+ 32 E vosa vakayalovinaka vua qai vakatikora na nona idabedabe vakaturaga me sivia na nodra idabedabe vakaturaga na tui era tiko vata kei koya e Papiloni. 33 E luvata sara na nona isulu ni valeniveivesu o Jioakini, e kana tiko ga e matana ena gauna kece ni nona bula. 34 E solia e veisiga na tui Papiloni na kena ivotavota kakana ena gauna kece ni nona bula me yacova na siga e mate kina.