Vunau ni Soro
3 “‘Ke nona isoro e isoro ni veiyaloni*+ qai kau mai na qelenibulumakau, se mani ka tagane se ka yalewa, me kauta yani o koya ena mata i Jiova na ka vinaka. 2 Me tabaka na ulu ni nona isoro ena ligana, ena qai vakamatei ena icurucuru ni valelaca ni veitavaki, eratou na kureitaka wavolita na icabocabonisoro taucoko na kena dra, na bete eratou luvei Eroni. 3 Ena cabora e dua na iwase ni isoro ni veiyaloni me isoro e cabori vei Jiova ena bukawaqa:+ na uro+ e kabita na wawa, na uro kece e tu ena yasa ni wawa, 4 na rua na ivi kei na kena uro volekata na dibina. Ena kauta laivi tale ga mai o koya na uro ni yate kei na ivi.+ 5 Eratou na cakava na luvei Eroni tagane me kubou ena icabocabonisoro ena dela ni isoro kama ena dela ni kau ena bukawaqa+ me isoro e vakamai me talei* vei Jiova na kena iboi.+
6 “‘Ke nona isoro e kau mai na qelenimanumanu me isoro ni veiyaloni vei Jiova, me kauta yani na ka vinaka, se mani manumanu tagane se yalewa.+ 7 Ke kauta me nona isoro na luvenisipi tagane, ena kauta yani ena mata i Jiova. 8 Ena tabaka o koya na ulu ni nona isoro ena ligana, ena qai vakamatei ena mata ni valelaca ni veitavaki. Eratou na kureitaka wavolita na icabocabonisoro taucoko na kena dra na luvei Eroni tagane. 9 Ena cabora na uro mai na isoro ni veiyaloni me isoro e cabori ena bukawaqa vei Jiova.+ Ena kauta tani na uro taucoko ni buina volekata na suitu, na uro e kabita na wawa, na uro kece e tu ena yasa ni wawa, 10 na rua na ivi kei na kena uro volekata na dibina. Ena kauta laivi tale ga mai na uro ni yate kei na ivi.+ 11 Ena qai cakava qori na bete me kubou ena icabocabonisoro me kakana,* me isoro e cabori ena bukawaqa vei Jiova.+
12 “‘Ke nona isoro e dua na me, ena kauta yani o koya ena mata i Jiova. 13 Ena tabaka na uluna ena ligana, ena qai vakamatei ena mata ni valelaca ni veitavaki, me ratou qai kureitaka wavolita na icabocabonisoro taucoko na kena dra na luvei Eroni tagane. 14 Na tikina ena solia o koya me nona isoro e cabori ena bukawaqa vei Jiova, na uro e kabita na wawa, na uro kece e tu ena yasa ni wawa,+ 15 na rua na ivi kei na kena uro volekata na dibina. Ena kauta laivi tale ga mai na uro ni yate kei na ivi. 16 Ena qai cakava qori na bete me kubou ena icabocabonisoro me kakana,* me isoro e cabori ena bukawaqa me talei* na kena iboi. E nei Jiova na uro+ kece.
17 “‘Qo na lawa tudei moni muria ena nomuni veitabatamata, ena vanua kece oni vakaitikotiko kina: Moni kua ni kania e dua na uro se dra.’”+