iMatai ni Samuela

24 Ni lesu ga mai o Saula ena nona cicimuri ira na kai Filisitia, era tukuna vua: “Raica! E tiko o Tevita ena vanua talasiga mai Eniketi.”+

2 E mani kauta o Saula e 3,000 na tagane era digitaki e Isireli taucoko mera lai vaqarai Tevita kei ira na nona tamata ena vanua veivatu ni me ni ulunivanua. 3 E yaco yani o Saula ena dua na bainisipi vatu e toka e batinisala, e tiko e kea e dua na qaravatu. E curu i loma o koya me lai vakacegu* ni dabe tiko o Tevita kei ira na nona tamata ena loma sara ni qaravatu.+ 4 Era kaya vei Tevita na nona tamata: “Qo na siga e tukuna vei iko o Jiova, ‘Raica! Au sa solia na kemu meca i ligamu,+ mo cakava vua na ka ga e vinaka e matamu.’” E mani tucake o Tevita qai kotiva lo na bele ni isulu balavu tabaleka nei Saula. 5 Ia oti qori e qai vakaleqai+ Tevita tiko na lomana* ni kotiva na bele ni isulu balavu tabaleka nei Saula. 6 E kaya vei ira na nona tamata: “Ena rai i Jiova, au na sega tu ga ni cakava qo vua na noqu turaga na lumuti i Jiova, meu dodoka vua na ligaqu, ni o koya na lumuti i Jiova.”+ 7 E tarovi* ira na tamata i Tevita na vosa qori, e sega ni vinakata mera vakaleqai Saula. E qai biuta na qara o Saula me lako yani.

8 Oti e tucake o Tevita, e biuta na qara me curu i tuba qai kacivaka vei Saula: “Kemuni na noqu turaga na tui!”+ Ni rai muri o Saula, e tekicuva sara o Tevita ni tara na matana na qele qai davo vakatoboicu. 9 E kaya o Tevita vei Saula: “Na cava oni rogoca kina na nodra vosa na tamata, era kaya, ‘Raica! E vinakata o Tevita me vakaleqai kemuni’?+ 10 Oni raica sara ga ena siga qo ni soli kemuni o Jiova e ligaqu ena loma ni qaravatu. Ia ni tukuna e dua meu vakamatei kemuni,+ au lomani kemuni, au kaya, ‘Au na sega sara ni dodoka na ligaqu meu vakaleqa na noqu turaga, ni o koya na lumuti i Jiova.’+ 11 Moni raica mada tamaqu, io, moni raica na bele ni nomuni isulu balavu tabaleka e tiko qo e ligaqu, au sega ni vakamatei kemuni ena gauna au kotiva kina na bele ni nomuni isulu balavu tabaleka. Moni raica, moni kila niu sega ni via vakaleqai kemuni se beci kemuni, au sega ni valavala ca vei kemuni+ ia oni vaqarai au tiko moni vakamatei au.+ 12 Me lewai kedaru mada ga o Jiova, o kemuni vata kei au,+ me totogitaki kemuni o Jiova ena ka oni cakava vei au,+ ia ena sega ni tarai kemuni na ligaqu.+ 13 Me vaka ga e kaya na vosa vakaibalebale makawa, ‘Era na cakava na ka ca o ira na tamata ca,’ ia ena sega ni tarai kemuni na ligaqu. 14 E vaqarai cei tiko na tui Isireli? O cei oni cicimuria tiko? Na koli mate? E dua na kutu?+ 15 Me turaganilewa ga o Jiova, me vakatulewa vei kedaru, ena raica o koya, ena totaki au,+ ena lewai au qai vakabulai au mai ligamuni.”

16 Ni vosa oti ga vua o Tevita, e kaya sara o Saula: “Qori na domomu na luvequ Tevita?”+ E qai tagi vakadomoilevu o Saula. 17 E kaya vei Tevita: “O sa yalododonu sara vei au, ni o caka vinaka vei au, au qai sauma vei iko ena ca.+ 18 Io, o tukuna vei au nikua na ka vinaka o cakava, ni o sega ni vakamatei au ena gauna e soli au kina o Jiova e ligamu.+ 19 O cei e kunea na kena meca qai vakatala yani vakavinaka? Ena saumi iko o Jiova ena ka vinaka+ ena ka o cakava vei au nikua. 20 Ia raica! Au kila ni o na veiliutaki dina ga vakatui,+ ena dei e ligamu na matanitu o Isireli. 21 Mo bubului gona vei au ena yaca i Jiova+ ni o na sega ni vakawabokotaka na noqu kawa era taravi au, o na sega tale ga ni bokoca na yacaqu mai na vale nei tamaqu.”+ 22 E bubului sara o Tevita vei Saula, oti e lako yani o Saula ina nona vale.+ Ia e lako cake o Tevita kei ira na nona tamata ina idrodro.+