Jeremaia

36 Ena ikava ni yabaki i Jioiakimi+ na luvei Josaia na tui Juta, e tukuna vei Jeremaia o Jiova na vosa qo, e kaya: 2 “Mo taura e dua na ivolavivigi mo vola kina na vosa kece au tukuna vei iko me baleti ira na Isireli kei ira na Juta+ kei na veimatanitu kece,+ me tekivu mai na siga au vosa kina vei iko ena gauna i Josaia me yacova na siga qo.+ 3 De dua era na rogoca na vuvale ni Juta na ca kece au nakita meu cakava vei ira, era na biuta kina na nodra ivakarau ca, meu vosota na nodra cala kei na nodra ivalavala ca.”+

4 E qai kacivi Peruki+ na luvei Narai o Jeremaia, e tukuna vua o Jeremaia na vosa kece e kaya vua o Jiova, e vola sara o Peruki ena ivolavivigi.+ 5 E tukuna o Jeremaia vei Peruki: “Au vesu tu, au sega ni curu rawa ena vale i Jiova. 6 Ia o iko, mo curu i loma mo wilika vakadomoilevu na vosa i Jiova o vola ena ivolavivigi au a tukuna vei iko. Mo wilika mera rogoca kece na tiko ena vale i Jiova ena siga ni lolo, o na wilika gona vei ira kece na lewe i Juta era biuta mai na nodra koro. 7 De rogoca o Jiova na nodra vakamamasu mera lomani, era na dui biuta na nodra ivakarau ca, ni levu na cudru kei na cudru katakata e tukuna o Jiova me tau vei ira na tamata qo.”

8 E cakava sara o Peruki na luvei Narai na ka kece e vakaroti koya kina o Jeremaia na parofita, e wilika vakadomoilevu na vosa i Jiova mai na ivolavivigi* ena vale i Jiova.+

9 Ena ikalima ni yabaki i Jioiakimi+ na luvei Josaia na tui Juta, ena ikaciwa ni vula, era kacivaka na lolo ena mata i Jiova+ o ira kece na lewe i Jerusalemi kei ira kece na biuta mai na koro kece e Juta mera lako i Jerusalemi. 10 E mani wilika vakadomoilevu o Peruki mai na ivolavivigi* na ka e tukuna o Jeremaia ena vale i Jiova, ena rumu* nei Kimaraia+ na luvei Safani+ na vunivola,* ena raranivale e cake donuya na matamata vou ni vale i Jiova,+ nira vakarorogo tu na lewenivanua kece.

11 Ni rogoca o Maikaia na luvei Kimaraia na luvei Safani na vosa kece i Jiova ena ivolavivigi,* 12 e mani lako sobu ina valenitui ena nona rumu na vunivola. Era dabe kece tu kina na turaga:* o Ilisama+ na vunivola, o Tilaia na luvei Semaia, o Elinecani+ na luvei Akipori,+ o Kimaraia na luvei Safani, o Setekaia na luvei Enanaia, kei ira na vo ni turaga. 13 E vakasavuya sara vei ira o Maikaia na vosa kece e rogoca ni wilika vakadomoilevu o Peruki mai na ivolavivigi* nira vakarorogo tu na lewenivanua.

14 Era talatala vei Peruki o ira kece na turaga nira talai Jiutai na luvei Necanaia na luvei Selemaia na luvei Kusai, era kaya: “Mo lako mai mo kauta mai na ivolavivigi o wilika mera rogoca na lewenivanua.” E mani taura e ligana na ivolavivigi o Peruki na luvei Narai me lako vei ira. 15 Era kaya vua: “Mo dabe mada mo wilika vakadomoilevu vei keimami.” E wilika sara vei ira o Peruki.

16 Nira rogoca ga na vosa kece qori era veiraici ena rere, era kaya vei Peruki: “Keimami na tukuna sara ga vua na tui na vosa kece qo.” 17 Era tarogi Peruki: “Tukuna mada vei keimami, o vola vakacava na vosa kece qo. E tukuna o Jeremaia?” 18 E kaya vei ira o Peruki: “E tukuna vei au o koya na vosa kece qo, au qai vola ena iqi ena ivolavivigi* qo.” 19 Era kaya na turaga vei Peruki: “Mo lai vunitaki iko, o iko kei Jeremaia, me kua ni dua e kila na vanua drau tiko kina.”+

20 Era lako sara vua na tui ina raranivale, era maroroya na ivolavivigi ena rumunikana nei Ilisama na vunivola, era qai tukuna vua na tui na ka kece era rogoca.

21 E mani talai Jiutai na tui+ me kauta mai na ivolavivigi, e lai kauta sara mai ena rumunikana nei Ilisama na vunivola. E qai wilika o Jiutai me rogoca na tui kei ira kece na turaga era tu volekata na tui. 22 E dabe tiko na tui ena vale ni vulaililiwa ena ikaciwa ni vula* qai waqa tiko e matana na buka e matadravu. 23 Ni wilika oti ga o Jiutai e tolu se va na iyatu ni ivolavivigi, e kotiva na iyatu qori na tui ena isele nei vunivola qai biuta ina buka e waqa tiko e matadravu, me yacova ni biu taucoko na ivolavivigi ena buka e waqa tiko e matadravu. 24 Era sega ni rere, e sega ni dresulaka na nona isulu na tui se o ira kece na nona tamata era rogoca na vosa kece qo. 25 Eratou vakamasuta na tui o Elinecani,+ o Tilaia,+ kei Kimaraia+ me kua ni vakama na ivolavivigi, ia e sega ni rogoci ratou o koya. 26 E qai tukuna na tui vei Jiramieli na luvenitui, o Siraia na luvei Asirieli, kei Selemaia na luvei Apetieli me ratou vesuki Peruki na vunivola kei Jeremaia na parofita, ia e vunitaki rau tiko ga o Jiova.+

27 E vosa tale vei Jeremaia o Jiova ni vakama oti na tui na ivolavivigi e vola tu kina o Peruki na ka e tukuna o Jeremaia,+ e kaya: 28 “Mo taura tale e dua na ivolavivigi, mo vola kina na vosa kece e tu ena imatai ni ivolavivigi e vakama o Tui Jioiakimi e Juta.+ 29 Mo tukuna vei Tui Jioiakimi e Juta, ‘Qo na ka e kaya o Jiova: “O sa vakama na ivolavivigi qo, o kaya, ‘Na cava o vola kina: “Ena lako dina mai na tui Papiloni me vakarusa na vanua qo, ena vakalala me kua ni tiko kina na tamata kei na manumanu”?’+ 30 Ia qo na ka e tukuna o Jiova me baleti Tui Jioiakimi e Juta, ‘Ena sega ni dua na nona kawa me dabe ena idabedabe vakaturaga i Tevita,+ ena biu tale ga na yagona mate ena katakata ni siga kei na tegu cevata ni bogi.+ 31 Au na sauma vua, kei ira na nona kawa, kei ira na nona tamata na nodra cala, au na vakayacora vei ira kei ira na lewe i Jerusalemi, kei ira na lewe i Juta na ca kece au tukuna me baleti ira,+ ia era sega ni vakarorogo.’”’”+

32 E taura tale e dua na ivolavivigi o Jeremaia, e solia vei Peruki na luvei Narai na vunivola,+ me vola kina na ka kece e tukuna o Jeremaia e volai tu ena ivolavivigi* e vakama+ o Tui Jioiakimi e Juta. E volai tale kina e levu na vosa va qori.