Vunau ni Soro

15 E vosa tale vei Mosese kei Eroni o Jiova, e kaya: 2 “Vosa vei ira na Isireli qai tukuna vei ira, ‘Ke drodro mai e dua na ka ena yagona tabu* e dua na tagane, na ka e drodro mai qori e vakadukadukalitaki+ koya. 3 E dukadukali o koya ena ka e drodro mai, se mani drodro tiko ga mai na yagona tabu na ka qori se vakadredretaka me suasua, e dukadukali tiko ga o koya.

4 “‘Ena dukadukali na imocemoce kece e davo kina o koya e drodro mai vua e dua na ka, kei na ka kece e dabeca ena dukadukali. 5 Na tamata e tara na nona imocemoce me savata na nona isulu, me sili tale ga ena wai, ena dukadukali tiko me yacova na yakavi.+ 6 O koya e dabeca na iyaya a dabeca o koya e drodro mai vua e dua na ka me savata na nona isulu, me sili ena wai, ena dukadukali tiko me yacova na yakavi. 7 Ke dua e tara na yagoi koya e drodro mai vua e dua na ka, me savata na nona isulu, me sili ena wai, ena dukadukali tiko me yacova na yakavi. 8 Ke kasivita e dua e savasava o koya e drodro mai vua e dua na ka, me savata na nona isulu na tamata oya, me sili ena wai, ena dukadukali tiko me yacova na yakavi. 9 Na idabedabe ni manumanu kece e dabeca o koya e drodro mai vua e dua na ka ena dukadukali. 10 O koya e tara na ka a dabeca ena dukadukali me yacova na yakavi, o koya tale ga e laveta yani na ka qori ena savata na nona isulu, sili ena wai, ena dukadukali tiko me yacova na yakavi. 11 Ke se sega ni savata na ligana o koya e drodro mai vua e dua na ka+ qai tara e dua, me savata na nona isulu na tamata oya, me sili ena wai, ena dukadukali tiko me yacova na yakavi. 12 Na itawatawa qele e tara o koya e drodro mai vua e dua na ka me vorolaki, kei na itawatawa kau kece me sava ena wai.+

13 “‘Ni sa oti na ka e drodro mai qai savasava o koya, ena qai wilika e vitu na siga ni nona vakasavasavataki, me savata tale ga na nona isulu, me sili ena waidranu, ena qai savasava+ o koya. 14 Ena ikawalu ni siga, me kauta yani o koya e rua na kukuru se rua na ruve gone,+ qai lako yani ena mata i Jiova ena icurucuru ni valelaca ni veitavaki, me qai solia vua na bete. 15 Ena qai cabora qori na bete, e dua me isoro ni ivalavala ca kei na dua tale me isoro kama, ena qai veisorovaki ena vukuna na bete ena mata i Jiova me baleta na ka e drodro mai vua.

16 “‘Ke dua na tagane e bura nona wai, me savata na yagona taucoko ena wai, ena dukadukali tiko me yacova na yakavi.+ 17 Me savata ena wai na isulu kece se leca kece e tu kina na wainitagane, ena dukadukali tiko me yacova na yakavi.

18 “‘Ni moce vata e dua na tagane kei na yalewa qai bura nona wai, me rau sili ena wai, rau na dukadukali tiko me yacova na yakavi.+

19 “‘Ke dua na yalewa e lako tu ga mai vua na dra, ena vitu na siga nona dukadukali tiko ni matenivula.+ O koya e tarai koya ena dukadukali tiko me yacova na yakavi.+ 20 Na ka kece e davoca ni dukadukali voli mai na nona matenivula ena dukadukali, kei na ka kece e dabeca ena dukadukali.+ 21 O koya e tara na nona imocemoce me savata na nona isulu, me sili ena wai, ena dukadukali tiko me yacova na yakavi. 22 O koya e tara na iyaya kece e dabeca, me savata na nona isulu, me sili ena wai, ena dukadukali tiko me yacova na yakavi. 23 Ke dabeca o koya na imocemoce se dua tale na iyaya, na ka e tara qori ena vakadukadukalitaki koya me yacova na yakavi.+ 24 Ke qai mocevata kei koya e dua na tagane, mani takavi tagane+ na dukadukali ni nona matenivula, ena dukadukali o tagane me vitu na siga, ena dukadukali tale ga na imocemoce kece e davoca o tagane.

25 “‘Ke dua na yalewa e lako tu ga vua na dra me vica vata na siga,+ ni se sega ni kena gauna ni nona matenivula+ se ni balavu sara na kena drodro mai na gauna e dau matenivula kina, ena dukadukali o koya ena siga kece e drodro tiko kina vua na dra, me vaka ga na veisiga e dukadukali kina ni matenivula tiko. 26 Na imocemoce kece e davoca ena siga kece e drodro mai kina vua na dra, ena vaka na imocemoce ni nona dukadukali voli ni matenivula+ tiko, kei na iyaya kece e dabeca ena dukadukali me vaka e dau yaco ena gauna e dukadukali kina ni matenivula tiko. 27 O koya ga e tara qori ena dukadukali, me qai savata nona isulu, me sili ena wai, ena dukadukali tiko me yacova na yakavi.+

28 “‘Ia ni sa savasava o koya mai na drodro ni nona dra, ena wilika e vitu na siga, oti ena savasava+ mai. 29 Ena ikawalu ni siga, me kauta e rua na kukuru se rua na ruve gone,+ qai kauta vua na bete ena icurucuru ni valelaca ni veitavaki.+ 30 Ena cabora na bete e dua me isoro ni ivalavala ca kei na dua tale me isoro kama, ena qai veisorovaki ena vukuna na bete ena mata i Jiova me baleta na nona dukadukali ni drodro mai vua na dra.+

31 “‘Mo drau raica mera wasei tani tiko ga na Isireli mai na nodra dukadukali, mera kua kina ni mate ena nodra dukadukali, nira vakadukadukalitaka na noqu valeniveitavaki e tu ena kedra maliwa.+

32 “‘Qo na lawa me baleta na tagane e drodro mai na yagona tabu e dua na ka, na tagane e dukadukali ni bura na nona wai,+ 33 na yalewa e dukadukali voli ni matenivula+ tiko, na tagane se yalewa kece e drodro mai yagona e dua na ka,+ kei na tagane e mocevata kei na yalewa dukadukali.’”