iKarua ni iVola Vei Ira mai Korinica

3 Me keitou tukuni keitou tale vei kemuni? Se me vakataki ira eso, me dua na neitou ivola ni veivakadeitaki vei kemuni, se moni solia mai e dua na nomuni ivola ni veivakadonui? 2 O kemuni ga na neitou ivola,+ e volai e loma i keitou. Era kila, era wilika tale ga na tamata kece. 3 E macala ni oni ivola i Karisito keitou vola ena neitou ilesilesi ni veiqaravi.+ E sega ni volai ena iqi, ena yalo ga ni Kalou bula, e sega ni volai ena vatu raraba,+ e volai ga ena vatu vakayago, ya na lomamuni.+

4 Ia ena vuku i Karisito keitou doudou kina me keitou cavuta na ka qo ena mata ni Kalou. 5 E ganiti keitou vinaka na neitou ilesilesi, ia e sega ni vu qo ena neitou gumatua, na Kalou ga e vakarautaki keitou kina vakavinaka,+ 6 io e vakarautaki keitou vinaka me keitou dauveiqaravi ni veiyalayalati vou,+ keitou sega ni dauveiqaravi ni Lawa volai,+ keitou dauveiqaravi ga vakayalo, e tauca na itotogimate na Lawa volai,+ ia e veivakabulai na yalo tabu.+

7 Ke sa lagilagi na kena soli mai na Lawa e vakarautaki me tauca na itotogimate, e ceuti ena vatu,+ sa rauta mera sega ni raica vinaka na luvei Isireli na mata i Mosese ena kena lagilagi,+ na lagilagi ena seavu yani, 8 me qai sega vakacava ni lagilagi sara+ na itavi ni yalo tabu?+ 9 Ke sa lagilagi na Lawa e vakarautaki me veitotogitaki,+ sa na qai wacava sara na kena lagilagi+ na ka e vakarautaki me rawati kina na veivakadonui!+ 10 Ena vuku ni tikina qo, na ka e dau lagilagi e liu sa kau laivi na kena lagilagi, ni sa uasivi koya e dua tale na lagilagi.+ 11 Ia ke lagilagi na kena soli mai na ka ena kau laivi,+ sa na qai wacava na lagilagi ni ka ena tudei!+

12 Ia ni sa tu vei keitou na inuinui qori,+ keitou vosa kina ena doudou. 13 Keitou sega ni vakataki Mosese ni biuta e matana e dua na iubi+ mera kua ni raica na luvei Isireli na itinitini ni ka ena kau laivi. 14 Ia e buawa nodra vakasama.+ E se tu ga na iubi ya me yacova mai qo ena gauna e wiliki kina na veiyalayalati makawa,+ ni kau laivi ga ena vuku i Karisito.+ 15 Me yacova mada ga na gauna qo, ni wiliki na ivola i Mosese,+ se tiko ga na iubi e lomadra.+ 16 Ia ni dua e lesu vei Jiova,* e kau laivi na iubi.+ 17 E Yalo+ o Jiova,* na vanua e tiko kina na yalo i Jiova,* e vakilai kina na galala.+ 18 O keda kece ni sega ni ubi na matada, eda vaka na iloilo nida vakavotuya na lagilagi i Jiova,* e laurai vei keda na iyaloyalo vata ga ya mai na dua na lagilagi ina dua tale e uasivi, me vaka ga e cakava o Jiova,* o koya e sega ni laurai.*+