Nodra Cakacaka na Yapositolo

11 Eratou rogoca na yapositolo kei ira na veitacini era tiko e Jutia nira sa vakabauta tale ga na vosa ni Kalou na lewe ni veimatanitu. 2 Ni lako cake i Jerusalemi o Pita, era qai vakalewai* koya o ira na dau tokona na veicilivi,+ 3 era kaya: “O lai curu sara ina nodra vale na sega ni cili qai kana vata kei ira.” 4 Ni rogoca ya o Pita e qai vakamacalataka vakamatata vei ira na ka e yaco:

5 “Au a masu tiko ena koro o Jopa, au qai raivotutaka e dua na ka e vaka na siti lineni vakaitamera e biu sobu mai lomalagi ena tutuna vava, e lako sobu sara mai vei au.+ 6 Niu vakadikeva au raica na manumanu yavaiva kei vuravura, na manumanu kila, na manumanu qasi, kei na manumanuvuka ni lomalagi. 7 Au rogoca tale ga e dua na domo e kaya vei au, ‘Tucake Pita, vakamatea qai kania!’ 8 Au qai kaya ga, ‘Sega sara Turaga, se bera vakadua ni curu i gusuqu na ka dukadukali se tawasavasava.’ 9 E kaya ena ikarua ni gauna na domo mai lomalagi: ‘Mo kua ni tukuna ni dukadukali na ka sa vakasavasavataka na Kalou.’ 10 E yaco qo ena ikatolu ni gauna, sa qai kau cake tale i lomalagi na ka kece. 11 Ena gauna vata tale ga ya, eratou sa tucake tu ena vale keitou tiko kina e tolu na tagane eratou talai mai Sisaria me ratou mai raici au.+ 12 E qai tukuna vei au na yalo tabu meu lako vata kei ratou, meu kua sara ni lomalomarua. Eratou tomani au tale ga na ono na veitacini qo, keitou lai curu sara ina nona vale na tagane ya.

13 “Sa qai talanoataka vei keitou nona raica na agilosi e nona vale, qai kaya vua na agilosi: ‘Talatala i Jopa me lako mai o Saimoni, e yacana tale ga o Pita,+ 14 ena qai vakamacalataka vei iko na ka o na bula kina kei ira kece na lewe ni nomu vale.’ 15 Ia niu tekivu vosa ga, sa sobuti ira na yalo tabu me vaka a yacovi keda ena imatai ni gauna.+ 16 Au nanuma sara na nona vosa na Turaga, ni dau kaya: ‘E veipapitaisotaki o Joni ena wai,+ ia dou na papitaisotaki ena yalo tabu.’+ 17 Ke sa solia gona vei ira na Kalou na isolisoli vata ga qo me vaka e solia vei keda, o keda eda vakabauta na Turaga o Jisu Karisito, o cei o yau meu vakalatilati vua na Kalou?”+

18 Nira rogoca na veika qo, era sa qai duavata kina, era vakalagilagia na Kalou nira kaya: “Sa ciqoma na Kalou na nodra veivutuni na lewe ni veimatanitu mera bula kina.”+

19 O koya gona, o ira na veiseyaki+ ena vuku ni veivakararawataki a yaco ena mate i Sitiveni era gole sara i Finaisi, Saipurusi, kei Anitioki, era vunautaka na vosa vei ira ga na Jiu.+ 20 Ia eso vei ira na lako i Anitioki era kai Saipurusi, so tale era kai Kirini, era tukuna na itukutuku vinaka ni Turaga o Jisu vei ira na vosa vaKirisi. 21 E tokoni ira na liga i Jiova,* e levu sara era mai vakabauta era mani gole vua na Turaga.+

22 Era rogoca o ira ena ivavakoso mai Jerusalemi na kedra itukutuku, ra mani talai Panapasa+ me gole sara i Anitioki. 23 Ni yaco yani o koya, e raica votu na loloma soli wale ni Kalou. Dua na ka nona marau, mani uqeti ira kece mera yalodina tiko ga vua na Turaga mai vu ni lomadra.+ 24 E tamata vinaka o koya qai laurai vua na veidusimaki ni yalo tabu kei na vakabauta. Ena vuku ni ka qo era vakabauta kina na Turaga e dua na iwiliwili levu.+ 25 Sa qai gole i Tarisu o Panapasa me lai vaqarai Saula.+ 26 Ni sa kunei Saula e kauti koya sara i Anitioki. E dua na yabaki taucoko nodrau dau soqoni vata kei ira ena ivavakoso, rau qai vakavulica e dua na ilawalawa levu. Ena veidusimaki ni Kalou e tekivu mai Anitioki nodra vakatokai na tisaipeli mera lotu vaKarisito.+

27 Ena gauna ya era lako sobu mai Jerusalemi na parofita+ mera lako i Anitioki. 28 E dua vei ira na yacana o Akapo,+ e tucake qai parofisaitaka ena veidusimaki ni yalo tabu ni na vakarau yaco e dua na dausiga levu ena vuravura taucoko.+ E yaco dina qo ena gauna e veiliutaki tiko kina o Kilotiu. 29 Era lomavata na tisaipeli me vaka na ka era dui rawata,+ mera vakauta na ka ni veivuke+ vei ira na veitacini era tiko mai Jutia. 30 Qori sara ga na ka era cakava, ra solia ena ligadrau o Panapasa kei Saula me rau kauta vei ira na qase.+