Isikeli
24 E vosa tale vei au o Jiova ena ikaciwa ni yabaki, ena ikatini ni vula, ena ikatini ni siga ni vula, e kaya: 2 “O iko na luve ni tamata, mo vola na tikinisiga* qo, na siga sara ga qo. E ravuti Jerusalemi ena siga qo na tui Papiloni.+ 3 Mo cavuta e dua na vosa vakaibalebale me baleta na vuvale talaidredre, mo kaya me baleti ira:
“‘Qo na ka e kaya na Turaga Cecere Duadua o Jiova:
“Mo tokara na kuro ni vakasaqa,* biuta ena buka mo sova kina na wai.+
4 Mo biuta kina na tikitiki ni lewe ni manumanu,+ na tikina vinaka kece,
Na sagana kei na tabana, mo vakasinaita ena sui vinaka.
5 Mo kauta na sipi vinaka mai na qelenisipi,+ mo tuva wavoki na buka ena ruku ni kuro.
Mo saqara na tikitikina, mo vakasaqara e loma na suina.”’”
6 “Ia qo na ka e kaya na Turaga Cecere Duadua o Jiova:
‘Ena rarawa na koro dauvakadavedra,+ na kuro ni vakasaqa veveka, e sega ni kau tani na kena veveka!
Mo kauta tani yadudua na tikina,+ mo kua ni vakawirimadigitaka.
7 Ni tiko e loma na kena dra,+ e sova o koya na dra ena vatu.
E sega ni sova ena qele me ubia ena kuvuniqele.+
8 Meu vakatubura na cudru levu ni veitotogitaki,
Au biuta na nona dra ena delanivatu taliva
Me kua kina ni tabonaki.’+
9 “O koya gona, qo na ka e kaya na Turaga Cecere Duadua o Jiova:
‘Ena rarawa na koro dauvakadavedra!+
Au na binia na buka me cere.
10 Mo binia na buka, mo waqaca,
Saqara vinaka na lewe ni manumanu, mo sova tani na kena su me qesa na sui.
11 Mo biuta na kuro lala ena qilaiso me katakata,
Me damu kina na kena kopa.
Ena waicala e loma na kena duka,+ ena yavu na kena veveka.
12 E veivakacudrui, e veivakaocai,
Ni sega ni takali na vavaku ni veveka.+
Mo biuta ina buka kei na kena veveka!’
13 “‘E vakadukadukalitaki iko na nomu ivalavala torosobu.+ Au saga meu vakasavasavataki iko, ia o sega ni savasava mai na nomu dukadukali. O na sega ni savasava me oti mada na noqu cudruvi iko vakalevu.+ 14 O yau o Jiova au tukuna. Ena yaco ga. Au na vakayacora, au na sega ni suka, au na sega ni rarawa, au na sega ni veisautaka na lomaqu.+ Era na lewai iko me vaka na nomu ivalavala kei na ka o cakava,’ e kaya na Turaga Cecere Duadua o Jiova.”
15 E vosa tale vei au o Jiova, e kaya: 16 “O iko na luve ni tamata, au sa vakarau kauta tani vei iko na nomu daulomani ena dua ga na kuita.+ Mo kua ni lolosi,* se tagi, se turu na wainimatamu. 17 Me kua ni rogo na nomu vutugu, mo kua ni vakalolokutaka na mate.+ Mo dara na ivauniulumu,+ mo vakaivava.+ Mo kua ni ubia na nomu sominiwai,*+ mo kua ni kania na madrai e kau yani vei iko.”*+
18 Au vosa vei ira na lewenivanua ena mataka, e mate na watiqu ena yakavi. Au vakayacora ena matakalailai na ka au vakaroti kina. 19 Era kaya vei au na lewenivanua: “O na tukuna vei keimami se tarai keimami vakacava na ka o cakava tiko?” 20 Au kaya vei ira: “E vosa vei au o Jiova, e kaya, 21 ‘Mo tukuna ina vuvale ni Isireli: “Qo na ka e kaya na Turaga Cecere Duadua o Jiova, ‘Sa voleka niu vakacacana na noqu tikina tabu,+ na ka oni sakitaka vakalevu, na ka oni mareqeta, kei na ka e taleitaka na lomamuni. Era na mate ena iseleiwau na luvemuni tagane kei na luvemuni yalewa oni biuta tu mai.+ 22 Oni na qai cakava me vaka na ka au cakava. Oni na sega ni ubia na nomuni sominiwai, oni na sega ni kania na madrai e kau yani vei kemuni.+ 23 Oni na dara na ivauniulumuni kei na ivava e yavamuni. Oni na sega ni lolosi se tagi. Oni na vuca ena nomuni cala,+ oni na vutugu vakataki kemuni. 24 O Isikeli na kemuni ivakatakilakila.+ Oni na cakava na ka kece e cakava. Ena gauna e yaco kina, oni na qai kila ni o yau na Turaga Cecere Duadua o Jiova.’”’”
25 “O iko na luve ni tamata, na siga au kauta tani kina vei ira na nodra ivunivuni, oya na ka totoka era marautaka, na ka era mareqeta, na ka e bibi vei ira, kei na luvedra tagane kei na luvedra yalewa,+ 26 ena tukuna vei iko e dua e dro bula.+ 27 O na dolava na gusumu ena siga oya mo vosa vua e dro bula, o na sega ni galu.+ O na kedra ivakatakilakila, era na qai kila ni o yau o Jiova.”