iMatai ni Samuela

6 E tiko na Kato+ i Jiova ena nodra vanua na kai Filisitia me vitu na vula. 2 Era kacivi ira na bete kei ira na daucakaisausau o ira na kai Filisitia,+ era taroga: “Na cava meda cakava ena Kato i Jiova? Moni tukuna vei keimami me kau lesu vakacava ina kena vanua.” 3 Era sauma: “Ke oni vakauta lesu na kato ni veiyalayalati i Jiova na Kalou ni Isireli me kau vata kei na dua na isoro. Moni vakasuka vua kei na dua na isoro ni cakacala.+ Oni na vakabulai kina, ena qai vakatakilai vei kemuni na vuna e yaviti kemuni tiko kina na ligana.” 4 Era taroga sara: “Na isoro ni cakacala cava me keimami vakauta vua? Era kaya: “Moni vakauta e lima na sicini koula kei na lima na kalavo koula me vaka ga na kedratou iwiliwili na turaga ni Filisitia,+ ni tautauvata ga na mate e tauvi kemuni kece kei ira na nomuni turaga. 5 Moni cakava na ivakatakarakara ni nomuni sicini kei na ivakatakarakara ni nomuni kalavo+ era kauta mai na ca ena vanua, moni rokova na Kalou ni Isireli. De dua ena vakamamadataka na ligana vei kemuni, vua na nomuni kalou, kei na nomuni vanua.+ 6 Na cava oni vakalomaqataki kemuni kina me vaka na lomaqa nei Ijipita kei Fero?+ Ni totogitaki ira ga vakaukaua o koya,+ era vakatalai ira sara na Isireli mera lako.+ 7 Ia moni vakarautaka e dua na kareti vou kei na rua na tina ni bulumakau erau vakaluveni, se bera ni dua na ivua e biu vei rau. Moni qai vesuka na tina ni bulumakau ruarua ena kareti, moni qai kauta i vale na luvedrau me kua ni muri rau. 8 Moni taura na Kato i Jiova moni biuta ena kareti, moni biuta ena loma ni dua na kisi na iyaya koula oni vakauta vua me isoro ni cakacala, qai biuta e yasana.+ Moni vakatala sara me lako, 9 moni vakaraica tiko: Ke lako cake ena sala i Pecisemesi ena kena vanua,+ o koya ga e cakava vei keda na ka ca levu qo. Ia ke sega, eda na kila ni a sega ni yaviti keda na ligana, e yacovi keda ga na vakacalaka.”

10 Era cakava sara qori. Era taura e rua na tina ni bulumakau erau vakaluveni, era vesuki rau ina kareti, era qai sogota tiko ga e vale na luvedrau. 11 Era qai vakavodoka ena kareti na Kato i Jiova, na kisi e tiko kina na kalavo koula kei na ivakatakarakara ni nodra sicini. 12 Erau lako sara yani vakadodonu na tina ni bulumakau ena sala i Pecisemesi.+ E dua ga na gaunisala erau lako tiko kina, rau lako tagitagi, rau sega ni gole ina imatau se ina imawi. Eratou muri rau tiko ena gauna kece oya na turaga ni Filisitia me yacova na iyala ni vanua e Pecisemesi. 13 Era tamusuki witi tiko ena vanua bucabuca na lewe i Pecisemesi. Nira tacake era raica sara na Kato, era marau vakalevu nira raica. 14 E yaco sara yani na kareti ina were i Josua na kai Pecisemesi qai tu vakadua e kea volekata e dua na vatu levu. Era mani tatalaka na kau ni kareti ra qai cabora na tina ni bulumakau+ me isoro kama vei Jiova.

15 Era talaca na Livai+ na Kato i Jiova kei na kisi a kau vata yani e tiko e loma na iyaya koula ra qai biuta ena delanivatu levu. Era cabora na isoro kama o ira na lewe i Pecisemesi,+ era vakacaboisoro ena siga oya vei Jiova.

16 Ni ratou raica qori na lima na turaga ni Filisitia, eratou lesu sara i Ekironi ena siga oya. 17 Qo na sicini koula era vakauta na kai Filisitia me isoro ni cakacala vei Jiova:+ e dua ena vuku i Asoto,+ e dua ena vuku i Kesa, e dua ena vuku i Asikiloni, e dua ena vuku i Kaca,+ e dua ena vuku i Ekironi.+ 18 Na iwiliwili ni kalavo koula e tautauvata kei na iwiliwili ni nodratou koro na lima na turaga ni Filisitia, na koro vakabai kei na koro e sega ni vakabai.

Na vatu levu era biuta kina na Kato i Jiova e ivakadinadina me yacova mai na siga nikua ena tikinivanua nei Josua na kai Pecisemesi. 19 E qai mokuti ira na lewe i Pecisemesi na Kalou nira raica na Kato i Jiova. E mokuta e 50,070* na lewenivanua, era mani tagi na lewenivanua ni yaviti ira o Jiova ena dua na veivakamatei levu.+ 20 Era taroga tale na lewe i Pecisemesi: “O cei me tu rawa ena mata i Jiova na Kalou savasava qo,+ ena golevi cei ni sa biuti keda?”+ 21 Era qai tala eso na italai vei ira na lewe i Kiriaci-jiarimi,+ era kaya: “Era sa vakasuka na Kato i Jiova na kai Filisitia. Moni lako sobu mai, moni kauta cake vei kemuni.”+