Isikeli

47 E kauti au lesu o koya ina katuba ni valenisoro,+ au raica sara na wai ni drodro mai na ilago ni valenisoro me drodro ina tokalau,+ ni donuya na tokalau na mata ni valenisoro. E drodro sobu na wai mai na ruku ni valenisoro ena yasa imatau, oya ena yasa ni icabocabonisoro ena ceva.

2 E qai kauti au ena gaunisala ina matamata ena vualiku,+ e kauti au wavoki i tuba me yaco ina matamata e tuba donuya na tokalau,+ au mani raica na drodro malua ni wai ena yasana imatau.

3 E lako yani na tamata ina tokalau ni taura tiko na wa ni vakarau,+ e vakarautaka e 1,000 na kiupiti,* e kauti au sara i lomaniwai, e yala na wai ena noqu qurulasawa.

4 E vakarautaka tale o koya e 1,000, e kauti au sara i lomaniwai, e yala i duruqu.

E vakarautaka tale o koya e 1,000, e kauti au i lomaniwai, e yala i toloqu.

5 Ni vakarautaka tale o koya e 1,000, sa dua na uciwai au sega ni vutoca rawa, ni titobu sara na wai e rawa ga ni qalovi, e sega ni vutoci rawa.

6 E tarogi au o koya: “O sa raica qo, o iko na luve ni tamata?”

E qai tuberi au meu lesu ina bati ni uciwai. 7 Niu lesu, au raica e levu sara na vunikau ena bati ni uciwai ruarua.+ 8 E qai kaya vei au: “Na wai qo e drodro ina yasayasa ena tokalau, e drodro sobu sara ina Arapa*+ me yaco i waitui. Ni yaco i waitui+ ena bula na wai e kea. 9 Era na bula na veimataqali kabula ena vanua kece e drodrova na wai.* Ena levu sara na ika ni drodro e kea na wai qori. Ena bula na waitui, ena bula tale ga na ka kece ena vanua kece e drodrova na uciwai.

10 “Era na duri na gonedau ena bati ni uciwai me tekivu mai Eniketi+ me yaco i Eniekileimi, na vanua ena sigani kina na lawa. Ena levu sara na veimataqali ika, me vaka na ika ni Wasa Levu.*+

11 “Ena vanua lolobo se dabibi, ena sega ni bula na vanua qori. Ena biu tu me masima.+

12 “Ena tubu na veimataqali kau me laukana ena bati ni uciwai ruarua. Ena sega ni malai na drauna se na oti na vuana. Ena vuataka na vuana vou ena veivula ni drodro mai na tikina tabu na kena wai.+ Ena laukana na vuana, ena veivakabulai na drauna.”+

13 Qo na ka e kaya na Turaga Cecere Duadua o Jiova: “Qo na vanua oni na vota me nodra ivotavota ni qele na 12 na yavusa e Isireli, ena rua na ivotavota nei Josefa.+ 14 Oni na taukena, oni na votai vakatautauvata kina.* Au bubuluitaka meu solia na vanua qo vei ira na tukamuni,+ ia qo sa soli me nomuni ivotavota.

15 “Qo na iyalayala ni vanua ena yasayasa ena vualiku: E tekivu mai na Wasa Levu me muria na sala i Eciloni+ me gole i Sitati,+ 16 i Emaci,+ i Peroca,+ kei Sipireimi e toka ena maliwa ni yasayasa o Tamasiko kei na yasayasa o Emaci, me yaco i Asatikoni ena iyalayala ni vanua o Aurani.+ 17 Na iyalayala gona ni vanua ena tekivu mai waitui me yaco i Asa-enoni+ kei na yasayasa o Tamasiko me gole ina vualiku, kei na yasayasa o Emaci.+ Qo na iyalayala ni vanua ena vualiku.

18 “Na yasayasa ena tokalau e tekivu ena kedrau veimama o Aurani kei Tamasiko, vakakina na Joritani ena kedrau veimama o Kiliati+ kei na vanua o Isireli. Moni vakarautaka me tekivu ena iyalayala ni vanua me yaco ina waitui* ena tokalau. Qo na iyalayala ni vanua ena tokalau.

19 “Ena tekivu e Tema na iyalayala ni vanua ena ceva me yaco ina wai e Meripaci-ketesa,+ ina Uciwai* me yaco sara ina Wasa Levu.+ Qo na iyalayala ni vanua ena ceva.

20 “Na iyalayala ni vanua ena ra e tekivu ena Wasa Levu me yaco ina dua na vanua e veidonui kei Lepo-emaci.*+ Qo na iyalayala ni vanua ena ra.”

21 “Moni vota na vanua qo na 12 na yavusa e Isireli. 22 Moni vota me nomuni ivotavota, o kemuni kei ira na vulagi era tiko vata kei kemuni era vakaluveni nira maliwai kemuni tiko, moni okati ira mera vaka ga na lewe i Isireli. Ena dua na nodra ivotavota ena kedra maliwa na yavusa e Isireli vata kei kemuni. 23 Moni solia vua na vulagi e dua na ivotavota ena qele ni yavusa e vakaitikotiko kina,” e kaya na Turaga Cecere Duadua o Jiova.