iMatai ni iVola Vei Ira mai Cesalonaika

1 O yau o Paula, o Silivenuse,*+ kei Timoci,+ keitou volavola vei kemuni ena ivavakoso e Cesalonaika oni duavata kei na Kalou na Tamada, kei na Turaga o Jisu Karisito:

Me tiko mada ga kei kemuni na loloma soli wale kei na vakacegu.

2 Keitou dau vakavinavinaka vua na Kalou ni keitou cavuti kemuni kece ena masu,+ 3 ni keitou dau nanuma na nomuni cakacaka ena vakabauta, nomuni sasaga kece e yavutaki ena loloma, kei na nomuni vosota ena vuku ni nomuni nuitaka+ na noda Turaga o Jisu Karisito ena mata ni noda Kalou na Tamada. 4 Keitou kila raveitacini ni lomani kemuni na Kalou qai digitaki kemuni, 5 ni itukutuku vinaka keitou vunautaka vei kemuni e sega ni vosa wale ga, e salavata kei na kaukaua, na veidusimaki ni yalo tabu, kei na dei ni vakabauta. Oni kila vinaka na ka keitou cakava ena vukumuni moni vinaka kina. 6 Oni vakatotomuri keitou,+ oni vakatotomuria tale ga na Turaga+ ni oni ciqoma na vosa ni Kalou ena marau e vu mai na yalo tabu, e dina ni oni a vakararawataki vakalevu,+ 7 oni mani ivakaraitaki kina vei ira kece na vakabauta e Masitonia kei Akaia.

8 Oni sega wale ga ni vunautaka na vosa i Jiova* e Masitonia kei Akaia, ia e sa rogovaki e veivanua+ na nomuni vakabauta na Kalou, e sega tale ni gadrevi me keitou kaya e dua na ka. 9 Nira se tukuna tiko ga na noda sota ena imatai ni gauna, kei na nomuni lesu vua na Kalou ni oni biuta nomuni matakau+ moni dauveiqaravi ni Kalou bula, e Kalou dina, 10 e waraka tale ga na Luvena mai lomalagi+ o koya a vakatura mai na mate, oya o Jisu, ena vakabulai keda mai na cudru ni Kalou sa roro tiko mai.+