Nodra Cakacaka na Yapositolo

21 Keimami sa qai veitalatala rawa, keitou soko sara yani. E mua vakadodonu na waqa i Kosa, na siga tarava keitou kele yani i Roti, mai kea keitou soko sara i Patara. 2 Keitou mani donuya e dua na waqa e soko i Finaisi, keitou vodo sara kina. 3 Keitou soko sivita na yanuyanu o Saipurusi e ciri koto ena imawi, yaco sara yani i Siria, keitou lai kele e Taia me sobu kina na iusana. 4 Keitou vaqaqara, keitou kunei ira sara na tisaipeli, keitou mani cegu e kea me vitu na siga. Ia mai na ka era kila rawa ena veiuqeti ni yalo tabu, era tukuna vakavica vei Paula me kua ni butuki Jerusalemi.+ 5 Ni cava na siga keitou tiko kina e kea, keitou sa qai biubiu. Ia era lako kece mai mera talaci keitou ena taudaku ni koro, ra wili kina na yalewa kei na gone. Keimami mani tekiduru e matasawa me keimami masu. 6 Ni keimami veivakamocetaki oti, keitou vodo sara i waqa, era lesu yani ina nodra itikotiko.

7 E biu o Taia, sa mua na ilakolako i Toleme, ni keitou yaco yani keitou lai vakabula vei ira na veitacini, keitou mani siga dua vei ira. 8 Keitou biubiu ena siga tarava qai yaco sara i Sisaria. Keitou curu ina vale i Filipi na dauvunau, e dua vei ratou na vitu na tagane,+ keitou vakaicili ena nona vale. 9 O Filipi e va na luvena eratou se goneyalewa, eratou dau parofisai.+ 10 Ni sa oti e vica na siga neitou tiko e kea, e lako sobu mai Jutia e dua na parofita na yacana o Akapo,+ 11 e lako mai vei keitou, e taura na beleti i Paula, vesuka na yavana kei na ligana qai kaya: “Me vaka e kaya na yalo tabu, ‘Era na lai vesuka va qo na itaukei ni beleti qo na Jiu e Jerusalemi,+ ra qai soli koya ina ligadra na lewe ni veimatanitu.’”+ 12 Ni keimami rogoca qo, keimami sa qai vakamasuti koya, o keitou kei ira na lewenivanua ya me kua ni lako i Jerusalemi. 13 Sa qai sauma o Paula: “Na cava oni tagicaka? Oni via vakayalolailaitaki au? Au sa tu vakarau meu vesu meu mate tale ga e Jerusalemi ena vuku ni yaca ni Turaga o Jisu.”+ 14 Ni keimami sega ni veisautaka rawa na lomana, keimami sa qai duavata ena neimami kaya: “Me yaco ga na loma i Jiova.”*

15 Ni oti e vica na siga keitou vakasosolo qai lako sara i Jerusalemi. 16 Era tomani keitou eso na tisaipeli mai Sisaria mera kauti keitou ina neitou icili, na itaukei ni icili o Nasoni na kai Saipurusi, e dua sa tisaipeli dede tu mai. 17 Ni keitou yaco yani i Jerusalemi, dua na ka nodra marautaki keitou na veitacini. 18 Ia ena siga tarava, keimami lako vata kei Paula me keimami lai sotavi Jemesa,+ era tiko tale ga e kea na qase kece. 19 E vakabula vei ira o Paula qai vakamatatataka na ka e cakava na Kalou vei ira na veimatanitu ena nona cakacaka vakaitalatala.

20 Era vakalagilagia na Kalou nira rogoca oti qo, ra qai kaya vua: “Taci keimami, Paula, o sa na raica na nodra sa vakabauta e vica vata na udolu na Jiu, ra qai muria kece vagumatua na Lawa.+ 21 Ia era rogoca na Jiu qori ni o sa vakavulici ira tiko na Jiu kece ena veimatanitu ena dua na ka e veisaqasaqa kei na Lawa e vola o Mosese, mera kua ni cilivi na luvedra se mera kua ni muria na ivakarau vakaJiu.+ 22 Cava me caka? Era na rogoca ni o sa yaco mai. 23 O koya gona, cakava mada na ka keimami tukuna qo vei iko: E tiko qo e va na tagane eratou a bubului. 24 Mo lako vata kei ratou na tagane qo, mo dou vakasavasavataki kemudou me vaka na kena ivalavala e vakarota na Lawa, mo sauma na ka kece me na saumi, me tasi tale ga na uludratou. Era na qai kila kece kina ni sega ni dina na itukutuku vuka era rogoca me baleti iko, ni dodonu na nomu ivalavala o qai muria tiko na Lawa.+ 25 Ena vukudra na vakabauta mai na veimatanitu, sa vakau yani qori na neitou vakatulewa mera vakatabui ira mai na ka e cabori ina matakau,+ na dra,+ na ka e kuna,*+ kei na veiyacovi tawadodonu.”+

26 Mani kauti ratou na tagane qo o Paula ena siga e tarava me ratou lai vakasavasavataki me vaka na kena ivalavala e vakarota na Lawa,+ e lako tale ga ina valenisoro me lai vakaraitaka na gauna me na oti kina nodratou vakasavasavataki ratou, ni sa na cabo kina na nodratou dui isoro.

27 Ni vakarau cava na vitu na siga, era raici koya sara na Jiu mai Esia ni tiko ena valenisoro, era mani vakauqeti ira na ilala levu era tiko e kea, tini sara mera vesuki koya, 28 ra qai kailavaka: “Kemuni na Isireli, ni mai veivuke! Na tagane sara ga qo e vakavulici ira tiko na tamata kece ena veivanua mera cati ira na kainoda, na noda Lawa, kei na vanua qo. Kena ikuri e kauti ira sara na kai Kirisi ina valenisoro qai vakadukadukalitaka na vanua tabu qo.”+ 29 Era kaya qori nira raici Paula vata kei Tirofimo+ na kai Efeso ena koro, era mani nanuma ni kauti koya yani o Paula ina valenisoro. 30 Mani tubu kina na maue ena koro taucoko, era cici kece ina valenisoro na lewenivanua, era vesuki Paula ra qai yarataki koya ina taudaku ni valenisoro. E tasogo vakasauri na katuba. 31 Nira saga tiko mera vakamatei koya, e lai rogoca sara na komada ni mataivalu ni sa tiko yavavala o Jerusalemi taucoko. 32 E sega ni bera nona cici sobu vei ira, e kauta eso na sotia kei na turaganivalu. Nira raica na komada ni mataivalu kei ira na sotia, e mudu vakasauri nodra mokulaki Paula.

33 E toso yani na komada, e tauri koya qai vakarota me vesu ena rua na sinucodo.+ E taroga se o cei o koya, na cava nona cala. 34 Eso era kailavaka mai e dua na ka, eso tale e duatani tale na ka. Ni sega ni vakadeitaka rawa e dua na ka na komada ena nodra veilecayaki, mani vakarota mera kauti koya ina keba ni mataivalu. 35 Ni yaco o Paula ena ikabakaba, era kauti koya yani vakatotolo na sotia nira sa qai voravora ga na lewenivanua. 36 Era muri tiko ga mai na ilala levu ra qai kailavaka: “Vakamatea!”

37 Ni vakarau curu ina keba ni mataivalu, e qai kaya o Paula vei koya na komada ni mataivalu: “Rawa niu tukuna vei kemuni e dua na ka?” E kaya na komada: “O kila na vosa vaKirisi? 38 Sega ni o iko ga na kai Ijipita a bukana na saqati ni matanitu ena dua na gauna sa oti, o kauta e dua na ilala era le 4,000 na tagane dauveivakamatei ina vanua talasiga?” 39 Mani kaya o Paula: “O yau na Jiu+ mai Tarisu+ e Silisia, e kilai levu na noqu koro. O koya gona, au vakamasuti kemuni moni solia mada vei au na gauna meu vosa kina vei ira na lewenivanua.” 40 Ni sa vakadonui, e qai vakatabataba yani vei ira o Paula ena ikabakaba e tucake tu kina. Nira sa vakanomodi kece, sa qai vosa vei ira ena vosa vakaIperiu,+ e kaya: