iMatai ni Veigauna

14 E tala o Tui Airami+ eso na nona italai vei Tevita, e vakauta na kau sitari, e talai ira na matai ni vatu,* kei ira na matai ni kau mera tara e dua na nona vale.*+ 2 E kila o Tevita ni sa vakataudeitaki koya o Jiova me tui Isireli,+ ni vakacerecerei na nona veiliutaki vakatui ena vukudra na nona tamata na Isireli.+

3 E kauta eso tale na watina+ o Tevita mai Jerusalemi qai so tale na luvena tagane kei na luvena yalewa.+ 4 Qo na yacadra na luvena era sucu mai Jerusalemi:+ o Samua, o Sopapi, o Necani,+ o Solomoni,+ 5 o Ipiari, o Ilisua, o Ilifeleti, 6 o Noka, o Nefeki, o Jafia, 7 o Ilisama, o Pelaita, kei Elifeleti.

8 Nira rogoca na kai Filisitia ni sa lumuti o Tevita me tui Isireli taucoko,+ era lako cake kece na kai Filisitia mera vaqarai Tevita.+ Ni rogoca qori o Tevita, e lako yani me valuti ira. 9 Era qai lako yani na kai Filisitia mera ravuravu tiko ga ena Buca o Refeimi.+ 10 E taroga na Kalou o Tevita, e kaya: “Meu lako cake meu valuti ira na kai Filisitia? Oni na soli ira e ligaqu?” E tukuna vua o Jiova: “Lako cake, au na soli ira dina e ligamu.”+ 11 E mani lako cake o Tevita i Peali-pirasimi+ qai mokuti ira e kea. E kaya sara o Tevita: “Na Kalou dina e vakadrukai ira na kequ meca e ligaqu me vaka na tacoka ni wai.” Qori na vuna era vakatoka kina na vanua oya me o Peali-pirasimi.* 12 Era biuta tani e kea na kai Filisitia na nodra kalou qai vakarota o Tevita mera vakamai ena bukawaqa.+

13 Oti era ravuravu tale na kai Filisitia ena buca.+ 14 E taroga tale na Kalou o Tevita qai tukuna vua na Kalou dina: “Mo kua ni lako cake vakadodonu vei ira. Ia mo lako yani e dakudra, mo valuti ira ena mata ni veibeaka.*+ 15 Ni o rogoca ga na rorogo ni tayabe ena ulu ni veibeaka, mo ravuravu sara, ni liutaki iko na Kalou dina me mokuta na nodra mataivalu na kai Filisitia.”+ 16 E cakava sara o Tevita me vaka e vakaroti koya+ kina na Kalou dina, era mokuta na nodra mataivalu na kai Filisitia mai Kipioni me yaco i Keseri.+ 17 E kuruvaki na irogorogo kei Tevita ena veivanua kece, e vakavuna o Jiova mera rerevaki koya na veimatanitu kece.+