iMatai ni Veigauna

15 E tara tiko ga o koya eso na nona vale ena Koro i Tevita, e vakarautaka e dua na vanua me tiko kina na Kato ni Kalou dina qai birika e dua na kena valelaca.+ 2 E kaya sara o Tevita: “Me kua tale ni dua e colata na Kato ni Kalou dina, o ira ga na Livai ni digitaki ira o Jiova mera colata na Kato i Jiova, mera qaravi koya tiko ga.”+ 3 E soqoni ira sara na Isireli kece o Tevita e Jerusalemi mera kauta cake na Kato i Jiova ina vanua sa vakarautaka tu.+

4 E soqoni ira na kawa nei Eroni+ kei ira na Livai+ o Tevita: 5 vei ira na luvei Koaca, o Urieli na iliuliu kei na le 120 na tacina, 6 vei ira na luvei Mirari, o Asaia+ kei na le 220 na tacina, 7 vei ira na luvei Kerisomi, o Joeli+ na iliuliu kei na le 130 na tacina, 8 vei ira na kawa nei Elisafani+, o Semaia na iliuliu kei na le 200 na tacina, 9 vei ira na kawa nei Epironi, o Ilieli na iliuliu kei na le 80 na tacina, 10 vei ira na kawa nei Usieli,+ o Aminatapi na iliuliu kei na le 112 na tacina. 11 E kacivi rau tale ga na bete o Setoki+ kei Epaiaca+ o Tevita, kei ratou na Livai o Urieli, o Asaia, o Joeli, o Semaia, o Ilieli, kei Aminatapi, 12 qai kaya vei ratou: “O kemudou na turaga ni mataqali na Livai. Dou vakasavasavataki kemudou kei ira na tacimudou, mo dou kauta cake mai na Kato i Jiova na Kalou ni Isireli ina vanua au sa vakarautaka tu. 13 Ni dou sega ni colata ena imatai ni gauna,+ e waqa mai kina vei keda+ na cudru i Jiova na noda Kalou, nida sega ni vakasaqara me vaka na kena ituvatuva dodonu.”+ 14 Era vakasavasavataki ira sara na bete kei ira na Livai mera kauta cake na Kato i Jiova na Kalou ni Isireli.

15 Era qai colata na Kato ni Kalou dina na Livai me vaka e vakaroti Mosese kina o Jiova, nira vakaivuataka+ e tabadra. 16 E kaya sara o Tevita vei ira na nodra iliuliu na Livai mera lesia na tacidra era daulagasere mera lagasere ena marau nira vakayagataka na iyaya ni vakatagi: na ivakatagi vakawa, na api,+ kei na sibali.+

17 O ira na Livai era lesi Imani+ na luvei Joeli kei na so na tacina, o Esafa+ na luvei Perekaia, vei ira na luvei Mirari na tacidra o Icani+ na luvei Kusaia. 18 Era tomani ira na tacidratou ena ikarua ni iwasewase,+ o Sakaraia, o Peni, o Jasieli, o Simiramoci, o Jieli, o Uni, o Iliapi, o Penaia, o Mesea, o Maticaia, o Elifileu, kei Mikinaia kei Opeti-itomi kei Jaeli era ivakatawa ni matamata. 19 O ratou na daulagasere o Imani,+ o Esafa+ kei Icani, me ratou qiria na sibali+ kopa, 20 o Sakaraia, o Asieli, o Simiramoci, o Jieli, o Uni, o Iliapi, o Mesea, kei Penaia eratou qiria na ivakatagi vakawa e vakarogotaki ena Alamoca,*+ 21 o Maticaia,+ o Elifileu, o Mikinaia, o Opeti-itomi, o Jaeli, kei Asasaia eratou qiria na api e vakarogotaki ena Seminica,*+ me ratou liutaka, 22 o Kinanaia+ na nodra iliuliu na Livai e raica na ilakolako, ni kenadau kina, 23 o Perekaia kei Elikana erau ivakatawa ni matamata ni Kato. 24 O ratou na bete, o Sipanaia, o Jiosafati, o Nicaneli, o Emasai, o Sakaraia, o Penaia, kei Eliesa eratou uvuca na biukila me rogolevu ena mata ni Kato ni Kalou dina,+ o Opeti-itomi kei Jiaia erau ivakatawa ni matamata ni Kato.

25 E qai lako yani o Tevita, o ira na qase ni Isireli, kei na nodra turaga na vica vata na udolu mera kauta cake mai na kato ni veiyalayalati i Jiova mai na vale i Opeti-itomi+ nira marau vakalevu.+ 26 Ni vukei ira na Livai na Kalou dina mera colata mai na kato ni veiyalayalati i Jiova, era cabora e vitu na luvenibulumakau tagane kei na vitu na tamanisipi.+ 27 E dara o Tevita na isulu balavu tabaleka, na isuludina, vaka kina o ira na Livai era colata na Kato, o ira na daulagasere, kei Kinanaia e liutaka na ilakolako kei ira na daulagasere, e dara tale ga o Tevita na efoti lineni.+ 28 Era kauta cake tiko na Isireli kece na kato ni veiyalayalati i Jiova ena kaila ni reki,+ era uvuca na davui,* na biukila,+ na sibali, era qiria me rogolevu na ivakatagi vakawa kei na api.+

29 Ia ni yaco na kato ni veiyalayalati i Jiova ena Koro i Tevita,+ e rai sobu mai na katubaleka o Maikali na luvei Saula+ e raici Tui Tevita sara ni veiladeyaki tiko ena marau, mani beci koya e lomana.+