Vunau ni Soro

19 E vosa tale vei Mosese o Jiova, e kaya: 2 “Vosa vei ira na isoqosoqo taucoko ni Isireli, qai tukuna vei ira, ‘Moni savasava ni o yau o Jiova na nomuni Kalou, au savasava.+

3 “‘Moni doka* kece na tinamuni kei na tamamuni,+ ni qai muria na noqu siga ni vakacecegu.+ O yau o Jiova na nomuni Kalou. 4 Kua ni golevi ira na kalou tawayaga,+ se cakava e dua na nomuni kalou mai na kaukamea e vakawaicalataki.+ O yau o Jiova na nomuni Kalou.

5 “‘Ke oni cabora vei Jiova na isoro ni veiyaloni,+ ni cabora ena sala moni vakadonui kina.+ 6 Me laukana ena siga oni cabora kina kei na siga e tarava, ia na ka e vo me yacova na ikatolu ni siga, me vakamai ena bukawaqa.+ 7 Ke mani laukana ena ikatolu ni siga, qori na ka veivakacudrui ena sega ni vakadonui. 8 O koya e kania ena saumitaro ena nona cala, ni sa beca o koya e dua na ka tabu vei Jiova, me qai muduki laivi* o koya qo mai vei ira na kainona.

9 “‘Ni oni tamusuka na vuata ni nomuni vanua, ni kua ni tamusuka kece na tutu ni nomuni were, ni kua tale ga ni tomika na vo ni ka e tamusuki.+ 10 Moni kua tale ga ni kumuna na ka e vo mai na nomuni loganivaini, se tomika na vuanivaini era sa qeqera tu. Mo laiva tu vei ira na dravudravua*+ kei ira na tiko vulagi. O yau o Jiova na nomuni Kalou.

11 “‘Ni kua ni butako,+ ni kua ni veivakaisini,+ ni kua tale ga ni veidabui. 12 Ni kua ni bubului lasu ena yacaqu,+ ni qai beca na yaca ni nomuni Kalou. O yau o Jiova. 13 Mo kua ni lawakitaka na wekamu,+ mo kua tale ga ni butako.+ Mo kua ni maroroya tiko na isau ni dua na tamata cakacaka ena bogi taucoko me yacova na mataka.+

14 “‘Mo kua ni cudruva* na didivara, se biuta e matana na mataboko+ na ka me tarabe kina, mo rerevaka na nomu Kalou.+ O yau o Jiova.

15 “‘Ni oni vakataulewa, moni raica me tau vakadodonu na lewa. Mo kua ni vakaduiduitaka na dravudravua se tovaka na vutuniyau.+ Me dodonu na lewa o tauca vua na wekamu.

16 “‘Kua ni vakaucaca voli ena kedra maliwa na kainomu.+ Kua ni vakaleqa na nona bula* na wekamu.*+ O yau o Jiova.

17 “‘Mo kua ni cata na tacimu e lomamu.+ Mo vunauca na wekamu se mani cava e yaco,+ mo kua kina ni okati ena nona ivalavala ca.

18 “‘Mo kua ni veisausaumitaka na ca+ se lomacataka na luvedra na kainomu, mo qai lomana na wekamu me vaka nomu lomani iko.+ O yau o Jiova.

19 “‘Moni dei ena noqu ivakaro: Mo kua ni vakawataka vata e rua na nomu mataqali manumanu. Kua ni kaburaka ena nomu iteitei e rua na mataqali sorenikau,+ kua tale ga ni dara na isulu e tali+ mai na rua na mataqali wa.*

20 “‘Ke dua na tagane e mocevata kei na dua na yalewa dauveiqaravi, mani veiyacovi kei koya, qai sa lesi tu me watina e dua tale na tagane, ia e se sega ni saumi na kena ivoli se me sereki me galala, me tau na itotogi. Me rau kua ga ni vakamatei, ni se sega ni sereki o yalewa. 21 Me kauta o tagane na nona isoro ni cakacala vei Jiova ena icurucuru ni valelaca ni veitavaki, me dua na tamanisipi me isoro ni cakacala.+ 22 Ena veisorovaki ena vukuna na bete ni cabora na tamanisipi me isoro ni cakacala ena mata i Jiova, ena vuku ni valavala ca e cakava, ena qai vosoti o koya ena vuku ni ivalavala ca e cakava.

23 “‘Ni oni sa yaco ina vanua, oni qai tea na kau cava ga me kakana, moni raica tale ga na vuadra me veisola qai ka tabu.* Ena vakatabui* vei kemuni me tolu na yabaki. Me kua ni laukana. 24 Ia ena ikava ni yabaki ena vakatabui na vuana kece, me marautaki ena mata i Jiova.+ 25 Moni qai kania na vuana ena ikalima ni yabaki, me vuavuaivinaka kina na nomuni were. O yau o Jiova na nomuni Kalou.

26 “‘Moni kua ni kania e dua na ka e tu kina na dra.+

“‘Ni kua ni dau qara na ivakatakilakila vuni se daucakaiba.+

27 “‘Ni kua ni toroya* na drauniulu e babamuni, se kotiva vakasakuca na tutu ni kumimuni.+

28 “‘Ni kua ni tavalaka na yagomuni ena vukuna na mate,+ se samuqawetaka* na yagomuni. O yau o Jiova.

29 “‘Kua ni vakalolovirataka na luvemu yalewa ni o soli koya me lai saqamua,+ me kua kina ni tini ena itovo vakasaqamua na vanua, me sinai kina ena ivalavala vakasisila.+

30 “‘Moni dei ena noqu siga ni vakacecegu,+ ni doka* tale ga noqu tikina tabu. O yau o Jiova.

31 “‘Kua ni golevi ira na dauvakacuru,+ kua tale ga ni tarogi ira na dau tukuna na ka se bera ni yaco,+ moni dukadukali kina. O yau o Jiova na nomuni Kalou.

32 “‘Mo tucake e matadra na ulusikoa,+ rokovi koya sa qase,+ qai rerevaka na nomu Kalou.+ O yau o Jiova.

33 “‘Ke dua na vulagi e tiko kei iko ena nomuni vanua, moni kua ni vakalolomataki koya.+ 34 Moni raici koya na vulagi e tiko kei kemuni me vaka ga e dua na itaukei ena kemuni maliwa,+ mo qai lomani koya me vaka ga nomu lomani iko, ni oni a tiko vulagi ena vanua o Ijipita.+ O yau o Jiova na nomuni Kalou.

35 “‘Ni kua ni vakayagataka na ivakarau lasu ni oni vakarautaka na balavu, na bibi, se na levu ni dua na ka.+ 36 Me donu na ivakarau oni vakayagataka, me donu na ivakarau ni bibi, me donu na ivakarau ni ka mamaca,* me donu na ivakarau ni wai.*+ O yau o Jiova na nomuni Kalou, au a kauti kemuni tani mai na vanua o Ijipita. 37 Moni dei gona ena noqu lawa kece kei na noqu lewa kece, moni qai cakava sara.+ O yau o Jiova.’”