Osea
7 “Ena gauna au via vakabulai Isireli kina,
E vakavotui tale ga na cala nei Ifireimi,+
Kei na ivakarau ca nei Samaria.+
2 Era sega ni kaya e lomadra niu na nanuma na nodra ivakarau ca kece.+
Ia qo e voliti ira na nodra ivalavala,
E tu ga e mataqu.
3 Era vakamarautaka na tui ena nodra ivakarau ca,
Kei ira na turaga ena nodra veidabui.
4 Era veibutakoci kece,
E katakata me vaka na ovani e vakatakata na dauvavavi,
E cegu ni utura na buka ni balia oti na falawa qai waraka me tubu.
5 Ena siga ni noda tui, era tauvimate na turaga,
Era cudru katakata ena vuku ni waini.+
E dodoka na ligana vei ira na dauveivakalialiai.
6 Era lako yani ni katakata na lomadra me vaka na lovo.*
E moce ena bogi taucoko na dauvavavi,
Ena mataka e waqa na lovo me vaka na yameyame.
7 Era katakata kece me vaka na lovo,
Ra qai vakamai ira na nodra turaga.*
8 O Ifireimi e veimaliwai kei ira na lewe ni veivanua.+
E vaka na madrai mokimokiti sega ni vuki o Ifireimi.
9 Era kauta tani na vulagi na nona kaukaua,+ ia e sega ni kila o koya.
Sa vula na uluna sikoa, ia e sega ni kila.
10 E tukuni Isireli ga na nona viavialevu,+
Ia era sega ni lesu vei Jiova na nodra Kalou,+
Se vaqarai koya ena vuku ni ka kece qo.
11 O Ifireimi e vaka na ruve yalowai, e sega ni yalomatua.*+
Era tagi vei Ijipita,+ era lako sara i Asiria.+
12 Na vanua ga era lakova, au na balata vei ira na noqu lawa.
Au na kauti ira sobu me vaka na manumanuvuka ni lomalagi.
Au na totogitaki ira me salavata kei na ivakasala e rogoci ena nodra isoqosoqo.+
13 Era rarawa nira drovaki au!
Era rusa nira cala vei au!
Au vakarau tu meu vakabulai ira, ia era lasutaki au.+
14 Era sega ni kere veivuke vei au mai lomadra,+
Era qoqolou tiko ga ena nodra loga.
Era musuka ga na kedra covuata kei na medra waini vou,
Era vuki tani vei au.
15 Au vakavulici ira, au vakaukauataka na ligadra,
Ia era saqati au nira bukana tiko na ka ca.
16 Era lesu, ia ina dua na ka e sega ni cecere,*
Era sega ni nuitaki me vaka na dakaititi e luluqa na kena wa.+
Era na bale na nodra turaga ena iseleiwau baleta ni veibeci na yamedra.
Qori na vuna era na dredrevaki kina ena vanua o Ijipita.”+