iKarua ni Veigauna
3 E tekivu tara sara o Solomoni na vale i Jiova+ e Jerusalemi e Ulu i Moraia,+ na vanua e rairai kina o Jiova vei Tevita na tamana,+ na vanua e vakarautaka o Tevita ena rara ni butu covuata nei Orinani+ na Jepusaiti. 2 E tekivu tara ena ikarua ni siga ena ikarua ni vula, ena ikava ni yabaki ni nona veiliutaki. 3 Na yavu ni vale ni Kalou dina e vakadavora o Solomoni e 60 na kiupiti na kena balavu, e 20 na kiupiti na kena raba+ me vaka na kena ivakarau e liu.* 4 Na balavu ni varada e tiko e liu e 20 na kiupiti, e tautauvata kei na raba ni vale,* na kena cere e 120* qai ubia o koya na lomana ena koula dina.+ 5 E vakalalagataka o koya na vale levu ena kau junipa, e ubia ena koula vinaka+ qai ukutaka ena ibulibuli ni vuniniuniu+ kei na sinucodo.+ 6 E ubia tale ga o koya na vale ena vatutalei rairai vinaka,+ ia na koula+ e vakayagataka e koula ni Parivaimi. 7 E ubia o koya na vale, na kena isa, na ilago, na kena lalaga kei na kena katuba ena koula+ qai ceuta na jerupi ena lalaga.+
8 E qai cakava o koya na rumu* ni Loqi Tabu Sara,+ na kena balavu e tautauvata ga kei na raba ni vale, e 20 na kiupiti, na kena raba e 20 na kiupiti. E ubia o koya ena 600 na taledi* koula vinaka.+ 9 Na bi ni koula me buli kina na ivako e 50 na sikeli,* e ubia o koya na rumu ena tabavale e cake ena koula.
10 E qai cakava ena rumu* ni Loqi Tabu Sara e rua na ivakatakarakara ni jerupi, e ubi rau ena koula.+ 11 Na balavu taucoko ni tabadrau na jerupi+ e 20 na kiupiti, e dua na taba ni imatai ni jerupi e lima na kiupiti na kena balavu, e tara na lalaga ni vale, na tabana adua e lima na kiupiti na kena balavu qai tara na taba ni jerupi adua. 12 Na taba ni jerupi adua e lima na kiupiti na kena balavu, e tara na lalaga ni vale adua, na tabana adua e lima na kiupiti na kena balavu qai tara na taba ni imatai ni jerupi. 13 Erau vakatetaba tu na jerupi qo me 20 na kiupiti, erau tucake tu, erau qara i loma.*
14 E cakava tale ga o koya na ilatilati+ ena wa karakarawa, na vutinisipi lokaloka, na wa damudamu kata, na isuludina qai taliwataka kina na jerupi.+
15 E qai cakava o koya e rua na duru+ ena mata ni vale, e 35 na kiupiti na kedrau balavu, e lima na kiupiti na ulu ni duru ruarua e ukutaki toka.+ 16 E cakava na sinucodo me vaka na itaube, e biuta sara ena ulu ni duru ruarua, e cakava e 100 na pomekaraneti* qai tuva ena sinucodo. 17 E vakaduria o koya na duru qori ena mata ni valenisoro,* e dua ena imatau* e dua tale ena imawi,* e vakayacana na kena ena imatau me o Jakini* kei na kena ena imawi me o Poasa.*